Read ronga Mt 15 Bible Online

Mt 15 - ronga bible

Mt 15

¹Kutani kutrhindrekela ku Yesu van'we va vafarisi ni vatrali vapfa Yerusalema, vamuvutisa vaku:

²Xana hayini a vadondrisiwa vaku vatlula a swihila swa va khale? Hikusa avahlambi mandla loko vadjula kuda.

³Yesu avavutisa aku: Hayini-ke na n'wine n'witlula nawu wa Xikwembu Nkulukumba, n'wilandra ntsena a swihila swenu xana?

⁴Hikusa Xikwembu Nkulukumba aleleti aku: Txhava tatana waku ni mamana waku. Na swone: Lweyi arukaka a tatana wakwe kumbe mamana wakwe atayavanyiseliwa lifu.

⁵Kambe n'wine n'wili loko mhunu aku ku tatana wakwe kumbe ku mamana wakwe: Leswi afaka nifanela kun'wipfuna ha swone swinyiki Xikwembu Nkulukumba;

⁶lweyo angehena kutxhava tatana wakwe kumbe mamana wakwe. Hikolahu-ke n'wisusi ntamu wa ritu dra Xikwembu Nkulukumba hi swihila swenu.

⁷Va mandrendre! An'wiprofetile mfuri Ezaya loko aku:

⁸A tiko ledri drinitxhava hi nomu, kambe a timbilu tavu tile kule na mine.

⁹ Kambe vanigandrela mahala, hikusa vadondrisa tidondro leti tinga swileleto swa vhanu.

¹⁰Loko avitani switrungu ate: Yingelani, n'wiyingelisisa!

¹¹Ahi leswi swinhingenaka non'wini swinyamisaka mhunu, kambe leswi swihumaka anon'wini hi swone leswi swinyamisaka mhunu.

¹²Kutani a vadondrisiwa vatrhindrekela ku Yene vamuvutisa vaku: Xana waswitiva leswaku a vafarisi vakhunguvanyeki ngopfu loko vayingeli leswi uswihlayiki?

¹³Kambe Yene ayangula aku ku vone: A ximilwa xini ni xini lexi Tatana wanga wa le Matilweni angaxibyalangakiki, xitatruvuliwa.

¹⁴Vatrikani, i vakufa-mahlu lava vafambisaka a vakufa-mahlu kulobye. Loko mun'we wakufa-mahlu afambisa mun'wana wakufa-mahlu, vatayawela akheleni hi vubiri byavu.

¹⁵Kolahu Petrosi aku ku Yene: Hitlhamuxele a xifaniso lexo.

¹⁶Yesu ayangula aku: Kasi na n'wine n'wahapfumala kuyingelisisa?

¹⁷Xana an'wiswiyingelisisi leswaku hinkwaswu leswi swinhingenaka hi nomu swiya khurini, akuva ntrhaku swihuma, switxukumetiwa?

¹⁸Kambe leswi swihumaka anon'wini, swipfa mbilwini; hi swoleswo swinyamisaka mhunu.

¹⁹Hikusa ambilwini kuhuma a miyanakanyu leyi mimfani, a vudlayi, vumbuye, vuwoswi, vuyivi, kufunga madrimi ni swisandru.

²⁰A mintxhumu leyi hi yone minyamisaka mhunu. Kambe akuda na vangahlambanga a mavoko, leswo aswinyamisi mhunu.

²¹Yesu asuki ambangwini lowo aya matlhelweni ya Tiri na Sidoni.

²²Kutani mun'we wansati wa mu-Kanana[29], wa matiko lawaya, amutrhindrekela, abandlukana aku: HOSI, N'wana Davida, nitwele vurombe! A n'wananga wa wanhwanyana axanisiwa ngopfu hi mademoni.

²³Kambe Yene angamuyangulanga ntxhumu. Kutani a vadondrisiwa vakwe vatrhindrekela ku Yene vaku: Mutlhelise, hikusa abandlukana a ntrhaku kweru[30]

²⁴Kambe yene aku: Anirumeliwanga ku van'wana, loko kunge ku tihamba ta kulahleka ta tiko dra Israyele.

²⁵Kambe lweyi wansati ata, akhisama amahlweni kwake, aku: HOSI, nipfune!

²⁶Kambe Yene amuyangula aku: Aswixonganga a kuteka kati dra vana drinyikiwa swimbyanyana.

²⁷Yene aku: Im'na HOSI; kambe na swone swimbyanyana swida vuntlhantlha lebyiwaka atafuleni dra vinyi va swone.

²⁸Kutani Yesu aku ku yene: Wansati, akupfumela kwaku i kukulu! Aswiyentxeki hi laha urandraka ha kone. Akusukela ku nkama lowo, a n'wanakwe wa wanh'wanyana ahanyisiwa.

²⁹Yesu asukiki kone ayatlhasa ankingeni wa lwandle dra Galileya; kutani antlhantukela anhaveni atrhamisa kone.

³⁰A switrhungu leswi swikulu swita na swini swilema, vakufa-mahlu, va kukhuta, timbheveve ni tin'wana timbabyi tinyingi, switatavabeka minengeni yake, yene avahanyisa,

³¹lakakuva a switrhungu swihlamala ngopfu hi kuvona a timbheveve loko tisungula a kukhanela, a swilema swihanyisiwa, a vakukhuta vasungula kufamba swinene, ni vakufa-mahlu vasungula kuvona. Kutani vatwalisa Xikwembu Nkulukumba wa Israyele.

³²Yesu avitani vadondrisiwa vakwe, aku ku vone: nitwela vurombe a vhanu lava, hikusa kuhundri masiku mararu na vali na hine laha, na vangena ntxhumu wa kuda. Nakone aniswirandri a kuvatlhelisa vaya ma kaya kwavu na vangadanga, vangatxhuka vawutleka andleleni.

³³A vadondrisiwa vaku ku yene: Xana lana mananga, hingamakuma kwini makati ya kuxurisa ntalu wa vhanu wanga hi lowu xana?

³⁴Yesu avavutisa aku: N'wina makati mangani xana? Vamuyangula vaku: Hini ntlhanu na mabiri ni tinhlampfinyana.

³⁵Kolahu aleleta xitrhungu kutrhamisa hansi.

³⁶Atekiki a ntlhanu wa makati na mabiri ni tinhlampfi, atlangela, akhemelela amanyika vadondrisiwa, kutani vone vayavela xitrhungu.

³⁷Hinkwavu vada vaxura, vava vatata ntlhanu wa swihundru na swibiri hi swibuvu leswi swisaliki.

³⁸A vavanuna lava vadiki afa vali va mune wa makume ya madzana (4000), na kungahlayiwi vavasati ni vatrongwana.

³⁹Kuti loko aleleli xitrhungu, anhingena abyatrhwini awelela tikweni dra Magadani[31]