Read ronga Mt 23 Bible Online

Mt 23 - ronga bible

Mt 23

¹Kutani Yesu akhanela ni switrhungu ni vadondrisiwa vakwe aku:

²A xitrhan'wini xa Moxe kutrhami a vatrali ni vafarisi.

³Hinkwaswu leswi van'wibyelaka swone swiyentxani, n'wiva n'wiswibekisa; kambe n'wingalandri a mintiro yavu, hikusa vahlaya kambe avayentxi.

⁴Vatrimbelela mintrhwalu ya kubindra leyi mingakotiwikiki kumirwala, vantlhanteka a makatleni ya vhanu, kasi vone avadjuli kumihlekahlekisa, nambi hi litiho.

⁵Hinkwaswu leswi vaswiyentxaka, vaswiyentxela akuva vatavoniwa hi vhanu. Hikusa vayanamisa tifilatera[47] tavu, valehisa ni makhaxa ya swiyambalu swavu.

⁶Varandra a vutrhamu bya xihluwa aminkhubyini, ni switrhamu swa le mahlweni amasinagogeni,

⁷ni kulosiwa atihubyini, ni kuhlayiwa hi vhanu: Rabbi (mudondrisi).

⁸Kambe n'wine n'wingadjuleni kutitxhula Rabbi, hikusa i mun'we ntsena a Mudondrisi wenu, n'wine hinkwenu n'wi vamakwavu-na-makwavu.

⁹Mfuri n'wingatxhuleni mhunu Tatana wenu laha misaveni, hikusa Tatana wenu i mun'we ntsena, lweyi wa le Matilweni.

¹⁰Nakone n'wingatxhulananeni varangeleni, hikusa a Murangeli wenu i mun'we ntsena, anga Kriste.

¹¹Kambe lwe nkulu ku n'wine atava mutireli wenu.

¹²Hikusa mani na mani lweyi atakatikulisa, atatrongahatiwa, kambe lweyi atakatitrongohata atakulisiwa.

¹³Kambe yowee, n'wine vatrali ni vafarisi va mandrendre! Hikusa n'wipfalela vhanu a Mfumu wa Matilo; na kone n'wine an'winhingeni, mfuri an'wivapfumeleli lava varandraka a kunhingena. [

¹⁴[48] Yowee, n'wine vatrali ni vafarisi va mandrendre! Hikuva n'wiphangaka a tiyindlu ta mafelwa, n'wititxhavelela hi kuhamba a swikhongoto swakuleha; hinkonta ya leswo n'witayamukela yavanyiso ledri drihundrisaka.]

¹⁵Yowee, n'wine vatrali ni vafarisi, vamandrendre! Hikusa n'witekisa n'wifamba hi misava ni lwandle akuva n'wikuma mupfumeli mun'we, kutani loko n'wimukumile, n'wimuhamba ava n'wana gehena ha kubiri kutlula n'wine.

¹⁶Yowee, n'wine varangeli vakufa-mahlu! N'wiliki: Loko a mhunu afunga hi Tempele, ahi ntxhumu; kambe loko afunga hi gole dra Tempele, atasindriseka a kulandra leswi aswifungiki.

¹⁷Masinge ni vakufa-mahlu! Xana hi xini lexi xinga xikulu? I gole kumbe i Tempele, leyi yiyentxaka leswaku a gole drihlawuleka?

¹⁸Nakone n'wili: Lweyi afungaka hi xiluvelo, leswo ahi swa ntxhumu; kambe lweyi afungaka hi mhamba leyi yinga xiluvelweni, atasindriseka a kulandra leswi aswifungiki!

¹⁹Swifamahlu! Xana lexi xinga xikulu hi xini ke? I mhamba, kumbe i xiluvelo, lexi xiyentxaka a mhamba yihlawuleka?

²⁰Hileswo-ke, lweyi afungaka hi xiluvelo, afunga ha xone ni hinkwaswu leswi swinga henhla ka xone.

²¹Nakone mfuri, lweyi afungaka hi Tempele, afunga ha yone, ni hi lweyi atrhamaka ku yone.

²²Na swone lweyi afungaka hi Tilo, afunga hi xitrhamu xa Xikwembu Nkulukumba ni lweyi atrhamaka ku xone.

²³Yowee, n'wine vatrali ni vafarisi va mandrendre! Hikusa n'wihlenga hi kupumba swa vukhume bya swimbowana ni bya swimilwa swin'wana, kasi n'witriki leswi swinga nsinya wa Nawu, byinga vululami, ni vumbilu ni kupfumela. Afa swidjuleka leswaku n'wiyentxa leswi, n'wingatriki leswiya.

²⁴Vafambisi vakufa-mahlu, n'wihluta a nsuna, kasi n'wimita a kamela!

²⁵Yowee, n'wine vatrali ni vafarisi va mandrendre! N'winhlampswa a handle ka ntrheko ni mbenga, kasi andreni kutali hi vuyivi ni nxambya.

²⁶Mufarisi wa kufa-mahlu! Nhlampswa kusungula andreni ka ntrheko ni mbenga, akuva na kone a handle kutabasa.

²⁷Yowee, n'wine vatrali ni vafarisi va mandrendre! Hikusa n'wifana ni maxira lawa matotiwiki hi mhemba hi le handle, mavoneka maxongi ngopfu[49], kambe andreni matali hi marambu ya vafi ni tinxaka hinkwatu ta nxambya.

²⁸Hi swoswo na n'wine, hi le handle ingi n'wi vhanu vanene, kasi andreni n'witali hi mandrendre ni vusomboloki.

²⁹Yowee, n'wine vatrali ni vafarisi va mandrendre! Hikusa n'wiyakaka a maxira ya vaprofeta, n'wiva n'wixongisa a maxira ya valulami,

³⁰kutani n'wiku: Loko afa havi kone a minkameni ya vatatana veru, ana hingatlhangananga navu a kuhalateni ka ngati ya vaprofeta.

³¹Hi swoswo n'witiyisa ha swenu leswaku n'wi vana va lava vadlayiki vaprofeta.

³²Tatisane-ke a mpimu wa vatatana venu.

³³Tinyoka! Lixaka dra swipswhahla! Xana n'witahulukisa kuyini akuyavanyiseliweni ka gehena?

³⁴Hileswo-ke nitan'wirumela a vaprofeta, tintlhari ni vatrali; kambe van'we vavu n'witavadlaya n'wiva n'wivavamba, van'wana n'witavaba amasinagogeni yenu, n'witavahlongolisa kusukela ku muti mun'we kuyatlhasa ku mun'wana.

³⁵Akuva ngati hinkwayu ya kululama hitawela henhla kwenu, leyi yingahalatiwa amisaveni, kusungula hi ngati ya Abele, mululami, kuyatlhasa ku Zakariya, n'wana Barakia[50], lweyi n'wingamudlaya amakari ka vuhlawuleko ni xiluvelo.

³⁶Nihlayelamfuri nili ku n'wine: Hinkwaswu leswo switata henhla ka lixaka ledri!

³⁷Yerusalema, Yerusalema, udlayaka a vaprofeta uva ukhandlatela hi maribye a varumiwa ku wene! Ha kangani nirandriki kuhlengeleta a vana vaku swanga hi huku leyi yihlengeletaka a switxuwana ahansi ka timpapa! Kambe wene awuswidjulanga!

³⁸Vonani, a yindlu yenu yisala drili rumbi.

³⁹Hikusa nan'wibyela nili: N'wingaka n'wingahanivoni kukondra n'wiku: Akukhensiwe lweyi ataka hi vito dra HOSI.