Read ronga Mt 21 Bible Online

Mt 21 - ronga bible

Mt 21

¹ Kuti loko vatrhindrekela a Yerusalema, vatlhasa Betfage, anhaveni ya Minhlwari, Yesu aruma a vadondrisiwa vabiri

²aku ku vone: Fambani n'wiya mutini lowu n'wikongomaniki na wone. N'witakuma kone a mbongolo ya mpswele, yikulekiwi kun'we ni ximbongolwana, tikululani n'wititisa ku mine.

³Kutaku loko mhunu ahlaya xa ntxhumu, yangulani leswaku a HOSI yatidjula, kutani yitahatla yitirumela.

⁴Leswo swihumeleli akuva kuhetiseka leswi swingahlayiwa hi muprofeta, lweyi angaku:

⁵ Byelani nhwanyana wa Siyoni: Lavisa a Mufumi waku awata ku wene! Hikutitrongahata, na akhandriyi mbongolo leyi yingani ximbongolwana, n'wana wa leyi yirwalaka a mpinga.

⁶A vadondrisiwa vafamba vayayentxisa xileswi Yesu afaka avaleletisi xiswone.

⁷Vatisa a mbongolo ni ximbongolwana xa yone, vayandlalela makapulana yavu a henhla ka tone, kutani Yesu akhandriya.

⁸Kutani lava vanyingi ku xitrhungu afa vayandlala makapulana yavu andleleni, van'wana kambe afa vatrema tinkambu ta minsinya vatiyandlala ndleleni.

⁹Ku switrhungu: lava afaka vafamba mahlweni ni lava afaka vamulandra, afa vabandlukana vaku: Hozana[44], N'wana Davida! Akukhensiwe lweyi ataka hi vito dra HOSI! Hozana a henhla-henhla Matilweni.

¹⁰Loko Yesu anhingena Yerusalema, a muti hinkwawu wuyima-yimeka, na hinkwavu vavutisana vaku: Xana lweyi, i mani?

¹¹A switrhungu afa swiku: Lweyi i muprofeta Yesu, wa le Nazarete wa Galileya.

¹²Yesu anhingeniki a Tempeleni, ahlongola handle hinkwavu lava afaka vaxavisa ni vaxavi. Abakanyisa matafula ya vatxintxisi va timali ni switrhamu swa vaxavisi va matuva;

¹³ aku ku vone: Kutraliwi leswaku: A yindlu yanga yitahlayiwa yindlu ya vukhongoti, kambe n'wine n'wiyiyentxa yiva mhakwa ya vayivi.

¹⁴A vakufa-mahlu ni vakukhuta vatrhindrekela ku Yene a Tempeleni, avahanyisa.

¹⁵Ke loko a vaprista lava vakulu ni vatrali vavona mahlolana lawa amayentxiki, ni loko vayingela a vatrongwana lava afaka vabandlukana Tempeleni, vaku: Hozana, N'wana Davida, vahlundruka,

¹⁶vaku ku Yene: Xana waswiyingela leswi vaswihlayaka, lava? Yesu aku ku vone: Im'na! Xana an'wingihlaya a tralwa ledri driliki: Anon'wini wa vatrongwana, ni wa lava vayan'waka utibekiseli lidrumu[45]?

¹⁷Kutani avatrika, asuka mutini, aya Betaniya ayayetlela kone.

¹⁸Amixweni ngopfu, loko atlhelela mutini, atwi ndlala.

¹⁹Avona a nkuwa kusuhi ni ndlela, atrhindrekela ku wone, kambe angakumanga ntxhumu ku wone, loko mange makamba ntsena. Kutani aku: Ni kan'we ungahabeki mihandru! A nkuwa wuwoma xikan'we.

²⁰Loko vavoni leswo, a vadondrisiwa vahlamala ngopfu vaku: Swiyentxisi kuyini akuva a nkuwa wuwoma hi kukahlula?

²¹Yesu ayangula aku ku vone: Nihlayelamfuri nili ku n'wine, loko n'wini kupfumela na n'wingaganaganeki, n'wingaka n'wingayentxi ntsena leswi swiyentxiwiki ankuweni lowu, kambe nambi n'wingaku ku nhava leyi: ‘Tisimule la utitxukumeta lwandle’, switayentxekisa xiswoswo.

²²Ke, hinkwaswu leswi n'witakaswikombela hi kukhongota na n'wikholwa, n'witaswiyamukela.

²³Anhingeniki aTempeleni, a vaprista lava vakulu ni vakulu va tiko vatrhindrekela ku Yene na adondrisa, vamuvutisa vaku: I ntamu muni lowu uyentxaka leswi ha wone? Hi mani lweyi akunyikiki a ntamu wolowo?

