Read ronga Mt 26 Bible Online

Mt 26 - ronga bible

Mt 26

¹Kuti loko Yesu aheti kuhlaya a maritu lowo, abyela vadondrisiwa vakwe aku:

²N'waswitiva leswaku ntrhaku ka masiku mabiri a Paska dritava kone, kutani a N'wana wa Mhunu atanyiketiwa akuva avambiwa.

³Ankameni lowo a vaprista lava vakulu ni vakulu va tiko vahlengeletana hubyini ya muprista lwenkulu, Kayafasi;

⁴vabekisa makungu ya kukhoma Yesu hi marengu akuva vamudlaya.

⁵Kambe afa vaku: Kungavi ankameni wa nkhuvu, akuva swingatipfuxa a dzolonga amakari ka tiko.

⁶Kuti loko Yesu ali Betaniya; andlwini ya Simoni lweyi wa nhlokonho;

⁷kutrhindrekela a wansati lweyi afaka atameli a nhlambeto ya mafura ya kunun'hwela, ya lisima drikulu ngopfu, amatxhela a anhlokweni yake, na atrhami atafuleni.

⁸A vadondrisiwa loko vaswivona, vahlundruka ngopfu vaku swipfuna yini akuhalata a mafura lawa?

⁹Afa mataxavisiwa hi mali yinyingi, kutani a mali leyo yitanyikiwa swisiwana.

¹⁰Yesu aswitiviki, aku ku vone: Xana n'wimukaratela yini lweyi wansati? Ayentxi ntiro lowu wunene ku mine.

¹¹Loko swi swisiwana n'witavanaswu amakari kwenu hinkwawu nkama, kambe mine, n'wingativana mine hinkwawu nkama.

¹²Leswi lweyi wansati atxheliki mafura lawa amirini yanga, aswiyentxeli kulahliwa kwanga.

¹³Nihlayelamfuri nili ku n'wine: Amisaveni hinkwayu, lomu a Ivangeli matakareriwa kone, leswi aswiyentxiki, na swone switahlayiwa, akuva adrimukiwa ha swone.

¹⁴Kutani Yudasi Isikariyota mun'we wa vadondrisiwa lava va khume na vabiri, aya ku vaprista lava vakulu, aku ku vone:

¹⁵Xana n'witaninyika yini, loko nin'winyiketa Yene?[53] Vone vamunyika a makume mararu ya timali ta silivhela.

¹⁶Akusukela kolahu asungula kudjula a nkama wunene wa kuvanyiketa Yene.

¹⁷Hi siku dra kusungula dra nkhuvu wa makati lawa mangekena handrelo, a vadondrisiwa vatrhindrekeli ku Yesu vaku: U randra leswaku hi kubekisela kwini a xilalelo xa Paska?

¹⁸Yene aku ku vone: Fambani amutini, a kaya ka manyana, n'wiyaku ku yene: A Mudondrisi ali: A nkama wanga wu kusuhi! Nitada a Paska a kaya kwaku, kun'we ni vadondrisiwa vanga.

¹⁹A vadondrisiwa vayentxa swanga hi leswi Yesu afaka avaleletisi xiswone, vabekisa a Paska.

²⁰Loko dripela, atrhama atafuleni kun'we ni vadondrisiwa lava va khume na vabiri,

²¹vaku na vada, aku ku vone: Nihlayelamfuri nili ku n'wine: Mun'we ku n'wine ataniwonga.

²²Vone vavaviseka ngopfu, vasungula a kumuvutisa ha mun'we ha mun'we, vaku: Xana atava mine, we HOSI?

²³Yene ayangula aku: Mun'we ku n'wine lweyi apetaka voko ambengeni kun'we na mine, hi yene lweyi ataniwonga.

²⁴A N'wana wa Mhunu awafamba swanga hi leswi kutraliwiki ha yene; kambe yowee lweyi a mhunu lweyi a N'wana wa Mhunu awongiwaka hi yene! Afa swi swahombe ku mhunu lweyo, loko afa angabelekiwanga.

²⁵Kutani Yudasi lweyi afaka amuwonga, avutisa aku: Mudondrisi, xana angava mine? Yesu, amuyangula aku: Uhlaya swone.

²⁶Vaku na vahada, Yesu ateka a kati adrikatekisa, akhemelela, anyika vadondrisiwa, aku ku vone: Tekani n'wida, leyi i miri yanga.

