Read ronga Mt 2 Bible Online

Mt 2 - ronga bible

Mt 2

¹Yesu apswaliwi a Betlehema, atikweni dra Yudeya, ankameni lowu Heroda afaka ali mufumi wa tiko. Hikolahu kutlhasi tintlhari ta le Vuxeni a Yerusalema leti afaka titinyiketeli tidondrweni ta tinyeleti

²tivutisa tiku: Yikwini a HOSI ya va-Yuda leyi yahakakupswaliwa? Hikusa hivoni a nyeleti ya yone a Vuxeni, kutani hiteli kutatayigandrela.

³A mufumi Heroda atxhuka ngopfu loko ayingela leswo, yene kun'we ni vayaki hinkwavu va Yerusalema.

⁴Ahangarumela kuvitaniwa hinkwavu a vaprista[4] lava vakulu ni vadondrisi va Nawu, avavutisa lomu afaka atapswaleliwa kone Kriste.

⁵Vone vaku: Hi le Betlehema wa Yudeya, hikusa swatralisiwi xiswoswo hi muprofeta angaku:

⁶ Na wene Betlehema, tiko dra Yuda awuntrongo amakari ka mintsindra ya tiko ledro, hikusa kutahuma ku wene a murangeli lweyi atakabyisa a tiko dranga dra Israyele.

⁷Kutani Heroda avitana a tintlhari axihundleni, ativutisa a nkama lowu nyeleti yingahumelela ha wone.

⁸Kutani atileleta a kuya a Betlehema, aku ku tone: Fambani n'wiyavutisisa swinene hi tlhelo dra n'wana lweyo, ni loko n'wimukumile, nitivisani, akuva na mine nitayamugandrela.

⁹Loko a tintlhari tiyingeli mufumi, tifamba. A nyeleti leyi afaka tiyivonile Vuxeni, afa yifamba amahlweni ka tone, yikondra yiyayima a henhla ka mbangu lowu a ntrongwana afaka ali ku wone.

¹⁰Loko a tintlhari tivoni a nyeleti, titrhavi ngopfu.

¹¹Kolahu tinhingeni andlwini, kutani tivona ntrongwana na Maria, mamana wakwe, tikhisama, timugandrela. Kutani tipfula vukosi bya tone timuhanana nsuku, muri wa kunun'hwela ni mira.

¹²Loko Xikwembu Nkulukumba atitivisi anorweni leswaku tingahatlheleli lomu Heroda afaka ali kone, tetlhelela atikweni dra tone hi yin'wana ndlela.

¹³Loko a tintlhari titava tifambile, a ntrumi ya HOSI yivoneka ku Yosefa anorweni, yiku: Pfuka, teka a ntrongwana ni mamana wakwe utrutrumela Egipta. Trhamisa kone kukondra nikutivisa, hikusa Heroda adjula ntrongwana akuva amudlaya.

¹⁴Yosefa apfukiki ateka a ntrongwana ni mamana wakwe, afamba navu avusikwini, atrutrumela Egipta,

¹⁵ lomu vatrhamiki kone kukondra Heroda afa. Leswi swihumeleli akuva kuhetiseka leswi swingahlayiwa hi HOSI, hi nomu wa muprofeta angaku: Nivitani a N'wananga a Egipta.

¹⁶Loko Heroda agungula leswaku a tintlhari letiya timukanganyisile, ahlundruka ngopfu, arumela kuyadlayiwa a vatrongwana hinkwavu va xinuna lava afaka vali Betlehema ni le tikweni hinkwadru dra kone, va malembe mabiri ni kuya hansi, hi kulandra a nkama lowu afaka abyeliwi wone hi tintlhari.

¹⁷Xileswi, kavi laha kungahetiseka a matralwa ya muprofeta Yeremiya lweyi angaku:

¹⁸ Kutwala huwa a Rama: a nkosi ni swidrilo leswi swikulu. I Rahele lweyi adrilelaka a vana vakwe; afaka angadjuli ni kumiyetiwa, hi kuva avehe kone.

¹⁹Ntrhaku ka kufa ka Heroda, a ntrumi ya HOSI yihumelela ku Yosefa anorweni le Egipta, yiku:

²⁰Pfuka, teka a ntrongwana ni mamana wakwe, utlhelela tikweni dra Israyele, hikusa vafile lava afaka vadjula kudlaya a ntrongwana.

²¹Kutani Yosefa apfuka ateka a ntrongwana ni mamana wakwe atlhelela a tikweni dra Israyele.

²²Kambe loko ativi leswaku Arkelawo[5] hi yene afumaka Yudeya, ambangwini wa tatana wakwe Heroda, atxhava kuya kone; ativisiwiki kambe hi Xikwembu Nkulukumba anorweni, akongoma tikweni dra Galileya.

²³Loko atlhasile, ayitrhama amutini lowu valiki i Nazarete. Leswi swihumeleli akuva kuhetiseka leswi swingahlayiwa hi vaprofeta vangaku: Yesu atatxhuliwa mu-Nazarete.[6]