Read ronga Mt 18 Bible Online

Mt 18 - ronga bible

Mt 18

¹Ankameni wolowo a vadondrisiwa vatrhindrekela ku Yesu vamuvutisa vaku: Xana hi mani lweyi anga lwenkulu a Mfun'wini wa Matilo?

²Yene avitana a ntrongwana amuyimisa amakari kwavu,

³aku: Nihlayelamfuri nili ku n'wine: Loko n'wingandruluki n'wiva swanga hi vatrongwana, n'wingaka n'winganhingeni a Mfun'wini wa Matilo.

⁴Hileswo-ke lweyi atakatitrongohata swanga hi ntrongwana lweyi, hi yene anga lwenkulu a Mfun'wini wa Matilo.

⁵Nakone, lweyi ayamukelaka a ntrongwana wanga hi lweyi, hi vito dranga, ayamukela mine.

⁶Lweyi akhunguvanyisaka mun'we ku vatrongwana lava, lava vapfumelaka ku mine, afa swingava swa hombe ku yene loko kutrimbeleliwa a ribye dra kusila anhan'wini yake, atxukumetiwa nsingeni wa likhulu.

⁷Yowee misava hinkonta ya swikhunguvanyiso! Hikuva a swikhunguvanyiso swifanela kuhumelela; kambe yowee a mhunu lweyi a swikhunguvanyiso swihumelelaka ha yene!

⁸Hikolahu-ke, loko a voko draku kumbe a nenge waku swikukhunguvanyisa, switreme uswitxukumeta kule na wene! I swa hombe ku wene a kunhingena avutomini na upfumala a voko kumbe na ukhuta, kutlula loko utxukumetiwa andrilweni lowu wungatimekiki na uni mavoko mabiri kumbe minenge mibiri.

⁹Ni loko drin'we ku mahlu yaku drikukhunguvanyisa, drisuse udritxukumeta kule na wene; i swa hombe ku wene kunhingena vuton'wini, na uni tihlo drin'we, kutlula loko utxukumetiwa akheleni dra ndrilo lowu wungatimekikiki na uni mahlu mabiri.

¹⁰Tivonelani! N'wingadreli ni mun'we ku vatrongwana lava. Hikusa nan'wibyela leswaku a tintrumi tavu a Matilweni, minkama hinkwayu tilavisa liso dra Tatana wanga, lweyi anga Matilweni. [

¹¹Ha kunene a N'wana wa Mhunu ateli kutahuluxa leswi afaka swilahlekile.[38]]

¹²Xana n'wili yini hi leswi? Loko a mhunu ali ni dzana (100) dra tihamba, kulahleka yin'we ku tone, angatrikiki leti ta ntlhanu wa makume na mune ni ntlhanu na mune (99) anhaveni ayadjula leyi ya kulahleka?

¹³Nihlayelamfuri nili ku n'wine leswaku loko ayikumile atrhava ngopfu hikola ka yone, kutlula kutrhava hi leti ta ntlhanu wa makume na mune ni ntlhanu ni mune (99) leti tingalahlekangakiki.

¹⁴Switanu ni le ku Tatana wenu lweyi wa le Matilweni angarandri leswaku ni mun'we wa lava vatrongo alahleka.

¹⁵Loko makwenu akudohela, famba uyamutshinya na n'wi swenu ntsena. Loko akuyingela, utava ukumi makwenu.

¹⁶ Kambe loko angakuyingeli, vitana mun'we kumbe vabiri, akuva a mhaka hinkwayu yitatiyisiwa hi milomu ya timboni tibiri kumbe tiraru.

¹⁷Loko yene angadjuli kuvayingela, byela a Kereke; loko na kone ayala akuyingela a Kereke, ku wene ave swanga wa matiko ni muhlengisi.

¹⁸Nihlayelamfuri nili ku n'wine: Leswi n'wiswitrimbaka la misaveni switatrimbiwa ni le Matilweni, leswi n'wine n'wiswintrhunxaka la misaveni switantrhunxiwa ni le Matilweni.

¹⁹Nan'wibyela na kone: Loko vabiri ku n'wine la misaveni vatwanana kukombela xa ntxhumu hi xikhongoto, Tatana wanga lweyi anga Matilweni atavanyika.

²⁰Hikuva lomu vabiri kumbe vararu vatlhanganaka hi vito dranga, na mine nitava kone amakari kwavu.

²¹Petrosi atrhindrikeli ayavutisa Yene aku: HOSI, xana a makweru atanidohela kungani, na mine nimudrivalela; ku ntlhanu na kubiri, xana?

²²Yesu amuyangula aku: Anikubyeli ka ntlhanu na kubiri, kambe kutlhasa ku ntlhanu wa makume na mabiri lawa mayandrisiwaka ha ka ntlhanu na kubiri (70x7).

²³Hileswo-ke a Mfumu wa Matilo wungafanisiwa ni mufumi lweyi arandraka kukambela malandra yake.

²⁴Loko asungula kukamba, vamutisela mun'we lweyi afaka ani nandru wa dzana dra madzana (10000) ya matalanta.

²⁵Swanga hi leswi lweyi wa nandra afaka angenaswakudriha ha swone, a mufumi aleleti leswaku axavisiwa yene, ni nsati ni vana, ni hinkwaswu leswi afaka enaswu, akuva kudrihiwa a nandru.

²⁶Kolahu a nandra awa hansi amukhisama aku ku yene: Nilehisele mbilu, nitadriha hinkwaswu.

²⁷A mufumi avani vurombe na yene; lakakuva amudrivalela a nandru, amutrhunxa.

²⁸Kambe loko nandra lweyo ahuma ayatlhangana ni nandra-kulobye, lweyi afaka ani nandru ku yene wa dzana (100) dra madenari. Amukhoma, amukama makolo, aku ku yene: Driha nandru waku.

²⁹Hileswo-ke, a nandra-kulobye akhisama aminengeni yake, amukhongota aku: Nilehisele mbilu, nitadriha hinkwaswu.

³⁰Kambe lweyo angapfumelanga, loko kunge kumuyisa abohelweni akondra adriha a nandru wakwe.

³¹Hi kuvona leswi swihumeleliki, a malandra-kulobye mavaviseka ngopfu, mayabikela mufumi hinkwaswu leswi swihumeleliki.

³²Kutani a mufumi aruma vavitana a nandra lweyo aku ku yene: Nandra lweyi mfani! Nikudrivaleli a nandru waku hinkwawu, hikuva unikombeliki.

³³Xana afa swingafanelanga leswaku utretrelela a nandra-kuloni swanga ha mine nikutretreleliki?

³⁴Kutani hi kuhlundruka, a mufumi amunyiketa kuvaxanisi, akondra adriha a nandru wakwe hinkwawu.

³⁵Hi swoswi atakan'wiyentxa swone Tatana wanga wa le Matilweni, loko mun'wana-ni-mun'wana wenu angadrivaleli a makwavu hi mbilu.