Read ronga Mt 27 Bible Online

Mt 27 - ronga bible

Mt 27

¹Loko byixile, hinkwavu vaprista lava vakulu ni vakulu va tiko vakhanela makungu ya kudlaya Yesu.

²Kutani vamuboha, vayamunyiketa ku Pilatu, mufuminyana.

³Yudasi, lweyi amuwongiki, loko avoni leswaku Yesu ayavanyisiwile, andruluka, atlhelisela mali ya silivhela ya makume mararu ku vaprista lava vakulu ni vakulu va tiko;

⁴aku ku vone: Nihonile, niwongiki angati leyi yingekena nandru. Vone vayangula vaku: Swina yini ku hine, i mhaka yaku.

⁵Yene-ke, atiki atxukumeta a mali aNdlwini ya HOSI, asuka ayatisunga.

⁶A vaprista lava vakulu vateka a mali, vaku: Swayila a kunhingenisa a mali leyi anhlengweni hi leswi dringa hakelo dra ngati.

⁷Loko vakhanelile, vaxava ha yone a nsimu ya muvumbi, akuva wuva ntimu wa va-Matiko.

⁸Hi leswo a nsimu leyo yitxhuliwi Nsimu ya Ngati, kutlhasa namuhla.

⁹Hi nkama lowo, kuhetiseka leswi swingahlayiwa hi muprofeta Yeremiya[55] lweyi angaku: Vateki a mali ya silivhela ya makume mararu, dringa hakelo dra lweyi apimanisiwiki, lweyi a vana va Israyele vamupimanisiki,

¹⁰vahumexi yone akuxava nsimu ya muvumbi, swanga hi leswi a HOSI yinileletiki swone.

¹¹Yesu afa ayimi amahlweni ka mufuminyana, lweyi amuvutisiki aku: Xana wene u HOSI ya va-Yuda, xana? Yesu ayangula aku: Uhlaya swone.

¹²Kambe loko a vaprista lava vakulu ni vakulu va tiko vamurambela, angayangulanga ntxhumu.

¹³Kutani Pilatu aku ku yene: Xana awuswiyingeli leswi lava vakurambelaka ha swone?

¹⁴Kambe amiyela angayanguli ritu ni drin'we, lakakuva a mufuminyana ahlamala ngopfu.

¹⁵Hi masiku ya nkhuvu a mufuminyana afa atolovela a kuntrhunxa mun'we wa vabohiwa lweyi ahlawuliwaka hi xitrhungu.

¹⁶Kolahu-ke afa kuni mubohiwa mun'we lweyi wa kutibyiwa ngopfu lweyi a vito drakwe afaka vaku i Barabasi.

¹⁷Kutani Pilatu avutisa lava vahlengeletaniki aku: Xana n'widjula leswaku nin'wintrhunxela mani? Barabasi kumbe Yesu lweyi ahlayiwaka Kriste?

¹⁸Hikusa afa aswitiva leswaku vamunyiketi yene hi matrhoho.

¹⁹Kuti loko atrhamisi ahubyeni, a nsati wakwe arumela a ritu aku ku yene: Kungatxhuke kuvani ntxhumu amakari kwaku ni mululami lweyo, hikusa nixaniseki ngopfu namuhla, anorweni, hinkonta yake.

²⁰Kambe vaprista lava vakulu ni vakulu va tiko vakholwisa a switrhungu akuva swikombela Barabasi, Yesu yene adlayiwa.

²¹A mufuminyana atlhela avavutisa aku: Hi mani ku lava vabiri n'widjulaka akuva nin'wuntrhunxela yene xana? Vone vaku Barabasi.

²²Pilatu avavutisa aku: Nitayentxa yini ha Yesu lweyi valiki i Kriste? Hinkwavu vaku: Avambiwe.

²³A mufuminyana aku ku vone: Xana ayentxi xihono xini? Kambe vatshima kubandlukana vaku: Avambiwe.

²⁴Pilatu loko avona leswaku angakoti ntxhumu, ni leswi a pongwe, driyaka mahlweni, ateka mati ahlamba mandla amahlweni ka xitrhungu aku: Ningavena nandru angatini ya mululami lweyi; swivonani n'wine.

²⁵A vhanu hinkwavu vaku: A ngati yake ayiwele ahenhla kweru ni vana veru.

²⁶Kolahu Pilatu avantrhunxela Barabasi, antrhaku ka loko Yesu apswhitiwile, avanyiketa yene akuva avambiwa.

²⁷A masotxha ya mufuminyana mateki Yesu mamuyisa andlwini ya vufumi, vamuhlengeletela a butrhu hinkwadru;

²⁸ kutani vamususa a swiyambalu swake, vamuyambexa a kapulana dra libungu;

²⁹maluka a hari ya mitwa mayitlhanteka anhlokweni yake, mamutamelisa ni lihlanga avokweni dra xinene; mamukhisamela, mamutreketrela maku: Xawani HOSI ya va-Yuda;

³⁰mamuthukela mari, mateka a lihlanga mamuba a nhloko yake.

³¹Antrhaku ka loko mamutreketrelile, masusa a kapulana ledri dra libungu matlhela mamuyambexa a swiyambalu swake, mamufambisa akuva maya muvamba.

³²Loko vahuma, vakuma a wanuna lweyi valiki i Simoni wa le Kirene, lweyi vamusindrisiki a kubyatrha a xihambanu xa Yesu.

³³Loko vatlhasi ambangwini lowu valiki i Gologota[56], hileswaku mbangu wa Pala,

³⁴vamunyika a vhinyo ledri dripatriwiki ni nyongwa[57] akuva anwa, kambe loko adringile angarandranga kunwa.