²⁷Kutani ateka ntrheko, atlhangela, avanyika aku: N'wanani ha wone hinkwenu,

²⁸hikusa leswi i ngati yanga, ya xipfumelelanu ximpswha, leyi yihalateleliwaka lava vanyingi a kudrivaleliweni ka swidoho.

²⁹Nan'wibyela leswaku kusukela swoswi, ningahanwi mihandru ya nvhinya, kukondra kutlhasa a siku ledri nitakanwa swone na n'wine, na swi swimpswha a Mfun'wini wa Tatana wanga.

³⁰Kuti loko vayimbeleli lisimu, vaya anhaveni ya Minhlwari.

³¹ Kutani Yesu aku ku vone: Hi vusiku lebyi hinkwenu n'witakhunguvanyeka ha mine, hikuva a Matralwa mahlaya swoswo: Nitaba mubyisi, a tihamba titahangalaka.

³²Kambe loko nitava nipfukile kufeni, nitan'wirangela Galileya.

³³Kambe Petrosi aku ku yene: Nambi loko hinkwavu vatakhunguvanyeka ha wene, mine ningatikutrika.

³⁴Yesu aku ku yene: Nihaleyelamfuri nili ku wene: Hi vusiku byolebyi, a nkuku wungasinayimba utava unilandruli kuraru.

³⁵Petrosi aku ku yene: Nambi swingafanela kufa na wene, ningaka ningakulandruli. Hinkwavu a vadondrisiwa vahlaya swoleswo.

³⁶Kutani Yesu afamba ni vadondrisiwa, ambangwini lowu valiki i Getsemani, aku ku vone: Trhamisani kola, nahaya lahaya niyakhongota.

³⁷Atekiki Petrosi ni vana vabiri va Zebedeya, asungula kuvaviseka ni kukamiwa-ka-mbilu.

³⁸A moya wanga wuvaviseka hi kutlulisa, swanga hi kufa. Salani kola n'wilavelela na mine.

³⁹Kutani aya kulenyana, awa a hansi hi liso, akhongota aku: Tatana wanga, loko swikoteka, a ntrheko lowu awuhundre kule na mine; kambe kungayentxiwe a kurandra kwanga, akuyentxiwe a kurandra kwaku.

⁴⁰Atlhelela ku vadondrisiwa, avakuma na vakhutriyela. Kutani aku ku Petrosi: Hi leswaku an'wikumanga ntamu wa kulavelela hi xipimu xa nkama mun'we (1 hora) na mine?

⁴¹Hitekani n'wikhongota, n'wingatinhingena andringweni, hikuva a moya wone wapfumela, kambe a miri mini gome.

⁴²Asukiki ka vubiri aya khongota aku: Tatana wanga, loko swingakoteki akuva a ntrheko lowu wuhundra ningawunwanga, akuyentxeke a kurandra kwaku.

⁴³Atlhela abuyela kambe ku vadondrisiwa, avakuma na vakhutriyela, hikusa a mahlu yavu afa mabindriwa hi vurongo.

⁴⁴Avatrikiki, asuka kambe ayakhongota ka vuraru, atlhela ahlaya wo maritu wolawo.

⁴⁵Kutani atlhelela ku vadondrisiwa aku ku vone: N'wahayetlela ni swoswi, n'wiwisa! Vonani, wutlhasile a nkama lowu a N'wana wa Mhunu atakanyiketiwa amavokweni ya vadohi.

⁴⁶Pfukani, hambani hifamba; lweyi aniwongaka atlhasile.

⁴⁷Aku na ahavulavula, Yudasi mun'we wa lava va khume na vabiri, atlhasa na ali ni xitrhungu lexi xikulu, na xitameli tinhonga ni timpanga; xipfa hi le ku vaprista lava vakulu ni vakulu va tiko.

⁴⁸A muwongi afa avanyiki a xikombiso, aku: Lweyi nitaka munyunta hi yene; mukhomani.

⁴⁹Ahangahatla atrhindrekela Yesu, aku ku yene: Xawani, Rabbi! Kutani amunyunta.

⁵⁰Yesu aku ku yene: Nakulori, uhalenu ha yini? Kolahu a van'wana vatrhindrekela, vayisa mavoko henhla ka Yesu vamukhoma[54]

⁵¹Kutani mun'we wa lava afaka vali na Yesu, ahlomula lipanga avavisa a nandra wa muprista lwenkulu, amutrema ndleve.

⁵²Kambe Yesu aku ku yene: Tlhelisela lipanga draku ambangwini wa drone. Hikusa hinkwavu lava vatirisaka a lipanga, na vone vatadlawa hi lipanga.

