Read ronga Mt 4 Bible Online

Mt 4 - ronga bible

Mt 4

¹A Moya wuyisi Yesu ahuleni, akuva Diyavulosi amudringa.

²Avi kone hi mune wa makume (40) ya masiku ni vusiku bya mune wa makume (40) na angadi ntxhumu, ntrhaku atwa ndlala.

³A mudringi atrhindrekela ku Yene aku: Loko uli N'wana wa Xikwembu Nkulukumba, hlaya leswaku a maribye lawa amandruluki makati.

⁴ Kambe Yene ayangula aku: Kutraliwi leswaku: A mhunu angahanyi ntsena hi kati, kambe na kone hiritu hinkwadru ledri dripfaka anon'wini wa Xikwembu Nkulukumba.

⁵Kutani Diyavulosi amutekela amutini wa Kuhlawuleka amukhandriyisa axihlungwini xa kutlakuka ngopfu xa Tempele,

⁶aku ku yene: Loko uli N'wana wa Xikwembu Nkulukumba dladlama la, hikusa kutraliwi leswaku: Xikwembu Nkulukumba ataleleta a tintrumi tikukhavutela hi mavoko ya tone, ungatitxhuka ukhunguvanyeka nkondro waku hi ribye.

⁷ Yesu amuyangula aku: Nakone kutraliwi leswaku: Ungavidringa HOSI Xikwembu Nkulukumba waku.

⁸Diyavulosi atlhela mfuri amuyisa ku nhava ya kuleha ngopfu, amukomba a mimfumu hinkwayu ni kuphatima ka yone,

⁹aku: Nitakunyika hinkwaswu leswi loko unikhisamela, unigandrela.

¹⁰ Yesu amuyangula aku: Suka Sathana! Hikusa kutraliwi leswaku: Utagandrela HOSI Xikwembu Nkulukumba waku, utirela yene ntsena.

¹¹Kolahu Diyavulosi amutrika; kutani a tintrumi tita, timutirela.

¹²Loko Yesu ayingeli leswaku Yohana Mubabatisi abohiwile, atlhelela Galileya.

¹³Kutani asuka a Nazarete, ayatrhama Kapernawume, amuti lowu wunga nkingeni wa tiva dra Galileya, atikweni dra Zabuloni na Nafitali [9]

¹⁴Kuhumeleli leswi akuva kuhetiseka a maritu ya muprofeta Ezaya anga ku:

¹⁵Tiko dra Zabuloni ni tiko dra Nafitali, ndleleni ya lwandle, halahaya ka Yordana, Galileya dra va-Matiko,

¹⁶ A tiko ledri afaka drifamba amunyameni drivoni a livaningo ledri drikulu! A livaningo ledri drivaningiki ku lava afaka vatrhama tikwanini dra munyama, ni ntrhuti wa lifu.

¹⁷Kusukela kolahu Yesu asungula a kurera aku: Ndrulukani, hikusa a Mfumu wa Matilo wu kusuhi!

¹⁸Kuti loko Yesu afamba-famba ankingeni wa lwandle dra Galileya, avona vamakwavu-na-makwavu vabiri; mun'we afa ali Simoni lweyi ahlayiwaka Petrosi, mun'wana afa ali Andreyasi, na vapeta a minkukutu yavu a lwandle, hikusa afa vali vaphasi va tinhlampfi.

¹⁹Yesu aku ku vone: Nilandrani, mine nitan'wiyentxa vaphasi va vhanu.

²⁰Volavo-ke vatrika a minkukutu, vamulandra.

²¹Amahlweninyana, Yesu avona van'wana vamakwavu-na-makwavu, Yakobe na Yohana, vana va Zebedeya lava afaka vali byatrhwini ni tatana wavu, vabusetela a minkukutu; Yesu avavitana.

²²Volavo-ke, hi kukahlula vatrika a byatrhu ni tatana wavu vamulandra.

²³ Yesu afa afamba hi tiko hinkwadru dra Galileya, adondrisa amasinagogeni ya kone, arera a Ivangeli ya Mfumu, ahanyisa a vhanu lava vanyingi amavabyini yavu hinkwawu ni le tinxanisweni tavu hinkwatu.

²⁴Afa kutwala kwake kuhangalaka atikweni dra Siriya. Vamutisela hinkwavu lava vavabyaka hi mavabyi ya tinxaka-xaka, ni mahlomulo ni tinxanisa ni lava vangani mademoni, ni va mavabyi ya kuwutleka, ni vakuwonyana a swiro, kutani Yene afa avahanyisa.

²⁵Afa kuta vhanu vanyingi va-le-Galileya, va-le-Dekapolisi[10], va-le-Yerusalema, va-le-Yudeya ni va halahaya ka Yordana.