³⁵Loko vatava vamuvambile, vayavelana a swiyambalu swake hi kuhamba mpswhampswha.

³⁶Kutani vatrhamisa kone vamulavelela.

³⁷Hile henhla ka nhloko ya Yesu vagongondrela a tralwa ledri drihlayaka a mhaka leyi afaka vamurambela ha yone: LWEYI HI YESU HOSI YA VA-YUDA.

³⁸Kun'we na yene kuvambiwi vayivi vabiri, mun'we axineneni mun'wana aximantrhini.

³⁹Lava afaka vahundra kolano afa vamuruketela vamuhlakahlela tinhloko,

⁴⁰vaku: Mubutrhuti wa Tempele ni muyaki wa drone ha masiku mararu! Tihuluxe! Loko uli N'wana wa Xikwembu Nkulukumba, xika Xihambanwini.

⁴¹Na vone a vaprista lava vakulu kun'we ni vadondrisi va Nawu ni vakulu va tiko afa vamutreketrelisa xiswoswo vaku:

⁴²Ahanyisi van'wana, yene ahluleka a kutihanyisa. Loko ali HOSI ya Israyele, axike swoswi xihambanwini hita pfumela ku yene.

⁴³Adumbi Xikwembu Nkulukumba, amuhuluxi swoswi, loko amurandra; hikusa ati: Ni N'wana wa Xikwembu Nkulukumba!

⁴⁴Na vone vayivi lava vavambiwiki kun'we naye, afa vamusandra hi maritu wolawo.

⁴⁵Akusukela ku nkama wa ntlhanu na mun'we, kuyatlhasa ku wa ntlhanu na mune, kavi ni munyama amisaveni hinkwayu.

⁴⁶ Hi nkama wolowo Yesu abandlukana hi ntamu aku: Eli, Eli, lama sabaktani, hileswaku: Xikwembu Nkulukumba wanga, Xikwembu Nkulukumba wanga, xana unitrikeli yini?

⁴⁷Van'we amakari ka lava afaka vali kone, loko vamuyingela ahlaya leswo, vaku: Avitana Eliya.

⁴⁸Kutani mun'we ku vone atrutruma ayateka xiponji axitata hi nhlowa, axitlhoma lihlangeni atrhindrekela amunyika.

⁴⁹Kambe a van'wana afa vaku: Trikani, hita vona loko kumbe Eliya ata muhuluxa.

⁵⁰Kutani Yesu kambe atlhela ayengesa abandlukana hi ntamu, anyiketa a moya wakwe, afa.

⁵¹Hi nkama wolowo, a kapulana dra Tempele drihandruka hi le makari, kusukela henhla kuyatlhasa a hansi. A misava mitrekatreka, a maribye mapandreka.

⁵²A maxira mapfuleka, ni miri ya vunyingi bya vahlawuleki lava afaka vayetlelile, mipfuxiwa.

⁵³Kolahu antrhaku kakupfuka ka Yesu akufeni vanhingena a mutini lowu wa kuhlawuleka, Yerusalema lomu vavoniwiki hi lava vanyingi.

⁵⁴A ndruna ya dzana (100) dra mabutrhu ni mabutrhu lawa afaka malavelela Yesu, loko vavona kutrekatreka ka misava, ni leswi swihumeleliki, vatxhava ngopfu vaku: Ha kunene, lweyi afa ali N'wana wa Xikwembu Nkulukumba.

⁵⁵Nakone afa kuni vavasati lava vanyingi, valavisa hi le kule, lava afaka valandri Yesu ni kumupfuna kusukela a Galileya.

⁵⁶Amakari kwavu afa kuna Maria Magdala, na Maria mamana wa Yakobe na Yosefa ni mamana wa vana va Zebedeya.

⁵⁷Dritiki drapela, kuta a mhunu wa xipfundri, wa le Arimateya, a vito drakwe i Yosefa, na yene aviki mudondrisiwa wa Yesu.

⁵⁸Yelweyiyo aya ku Pilatu, akombela a miri wa Yesu. Pilatu aleleta leswaku anyikiwa.

⁵⁹Kutani Yosefa ahangateka a miri amintrondriyela hi kapulana dra ntlhohe,

⁶⁰ayamibeka axireni drakwe ledri drimpswha, ledri afaka akeli ribyeni; apfingula a ribye ledri drikulu apfala a nyangwa ya xira, kutani atifambela.

⁶¹Kambe Maria wa le Magdala na Maria mun'wana afa vatrhamisi kone, amahlweni ka xira.

⁶²A siku ledri drintlhantamaka, dringa ledri drilandraka dra kutibekisela, a vaprista lava vakulu ni vafarisi vahlengeletana ku Pilatu,

⁶³vaku: N'winyi weru, hahadrimuka leswaku a mukanganyisi lwiya, loko ahahanya ati: Nitapfuka akufeni loko kuhundri masiku mararu.

⁶⁴Hileswo-ke, leleta leswaku a xira drilaveleleliwa swinene kutlhasa ku siku dra vuraru. Hikusa a vadondrisiwa vakwe vangatxhuka vamuyiva, kutani vaku ku tiko: Apfuki kufeni. Kutani a madrimi lawa ya vugamu matatlula a ya kusungula.

⁶⁵Pilatu aku ku vone: N'wini vulaveleli, fambani n'wiyalavelela hi laha n'witivaka ha kone.

⁶⁶Kutani vafamba vayalavelela xira, vabeka ni mfungo ahenhla ka ribye kun'we ni valaveleli.