Read ronga Mt 16 Bible Online

Mt 16 - ronga bible

Mt 16

¹A vafarisi ni vasaduki vatrhindrekeli ku Yene, a kuyamudringa, vamukombela akuva avakomba xikombiso lexi xipfaka Tilweni.

²Kambe Yesu avayangula aku: Akupeleni ka dambu n'wine n'wili: Hitavani nkama wunene, hikusa a tilo drimphumelile!

³Amixweni n'wili: Dritadruma, namuhla, hikusa drizukile, drimphumi ngopfu. Vamandrendre! N'witiva kutrotra mavonekela ya tilo, kambe a swikombiso swa minkama swan'wikohla? [32]

⁴Lixaka ledri drimfani ni dra vumbuye drikombela xikombiso xin'we xa mahlolana; kambe dringatinyikiwa xikombiso loko xinge xa Yona. Kutani avasiya, atifambela.

⁵Loko a vadondrisiwa vaweleli halahaya nkingeni wun'wana, vadrivali kuteka makati.

⁶Yesu aku ku vone: Lavisani, tivonelani ku handrelo ya vafarisi ni vasaduki.

⁷Kambe a vadondrisiwa vakhanelisana makari kwavu vaku: Ahlaya leswo hikusa hidrivali kuteka makati!

⁸Yesu aswitiviki, kutani aku ku vone: Hayini n'wikhanelisana n'wiku an'witekanga makati? Swipfumelinyana.

⁹Xana an'wisanayingelisisa, na kone an'wahadrimuki a ta ntlhanu wa makati lawa mangaphamela vhanu va kutlula ntlhanu wa makume ya madzana (5000) ni leswaku i swihundru swingani n'wingaswiteka?

¹⁰Xana na kone an'widrimuki a swa ntlhanu wa makati na mabiri mangaphamela a kutlula mune wa makume ya madzana (4000) ya vhanu ni leswaku i swihundru swingani swingasala?

¹¹Xana an'wiyingelanga leswaku afa ningahlayi swa makati? Kambe tivonelani ku handrelo ya vafarisi ni ya vasaduki!

¹²Vahangayingela leswaku Yesu afa angakhaneli hi handrelo ya makati, kambe im'na, kuva vativonela ku dondro ya vafarisi ni vasaduki.

¹³Loko Yesu atlhasi atikweni dra Khezareya[33] wa Filipi, avutisi vadondrisiwa vakwe aku: Xana a vhanu vali a N'wana wa Mhunu i mani?

¹⁴Vayangula vaku: Van'we vali i Yohana Mubabatisi; van'wana, vali i Eliya; van'wana, vali i Yeremiya, kumbe mun'wana wa vaprofeta.

¹⁵Yene avutisa aku: N'wine ke? N'wili ni mani xana?

¹⁶Simoni Petrosi amuyangula aku: Wene u Kriste N'wana wa Xikwembu Nkulukumba lweyi ahanyaka.

¹⁷Kutani Yesu aku ku yene: Ukatekile wene Simoni n'wana Yona, hikusa ahi nyama ni ngati leswi swikupfuleteliki leswo, kambe hi Tatana wanga lweyi anga Matilweni.

¹⁸Na mine nakubyela leswaku: Wene u Petrosi (ribye). A henhla ka ribye ledri nitayaka a Kereke dranga; nambi tinyangwa ta Hades tingadrihlule.

¹⁹Nitakunyika mimpfungulu ya Mfumu wa Matilo. Leswi utakaswitrimba amisaveni switatrimbiwa ni le Tilweni, leswi utakaswintrhuxa laha misaveni switantrhuxiwa ni le Tilweni.

²⁰Kutani alaya a vadondrisiwa akuva vangabyeli mhunu leswaku yene i Kriste.

²¹Akusukela nkama lowo Yesu asunguli kutlhamuxela vadondrisiwa vakwe, leswaku swifaneli aya Yerusalema, kambe a vakulu va tiko, a vaprista lava vakulu ni vatrali, vatamuxanisa ngopfu, vamudlaya, kambe hi siku dra vuraru atapfuxiwa akufeni.

²²Kolahu Petrosi amutekela tlhelweni asungula kumutshinya aku: Xikwembu Nkulukumba a akuhuluxe ku leswo, we HOSI! A mhaka ya kufana ni leyo yingatxhuki yihumelela ku wene.

²³Kambe Yene andruluka aku ku Petrosi: Suka ku mine Sathana, hikusa wene u xikhunguvanyiso ku mine, hikusa awupimisi swa Xikwembu Nkulukumba, kambe swakuva swa vhanu.

²⁴Yesu ahangaku ku vadondrisiwa vakwe: Loko mhunu arandra a kunilandra atiyale, atirwexe xihambano xakwe anilandra.

²⁵Hikusa lweyi arandraka kuhuluxa vutomi byake atabyilahla; kambe lweyi atakalahla vutomi byake hikola kwanga, atabyikuma.

²⁶Switapfuna yini ku mhunu a kufuya misava hinkwayu, kambe alahlekeliwa hi vutomi byake? Kumbe xana a mhunu atahumexa yini kuva axava a vutomi byake?

²⁷A N'wana wa Mhunu atata hi kuphatima ka Tatana wakwe, kun'we ni tintrumi takwe, kutani atatlhelisela mun'wana-ni-mun'wana kuya hi matirela yake.

²⁸Nihlayelamfuri nili ku n'wine, amakari ka lava vayimiki kola, vakone van'we lava vangatikifa na vangavonanga kutlhasa ka N'wana wa Mhunu akuphatimeni ka Mfumu wakwe.