Read ronga Mt 25 Bible Online

Mt 25 - ronga bible

Mt 25

¹A Mfumu wa Matilo wungafanisiwa ni vanhwanyana lava va khume, vangateka a mimotre yavu vahuma, vayatlhangaveta a mulovoli.

²Lava va ntlhanu, ku vone afa ali masinge; kambe van'wana va ntlhanu afa ali tintlhari.

³Hikusa lava va masinge, vateki mimotre yavu, kambe avatekanga a mafura;

⁴kasi lava vakutlhariha vateki a mimotre kun'we ni mafura hi swihlambetwana.

⁵Leswi a mulovoli afaka ahlwela, a vanhwanyana hinkwavu vakhomiwa hi vurongo vakhutriyela.

⁶Amakari ka vusiku kutwala a ritu dribandlukana driku: Vonani a mulovoli awata! Fambani n'wiyamutlhangaveta.

⁷A vanhwanyana hinkwavu vahangapfuka, vasungula a kubekisa a mimotre yavu.

⁸Kutani lava va masinge vaku ku lava vakutlhariha: Hipumbelani a mafura yenu hikusa a mimotre yeru yatimeka.

⁹Kambe lava va kutlhariha vayangula vaku: Im'hi; hikusa mangatxhuka mangahiyaneli hine na n'wine. Swayapswa n'wiyatixavela lomu vaxavisaka kone.

¹⁰Vatiki vafambile vayatixavela a mafura, a mulovoli atlhasa, kutani lava afaka vatibekiselile vanhingena na yene andlwini ya nkhuvu, kutani a nyangwa yipfaliwa.

¹¹Antrhaku kutlhasa van'wana vanhwanyana vaku: hosi, hosi, hipfuleli!

¹²Kambe a mulovoli avayangula aku: Nihlayelamfuri nili ku n'wine, anin'witivi.

¹³Hileswo-ke hitekani, hikusa an'witivi a siku ni nkama.

¹⁴[52] Hikusa leswi swifana ni mhunu lweyi atilulamiseliki kuyendra, avitana a vatiri vakwe avanyika a kubekisa vukosi byake.

¹⁵A mun'we ku vone amunyika ntlhanu wa matalanta, a mun'wana amunyika mabiri, a mun'wanyana amunyika drin'we; mun'wana-ni-mun'wana mayelano ni ntamu wakwe, ahanga suka ayendra.

¹⁶Lweyi ayamukeliki ntlhanu wa matalanta, afamba, ayatira ha wone abindrula man'wana ya ntlhanu.

¹⁷Na yene lweyi ayamukeliki mabiri ayayentxisa xiswoswo, abindrula man'wana mabiri.

¹⁸Kambe lweyi ayamukeliki drin'we, efamba ayakela misava, ayimbela a vukosi bya hosi yake.

¹⁹Loko kuhundri a nkama wunyingi, a hosi ya vatiri lavo yibuya, yikamba a mintiro yavu.

²⁰Atrhindrekeliki lweyi afaka ayamukeli ntlhanu wa matalanta abuyisa ni man'wana ya ntlhanu aku: We hosi, waninyiki ntlhanu wa matalanta; langusa man'wana ya ntlhanu lawa nimabindruliki.

²¹A hosi yake yiku ku yene: I swa hombe, mutiri lweyi munene, wa kudumbeka. Leswi udumbekiki atimhakeni leti titrongo, nitakubeka ahenhla ka leti tinyingi. Nhingena akutrhaveni ka hosi yaku.

²²Kutrhindrekela ni lweyi afaka ayamukeli matalanta mabiri, aku: We hosi, waninyiki matalanta mabiri, langusa man'wana mabiri, lawa nimabindruliki.

²³A hosi yake yiku ku yene: I swa hombe mutiri lweyi munene wa kudumbeka. Leswi udumbekiki atimhakeni leti titrongo, nitakubeka ahenhla ka leti tinyingi. Nhingena akutrhaveni ka hosi yaku!

²⁴Atrhindrekela na yene lweyi afaka yamukeli talanta drin'we aku ku hosi yake: We hosi, nakutivile leswaku u mhunu wa kunonon'hwa, utrhovelaka lomu ungabyalangakiki kone, uhlengeletaka lomu ungatrutruxikiki kone;

²⁵hikutxhava, niyifihla a talanta draku amisaveni. Vona, hi ledri, drehe draku.