²⁴Yesu avayangula aku: Na mine nitan'wivutisa a ntxhumu wun'we; loko n'winiyangula, na mine nitan'wibyela a ntamu lowu nitiraka leswi ha wone.

²⁵Xana a babatiso dra Yohana afa dripfa kwini? Atilweni kumbe a vhanwini? Kolahu vakhanelisana van'we ni van'wana vaku: Loko hihlaya leswaku atilweni, ataku: Hayini-ke n'wingapfumelanga ku yene?

²⁶Loko hihlaya leswaku avhanwini, hitxhava xitrhungu, hikusa hinkwavu vapfumela leswaku Yohana i muprofeta.

²⁷Hileswo-ke, vayangula Yesu vaku: Ahiswitivi. Kutani na Yene avayangula aku: Ke na mine ningan'wibyele a ntamu lowu niyentxaka leswi ha wone.

²⁸Xana n'wili yini hi leswi: A mhunu mun'we afa ani vana vabiri, aya ku lweyi wa kusungula aku: N'wananga, famba namuhla uyatira ansin'wini yanga ya vhinya.

²⁹Kambe yene ayangula aku: Nayala! Ntrhaku atilaya, afamba.

³⁰Aya ku lweyi wa vubiri, amubyelisa xiswoleswo; yene ayangula aku: Im'na, we hosi, nitaya. Kambe angayanga.

³¹Hi wini ku lava vabiri ayentxiki a kurandra ka tatana wakwe? Vamuyangula vaku: Hi lweyi wa kusungula. Kutani Yesu aku ku vone: Hikusa nihlayelamfuri nili ku n'wine: A vahlengisi ni vavasati va vumbuye vatan'wirangela kunhingena a Mfun'wini wa Xikwembu Nkulukumba.

³²Hikusa Yohana ati ku n'wine hi ndlela ya vululami, kambe an'wipfumelanga ku yene. Kambe a vahlengisi ni vavasati va vumbuye vapfumelile. N'wine kambe nambi leswi n'wiswivoniki, an'windrulukanga akuva n'wipfumela ku yene.

³³Yingelani xifaniso xin'wana: Afa kuni mhunu, wa n'winyi wa muti, afaka abyali livhinya; abiyela hi linhlampfu, akela ni khele dra kupfuvela mihandru, ava ayaka ni xihondro kone; abeka livhinya amandleni ya vadrimi, kutani ayendra.

³⁴Loko kutlhasi a nkama wa kukhaya mihandru, aruma malandra yake ku vadrimi akuva vayateka a mihandru yake.

³⁵A vadrimi vakhoma a malandra yake, vaba mun'we, vadlaya mumbeni, vakhandla mun'wana hi maribye.

³⁶A n'winyi atlhela aruma malandra man'wana, manyingi kutlula ya kusungula; vamayentxisa xiswoswo na wone.

³⁷A vugan'wini arumela a n'wanakwe, aku: vatavani xihluwa ku n'wananga!

³⁸Kambe a vadrimi loko vamuvona vabyelana vaku: Lweyi hi yene mudi-wa-pfindla! Ahimudlayeni, a pfindla drakwe dritava dreru.

³⁹Kutani vamukhoma, vamukokovisa vahuma na yene a handle ka livhinya, vamudlaya.

⁴⁰Loko ke a n'winyi wa livhinya abuya atayentxa yini hi vadrimi lavo, xana?

⁴¹Vaku ku Yene: Atasuvisa a vabihi lavo, vakubi! Atanyika livhinya ku van'wana vadrimi, lava vatakamunyika a mihandru hi nkama wa yone.

⁴² Kutani Yesu aku ku vone: Xana an'wingihlaya a Matralwa lawa maliki: A ribye ledri a vayaki vadridreliki, hi drone dringayentxiwa ribye ledri dra kusungula dra hoka. Swayentxiwi hi HOSI, na kone hi leswi swihlamalisaka amahlweni yeru!

⁴³Hileswo-ke nan'wibyela nili a Mfumu wa Xikwembu Nkulukumba wutasusiwa ku n'wine, wutanyikiwa a tiko ledri dritakabeka a mihandru leyi mifanelaka wone. [

⁴⁴Lweyi atakawela a henhla ka ribye ledro atapswhandlaka, lweyi dritakamuwela atandruluka ntrhuri.[46]]

⁴⁵Loko vaprista lava vakulu ni vafarisi vayingeli swifaniso swake, vativa leswaku afa ahlaya vone.

⁴⁶Kutani vadjula kumukhoma, kambe afa vatxhava switrhungu hi leswi vanyingi afaka vaku i muprofeta.