Read ronga Mt 22 Bible Online

Mt 22 - ronga bible

Mt 22

¹Kutani Yesu atlhela avayangula na akhanela hi swifaniso, aku:

²A Mfumu wa Matilo wufana ni mufumi lweyi angahamba a nkhuvu wa vukati bya n'wanake wa wandrisanyana.

³Aruma a malandra yake mayavitana lava avarambiki ankhubyini, kambe vayala kuta.

⁴Atlhela aruma man'wana malandra aku: Byelani a varambiwa leswaku nilulamisi swakuda swanga; A tihomu tanga ni swifuyo swakunona switlhabyiwile, hinkwaswu swilulamisiwile. Tanani ankhubyini.

⁵Vone kambe avahlayanga ntxhumu ha swone, vatisukela, mun'we aya nsin'wini yake, mun'wana aya amabindrwini yake,

⁶van'wana vakhoma a malandra vamaxanisa, vamadlaya.

⁷A mufumi ahlundruka ngopfu, aleleta mabutrhu yake kuyahelisa vadlayi lavo, ni kuhisa a muti wavu.

⁸Hikolahu abyela a malandra yake aku: A nkhuvu wubekisiwile, kambe a varambiwa afa wungavafanelanga.

⁹Ke, fambani amatlhanganweni ya tindlela, n'wivitanela ankhubyini hinkwavu lava n'witakavakuma.

¹⁰A malandra mafamba maya tindleleni, mayahlengeleta hinkwavu vhanu lava mavakumiki, lava vamfani ni lava vanene, a yindlu ya nkhuvu yitala hi varambiwa.

¹¹A mufumi atiki anhingena andlwini ya nkhuvu akuva avona a varambiwa, avona wanuna mun'we lweyi angayambalangakiki a xiyambalu xa nkhuvu.

¹²Aku ku yene: Nakulori, xana unhingenisi kuyini kola, na ungena xiyambalu xa nkhuvu? Lweyo amiyela.

¹³Kutani a mufumi abyela malandra aku: Trimbani minenge ni mavoko yake n'wimutxukumeta ahandle amunyameni, lomu kutakava ni swidrilo ni kuketrela ka menyo.

¹⁴Hikuva lava vavitaniwiki i vanyingi, kambe lava vahlawuliwiki i vatrongo.

¹⁵Kutani a vafarisi vafamba vayakhanela kun'we vatamuphasisa kuyini amaritwini.

¹⁶Vahangaruma ku yene a vadondrisiwa vavu, kun'we ni va-Heroda, vayaku: Mudondrisi, haswitiva leswaku uwa xihlayelamfuri, ni leswaku udondrisa a ndlela ya Xikwembu Nkulukumba hi xihlayelamfuri; ni leswaku awutxhavisiwi hi mhunu hikuva awulangusi vuso bya mhunu.

¹⁷Ke hibyele, uli yini hi leswi: Xana swapfumeleliwa a kuhumexela Khezari a tinemba, kumbe ahi swone, xana?

¹⁸Kambe Yesu ativiki miyanakanyu yavu ya kubiha, aku ku vone: Va mandrendre, hayini n'winidringa?

¹⁹Nikombani a mali ya tinemba. Vamunyiketa a Denari.

²⁰Yesu aku ku vone: Xana a xifaniso lexi ni vito ledri dritraliwiki i swa mani?

²¹Vone vayangula vaku I swa Khezari. Kutani Yesu avabyela aku: Ke nyikelani ku Khezari leswi swinga swa Khezari, ni ku Xikwembu Nkulukumba leswi swinga swa Xikwembu Nkulukumba.

²²Vatiki vayingela leswo, vahlamala ngopfu, kutani vamutrika vatifambela.

²³Hi siku droledro, a vasaduki vahlayaka leswaku akuna kupfuxiwa ka vafi, vaya ku yene, vamuvutisa vaku:

²⁴ Mudondrisi, Moxe ahibyeli leswaku loko a mhunu afa na angakumanga n'wana, a makwavu afanela kutekana ni mufelwa ava nkatakwe atapfuxela vana a makwavu lweyi afiki.

²⁵Ke, amakari kweru afa kuni ntlhanu na vabiri wa vamakwavu-na-makwavu. Lweyi wa nhondrwa ateka nsati ava afa. Hikuva angavangana vana, a mufeliwa asala atekiwa hi lweyi wa vubiri.

²⁶Swiva tanu ku lweyi wa vubiri, ntrhaku ni lweyi wa vuraru, kuko swiyatlhasa ku lweyi wa vuntlhanu na vubiri.

²⁷Ntrhaku, ni yelweyi wansati afa.

²⁸Xana-ke, akupfuxiweni ka vafi, atava nsati wa wini ku lavo va ntlhanu na vabiri, hikusa hinkwavu vatekani na yene?

²⁹Yesu avayangula aku: N'wilahlekile kunene, leswi n'wingativikiki Matralwa nambi wuli ntamu wa Xikwembu Nkulukumba.

³⁰Hikusa loko a vafi vatapfuka, vangahateki, vangahatekiwi; kambe vatava swanga hi tintrumi a Matilweni.

³¹Loko kuli hi kupfuxiwa ka vafi, xana an'wingihlaya leswi Xikwembu Nkulukumba an'wibyeliki aku:

³² Mine ni Xikwembu Nkulukumba wa Abrahamu, ni Xikwembu Nkulukumba wa Yisaki, ni Xikwembu Nkulukumba wa Yakobe? Hileswo-ke ahi Xikwembu Nkulukumba wa vafi, kambe wa lava vahanyaka.

³³Loko a switrhungu swiyingela leswo, swihlamala ngopfu hi dondro yake.

³⁴A vafarisi loko vativi leswaku amiyeti a vasaduki, vahlengeletani ku mbangu mun'we,

³⁵kutani mun'we ku vone, lweyi afaka ali mudondrisi wa Nawu, amuvutisa hi kumudringa aku:

³⁶Mudondrisi, xana hi drini a leleto ledri drikulu a Nawini?

³⁷ Aku ku yene: Utarandra HOSI Xikwembu Nkulukumba waku hi mbilu yaku hinkwayu, ni hi hika draku hinkwadru, ni hi kuyanakanya kwaku hinkwaku.

³⁸Ledri hi drone a leleto ledri drikulu ni dra kuranga.

³⁹ Ni dra vubiri, drifanaka na drone hi ledri: Utarandra a wa-le-kwenu swanga hi loko utirandra.

⁴⁰A swileleto leswi swibiri hi swone anga masungulu ya Nawu hinkwawu ni vaprofeta.

⁴¹Na vafarisi vahlengeletanile, Yesu avavutisi aku:

⁴²Xana n'wili yini ha Kriste xana? Xana i n'wa mani? Vaku ku Yene: I wa Davida!

⁴³Aku ku vone: Ke ha yini Davida hi kuhuhuteliwa hi Moya, amutxhula HOSI, aku:

⁴⁴ A HOSI yati ku HOSI yanga: Trhamisa axineneni xanga, nikondra nibeka a valala vaku a hansi ka minkondro yaku.

⁴⁵Loko-ke, Davida amutxhula HOSI, xana i n'wanakwe ha yini?

⁴⁶Akavanga kone ni mun'we lweyi angaswikota a kumuyangula ritu, na kone kusukela ku siku ledro akuvangani mun'we lweyi angatiya akuyentxa swivutiso.