²⁶Kambe a hosi yake yimuyangula yiku ku yene: Mutiri lweyi mfani wa kulolohwa. Afa uswitiva leswaku nitrhovela lomu ningabyalangakiki kone, niva nihlengeleta lomu ningahlwanyangakiki kone.

²⁷Afa ufaneli kubeka a mali yanga amandleni ya vabindrulisi va timali, leswaku akubuyeni kwanga nitayamukela leswi swinga swanga kun'we ni bindru dra swone.

²⁸Hileswo-ke, susani talanta amandleni yake, n'winyika lweyi angani khume dra matalanta.

²⁹Hikusa lweyi anganaswu, atanyikiwa swinyingi, kambe lweyi angekena ntxhumu, ni leswi switrongo anganaswu atatekeliwa.

³⁰Loko ali mutiri lweyo wa kuka angapfuni ntxhumu, mutxukumetani ahandle amunyameni, lomu kutakavani kudrila ni kuketrela ka menyo.

³¹Kambe kutaku loko a N'wana wa Mhunu ata vumenyemenyeni byake, kun'we ni tintrumi hinkwatu, atatrhamisa a xitrhan'wini xa vumenyemenye byake.

³²Kutani a matiko hinkwawu matahlengeletiwa amahlweni kwake; atatravuxa van'we ku van'wana, swanga hi loko mubyisi atravuxa tihamba atimbutini.

³³Atabeka a tihamba axineneni ni timbuti aximantrhini.

³⁴A HOSI yitabyela lava vanga xineneni xa yone: Tanani n'wine n'wikhensiwaka hi Tatana wanga; danani pfindla dra vuhosi lebyi n'wingabekiseliwa byone a misava mingasina tumbuluka.

³⁵Hikusa navini ndlala, n'wininyika nida; navini tora, n'wininyika ninwa; afa nili muyeni, n'winirurelile.

³⁶Afa ningayambalanga ntxhumu, n'waniyambexile; afa nivabya n'wati n'watanikamba; afa nili kubohiweni, n'wita ku mine.

³⁷Kolahu a valulami vatamuyangula vaku: We HOSI, xana hakuvoni drini na unindlala, hi kuphamela, kumbe na uni tora hi kunyika unwa?

³⁸Hakuvoni drini na uli muyeni hikururela, kumbe ungayambalanga ntxhumu hikuyambexa?

³⁹Hakuvoni drini na uvabya kumbe uli kubohiweni, hita ku wene?

⁴⁰Kambe a HOSI yitavayangula yiku ku vone: Nihlayelamfuri nili ku n'wine: Loko n'wiswiyentxi ku mun'we amakari ka vamakweru lava vatrongo, lava, n'wiswiyentxi ku mine.

⁴¹Kutani a HOSI yitabyela lava vanga ximantrhini yiku: Sukani ku mine, n'wine lava varuketeliwiki; fambani n'wiya ndrilweni lowu wungatimekikiki, lowu wubekiseliwiki Diyavulosi ni tintrumi takwe.

⁴²Hikusa navini ndlala, n'winganinyiki nida, navini tora n'winganinyiki ninwa;

⁴³afa nili muyeni, an'wanirurelanga, afa ningayambalanga ntxhumu an'waniyambexanga; afa nivabya, afa nili kubohiweni, an'wanikambanga.

⁴⁴Kutani na vone vatayangula vaku ku yene: We HOSI, xana hakuvoni drini na unindlala, kumbe unitora, kumbe uli muyeni, kumbe ungayambalanga ntxhumu, kumbe uvabya, kumbe uli kubohiweni hiyala kukutirela?

⁴⁵Kutani yitavayangula yiku: Nihlayelamfuri nili ku n'wine: loko n'wingaswiyentxanga ku mun'we wa lava vatrongo, lava, an'wiswiyentxanga ku mine.

⁴⁶Volavo vataya akuxanisiweni loku kungahelikiki, kasi a valulami vataya avutomini lebyi byingahelikikiki.