Read ronga Mt 20 Bible Online

Mt 20 - ronga bible

Mt 20

¹Hikuva a Mfumu wa Matilo wufana ni n'winyi wa yindlu, lweyi ahumiki ampundrwini ayathola vatiri vaya ansin'wini yake ya vhinya.

²Loko apfumelelani na vone a kuvahakela hi mali ya Denari hi siku, avarumela kuyatira ansin'wini yake.

³Atlhela ahuma hi nkama wa vuraru, lowu wukombisiwaka hi nkama wa [40] a mahlayeleni yeru, avona van'wana lava afaka vayimi hubyini na vangena ntiro.

⁴Aku ku vone: Yanani na n'wine n'wiyatira ansin'wini yanga, nitan'winyika leswi swidringanaka.

⁵Vone vafamba. Atlhela ahuma hi nkama wa vuntlhanu na mun'we (6), ni hi nkama wa vuntlhanu na mune (9) [41] ayentxisa xiswoswo.

⁶Atlhela ahuma hi nkama wa vukhume na mun'we (11)[42] aya ahubyini akuma van'wana vhanu na vayimile. Aku ku vone: Xana n'wiyimeli yini lahu a siku hinkwadru na n'wingatiri ntxhumu?

⁷Vone vaku: Hi leswi hingatholiwangakiki hi mhunu. Avabyela aku: Yanani na n'wine alivhinyeni dranga.

⁸Driku drapela, a n'winyi wa vhinya abyela a mulaviseli wakwe aku: Vitana a vatiri, uvanyika a hakelo, usungula hi lava va le ntrhaku, uyagama hi lava va kuranga.

⁹Kuta lava va nkama wa vukhume na mun'we, vayamukela Denari, mun'wana-ni-mun'wana;

¹⁰kutani kutlhasa lava va kusungula, afaka vapimisa leswaku vatayamukela kutlulisa; kambe na vone vayamukela Denari, mun'wana-ni-mun'wana.

¹¹Loko vayamukelile vasungula a kun'unun'utela a n'winyi wa yindlu,

¹²vaku: Lava vatlhasiki avugan'wini, vatiri a nkama mun'we ntsena, kambe uvahakeli swanga ha hine hibyatrhiki a kubindra ka siku hinkwadru ni mumu.

¹³Kambe a n'winyi wa nsimu ayangula mun'we wavu aku ku yene: Nakulori, anikukanganyisi. Ahiyingelananga hi Denari drin'we xana?

¹⁴Titekele a swaku utifambela. Hikusa nidjula a kunyika lweyi wa vugamu swanga ha wene.

¹⁵Kumbe xana anina mfanelo ya kuyentxa leswi niswidjulaka hi swanga xana? Kumbe unilavisa hi kubiha hi leswi ninga munene xana?

¹⁶Hi swoleswo, a va vugamu vatava va kuranga; ni va kuranga, vatava va vugamu.

¹⁷Kutani loko Yesu atlhantukela Yerusalema, ateka hi tlhelo a vadondrisiwa lava va khume na vabiri, na vali ndleleni aku ku vone:

¹⁸Vonani! Hitlhantukela a Yerusalema; kutani N'wana wa Mhunu atakanyiketiwa amandleni ya vaprista lava vakulu ni vatrali, vatamuyavanyisela a lifu,

¹⁹vatamunyiketa ku va-Matiko akuva vamusandra, vamupswhita, vamugongondrela axihambanwini; kambe hi siku dra vuraru atapfuxiwa akufeni.

²⁰Kutani a mamana wa vana va Zebedeya atrhindrekela ku Yene kun'we ni vana vakwe, amukhisamela, akuva akombela xa ntxhumu.

²¹Yene amuvutisa aku: Udjula yini? Lweyi wansati ayangula aku: Hlaya leswaku a vana vanga lava vabiri, vatatrhamisa na wene aNfun'wini waku, mun'we ava xineneni, mun'wana ava ximantrhini.

²²Yesu ayangula aku: An'wiswitivi leswi n'wikombelaka swone. Xana n'wingaswikota a kunwa a ntrheko[43] lowu ninga kusuhi ni kuwunwa? Vone vaku: Im'na hingaswikota!

²³Yesu avabyela aku: Kunene, n'witanwa a ntrheko wanga, kambe a kutrhama axineneni kumbe aximantrhini ahi mine ninganyikaka swone, ntsena kutanyikiwa lava Tatana wanga avabekiseliki.

²⁴Vatiki vaswiyingela, a vadondrisiwa lava van'wana va khume, vahlundrukela a vamakwavu-na-makwavu lava vabiri.

²⁵Kambe Yesu avavitana aku ku vone: N'waswitiva leswaku a vafumi va-Matiko vamafuma, ni vakulu vayentxa ntamu a henhla ka wone.

²⁶Swingavi tanu amakari kwenu; kambe lweyi adjulaka kuva lwenkulu amakari kwenu, aavi mutireli wenu;

²⁷ni lweyi arandraka akuva lweyi wa kuranga, amakari kwenu, aavi nandra wenu.

²⁸Swanga hi leswi na Yene N'wana wa Mhunu angatelangakiki kutireliwa, kambe ateliki kutirela ni kunyiketa a vutomi byake xiva xitirulu ku lava vanyingi.

²⁹Vaku na vasuka Yeriko, a xitrhungu xikulu ximulandra.

³⁰Kutani lava va kufa-mahlu vabiri lava afaka vatrhami kusuhi ni ndlela, loko vativi leswaku hi Yesu lweyi ahundraka, vabandlukana vaku: HOSI, N'wana Davida, hitwele vurombe.

³¹Kambe a xitrhungu xivakhwavela akuva vamiyela. Kambe vone vahundrisa a kubandlukana vaku: HOSI, N'wana Davida, hiyentxele vurombe.

³²Kutani Yesu ayima avavitana, avavutisa aku: N'wirandra leswaku nin'wiyentxela yini xana?

³³Vone vayangula vaku: HOSI, hirandra leswaku a mahlu yeru mapfuliwa.

³⁴Yesu avatwela vurombe, avakhumba a mahlu, kolahu, vatlhela vavona, kutani vamulandra.