⁵³Xana upimisa leswaku nihluleka kukombela ku Tatana wanga, aninyika swoswi-swoswi kutlula khume dra mabutrhu na mabiri ya tintrumi?

⁵⁴Xana afa matahetisekisa kuyini a Matralwa lawa mahlayaka leswaku swifanekeli swihumelelisa xiswoswo?

⁵⁵Ankameni wolowo Yesu abyela a switrhungu aku: N'wihumi ni timpanga ni tinhonga akutata nikhoma, swanga ni xiyivi? Afa nidondrisa masiku hinkwawu andlwini ya HOSI, kambe an'wanikhomanga.

⁵⁶Kambe hinkwaswu swihumeleli akuva a Matralwa ya vaprofeta mahetiseka. Kutani a vadondrisiwa hinkwavu vamusiya vatrutruma.

⁵⁷Lava vakhomiki Yesu vamuyisi andlwini ya Kayafasi, muprista lwenkulu, lomu a vatrali ni vakulu va tiko afaka vahlengeletani kone.

⁵⁸Kambe Petrosi afa amulandra hi le kule ako ayatlhasa alinxonxeni dra yindlu ya muprista lwenkulu. Kutani anhingena atrhamisa kun'we ni malandra atavona a mahelela ya swone.

⁵⁹Kutani a vaprista lava vakulu ni Huvu hinkwayu afa vadjula a vumboni bya madrimi bya kurambela Yesu, akuva vatakota a kumudlaya.

⁶⁰Kambe avabyikumanga, nambi kuhumeleli a timboni tinyingi ta madrimi. Avugan'wini kuhumelela timboni tin'wana tibiri,

⁶¹leti tihlayiki leswaku: A mhunu lweyi ati: Naswikota a kubutrhuta a Tempele, nitlhela niyiyaka hi masiku mararu.

⁶²Kutani a muprista lwenkulu asekeleka amuvutisa aku ku Yene: Xana awuyanguli ntxhumu? Xana hi swini leswi lava vakurambelaka ha swone?

⁶³Kambe Yesu amiyela. Kutani a muprista lwenkulu aku ku yene: Nikufungisa hi vito dra Xikwembu Nkulukumba lweyi ahanyaka, leswaku uhibyela loko ali wene Kriste N'wana wa Xikwembu Nkulukumba!

⁶⁴Yesu ayangula aku ku yene: Uhlayi swone. Mfuri nan'wibyela leswaku, kusukela swoswi, n'witavona a N'wana wa Mhunu atrhami xineneni xa ntamu wa Xikwembu Nkulukumba, ata henhla ka matlavi ya tilo.

⁶⁵Hi kuyingela leswo a muprista lwenkulu ahandrula swiyambalu swake, aku: Asandrile! Hahadjulela yini a vumboni? N'wahakumuyingela swoswi loko asandra.

⁶⁶Xana n'wili yini ha swone? Vayangula vaku: Afaneliwa hi lifu.

⁶⁷Kutani vamuntsekela mari alisweni na vamuyamasa, van'wana vamuba,

⁶⁸na vaku: We Kriste, hipfhumbeli leswaku i mani lweyi akubiki!

⁶⁹Kambe Petrosi afa atrhami handle, alinxonxeni. Kutani mun'we wansati wanandra amutrhindrekelela aku ku yene: Na wene afa una Yesu, mu-Galileya!

⁷⁰Kambe alandrula amahlweni ka hinkwavu aku: Aniswitivi leswi uswihlayaka.

⁷¹Aku adjula kuhuma hi nyangwa, a mun'wana wansati wa nandra, amuvona abyela lava afaka vali kone aku: Lweyi afa ena Yesu, mu-Nazarete.

⁷²Atlhela alandrula hi kufunga aku! Animutivi a mhunu lweyo!

⁷³Ku hundriki nkamanyana, lava afaka vatrhami kone vatrhindrekela, vaku ku Petrosi: kunene, na wene u wavu. Hikusa na wone makhanelela yaku makukombisa.

⁷⁴Ahangasungula kuruka, ava afunga aku: Animutivi a mhunu lweyo. Kutani hi nkama wolowo, a nkuku wuyimba.

⁷⁵Petrosi ahangadrimuka a maritu ya Yesu lawa afaka amubyeli: Na nkuku wungasiyimba, utava unilandruli kuraru. Kutani ahuma handle, ayadrila hi xiviti.