Read ronga Mt 3 Bible Online

Mt 3 - ronga bible

Mt 3

¹Ankameni wolowo, kahumeleli Yohana Mubabatisi ahuleni dra Yudeya afaka arera aku:

²Ndrulukani, hikusa a Mfumu wa Matilo wukusuhi!

³Yohana avi lweyi Xikwembu Nkulukumba angamuhlaya hikola ka muprofeta Ezaya loko ati: Ritu dra lweyi a bandlukana ahuleni driku: Bekisani gudju dra HOSI; n'wihamba tindlela takwe tilulama[7]

⁴A swiyambalo swa Yohana afa swihambiwi hi voya bya kamela, ni bandi dra nhlonge alikhalwini; a swakuda swake afa yili humbi[8] ni vulombe bya nhova.

⁵Kutani va-le-Yerusalema ni va-le-Yudeya hinkwavu ni va tiko hinkwadru ledri dringa kusuhi na Yordana afa vahuma vayamuyingela.

⁶Afa vababatisiwa ha yene anambyeni wa Yordana, na vatihlaya swidoho swavu.

⁷Loko Yohana avoni vafarisi ni vasaduki lava vanyingi vata ku yene akuva avababatisa aku ku vone: Lixaka dra swipswhahla! Hi mani lweyi an'wibyeliki leswaku n'winga huluka ku xikhatiso xa kutxhavisa lexi xinga kusuhi?

⁸Humexani mihandru leyi mikombisaka kundruluka kwenu,

⁹na kone n'wingatxhuki n'witipimisela n'wiku: Hine hi vana va Abrahamu, hikusa nan'wibyela leswaku, Xikwembu Nkulukumba, hi maribye lawa angaswikota a kupfuxela Abrahamu a vana.

¹⁰A kawula ni swoswi drilulamisiwile kutrema a minsinya hi le mitrwini. A minsinya hinkwayu leyi mingabekiki mihandru leminene yatremiwa mitxukumetiwa andrilweni.

¹¹Mine nin'wibabatisa hi mati, leswaku n'windruluka; kambe lweyi ataka ntrhaku kwanga, awanitlula hi ntamu, mine ningafanelikiki kurwala tintangu takwe; hi Yene lweyi atakan'wibabatisa hi Moya wa Kuxwenga ni hi ndrilo.

¹²Ani lihlelo amavokweni, atahehera a mavele amatravukanisa ni mavivi. Atabekisa a mavele anguleni, kutani ahisa a mavivi andrilweni lowu wungatimekikiki.

¹³Kolahu Yesu asuki Galileya aya nambyeni wa Yordana, lomu afaka ku na Yohana, akuva atababatisiwa ha yene.

¹⁴Kambe Yohana ayala aku: Hi mine nifanekelaka kubabatisiwa ha wene, kasi wene uta ku mine?

¹⁵Yesu ayangula aku: Swipfumeli swoswi, hikuva swifanekeli swoswo ku hine, hihetisa kululama hinkwaswu. Kutani Yohana apfumela.

¹⁶Kaku loko Yesu ababatisiwile, ahuma amatini. Hi nomu-lo, a matilo mapfuleka, avona a Moya wa Xikwembu Nkulukumba wuxikela ahenhla kwake swanga i tuva.

¹⁷ Kutani kutwala ritu dripfaka hi le Tilweni driku: Lweyi i N'wananga lweyi nimurandraka, lweyi nitrhavisiwaka ha yene.