Read ronga Mt 5 Bible Online

Mt 5 - ronga bible

Mt 5

¹Yesu atiki avona a xitrhungu, antlhantukela anhaveni kutani atrhamisa. A vadondrisiwa vakwe vatrhindrekela ku yene,

²aku apfula a nomu asungula a kuvadondrisa, aku:

³Vakatekile lava vanga swisiwana amoyeni, hikusa a Mfumu wa Matilo i wavu!

⁴Vakatekile lava vadrilaka, hikusa vatamiyetiwa!

⁵Vakatekile lava varuliki, hikusa vatava ni pfindla dra misava!

⁶Vakatekile lava vangani ndlala ni tora dra leswi swakululama, hikusa vataxurisiwa!

⁷Vakatekile lava vangani lirere, hikusa vatavayentxeliwa lirere na vone!

⁸Vakatekile lava vabasiki timbilu, hikusa vatavona Xikwembu Nkulukumba!

⁹Vakatekile a valulami, hikusa vatatxhuliwa vana va Xikwembu Nkulukumba!

¹⁰Vakatekile lava vaxaniseliwaka kululama, hikusa a Mfumu wa Matilo i wavu!

¹¹N'witakateka loko van'wiruka, van'wixanisa, vahlaya maritu hinkwawu ya kubiha ha n'wine hi kuhemba, nkonta yanga.

¹² Trhavani, n'witrhavisisa hikusa a hakelo drenu i drikulu a Matilweni. Hikusa vaxanisisi xiswoswo na vo vaprofeta lava van'wirangeliki.

¹³N'wine n'wi munyu wa misava; kambe loko a munyu wupswhama, wunga ha nandrikisiwa hayini? Awa ha pfuni ntxhumu, loko kunge kutxukumetiwa a handle wukandreteliwa hi vhanu.

¹⁴N'wine n'wi livaningo dra misava. A muti lowu wuyakiwiki a henhla ka nhava awufihleki;

¹⁵na swone a motre awulumekiwi wubekiwa a hansi ka xihundru, kambe vawubeka a henhla, lomu wuvaningaka hinkwavu lava vanga ndlwini.[11]

¹⁶A kuvaninga kwenu akuvaningisi xiswoswo amahlweni ka vhanu, akuva vatakota kuvona a mintiro yenu leminene, vatatwalisa Tatana wenu lweyi anga Matilweni.

¹⁷N'wingapimiseni leswaku niteli kutatahelisa Nawu kumbe vaprofeta. Anitelanga kutatahelisa, kambe niteli kutatahetisa.

¹⁸Nihlayelamfuri nili ku n'wine: Loko a tilo ni misava swingasinahundra, kungatisusiwa a Nawini letela kumbe xintrhatana xin'we, na hinkwaswu swingasinahetiseka.

¹⁹Hileswo-ke lweyi atakatlula, nambi wa kuva mun'we ntsena wa milawu leyi mitrongo ni kudondrisa vambeni a kuyentxa swoswo, atahlayiwa lweyi ntrongo a Mfun'wini wa Matilo. Kambe lweyi atakan'wibekisa ni kun'widondrisa, atahlayiwa lwenkulu a Mfun'wini wa Matilo.

²⁰Hikusa nan'wibyela, nili: Loko n'wine n'wingatluli a vandondrisi va Nawu ni vafarisi hi kululama, n'wingaka n'winganhingeni a Mfun'wini wa Matilo.

²¹ N'wiswiyingelile leswi swingahlayiwa ku vakhale leswaku: Ungavidlaya. Lweyi atakadlaya mhunu atafanela kuyavanyisiwa.

²²Kambe mine nili ku n'wine: Mun'wana-ni-mun'wana lweyi ahlundrukelaka wa-le-kwavu, atafanela kuyavanyisiwa; ni lweyi arukaka a wa-le-kwavu amutxhula singe atayavanyisiwa hi huvu; ni lweyi atakamutxhula xihunguki afanekeliwa hi kutxukumetiwa a Geheneni (andrilweni lowu wungatimekikiki).

²³Ke, loko uhumexa a mhamba yaku uyiyisa agandrelweni, uva udrimuka kone leswaku a wa-le-kwenu anani mhaka na wene,

²⁴trika a mhamba yaku kolanu amahlweni ka gandrelo, ufamba uyaranga urulisana ni wa-le-kwenu. Ntrhaku utatlhela utatahumexa a mhamba yaku.

²⁵Hatla urulisana ni lweyi atengisanaka na wene, wehe andleleni kun'we na yene, a mutengisi waku angatitxhuka akunyiketa ku mutremi; a mutremi akunyiketela ku mulaveleli wa bohelo, kutani akunhingenisa abohelweni.

²⁶Nihlayelamfuri nili ku wene: Ungatihuma kone, loko ungasinadriha a malinyana ya vugamu!

²⁷ N'wiswiyingelile leswi swingahlayiwa ku vakhale leswaku: Ungatxhuki uyentxa vumbuye.

²⁸Kambe mine nan'wibyela leswaku: Lweyi alavisaka a wansati hi kumunavela ayentxi vumbuye na yene ambilwini yake.

²⁹Hikolahu-ke, loko a tihlu draku dra xinene drikuyisa kudoheni, drisusi udritxukumeta kule na wene. Swayapswa loko ulahlekeliwa hi xiro xin'we xa miri, kutlula loko a miri waku hinkwawu wutxukumetiwa akheleni dra ndrilo.

³⁰Ni loko a voko draku dra xinene drikuyisa kudoheni, dritreme udritxukumeta kule na wene. Swayapswa loko ulahlekeliwa hi xiro xin'we xa miri, kutlula loko a miri yaku hinkwayu mitxukumetiwa akheleni dra ndrilo.

³¹ Nakone kahlayiwi leswaku: A wanuna lweyi atrikaka a nsati wakwe afanekela kumunyika a papela dra kudlaya a vukati.

³²Mine kambe nili ku n'wine: A wanuna lweyi atrikaka a nsati wakwe, na kungena mhaka ya vumbuye, amuyentxa akuva ahamba vumbuye. Kutani na yene lweyi atekanaka ni lweyi atrikiwiki ayentxa vumbuye na yene.

³³ N'wiswiyingelile kambe leswi swingahlayiwa ku lava vakhale leswaku: Ungatxhuki undruluka akufungeni kwaku, kambe tlhelisela ku HOSI leswi ungayifungela swone.

³⁴Mine kambe nan'wibyela leswaku: N'wingatxhuki n'wifunga ni kutrongo; n'wingafungi hi tilo, hikusa i xitrhamu xa vuhosi xa Xikwembu Nkulukumba;

³⁵nambi kuli hi misava, hikusa i vunalavutelo bya minkondro yake; nambi kuli ha Yerusalema, hikusa i muti wa HOSI leyi yikulu.

³⁶Ungafungi hi nhloko yaku na yone, hikusa awuna kuswikota a kundruluta ntsena a nsisi wun'we wuva wa ntlhohe kumbe wuva wa ntima.

³⁷Swadringana kuhlaya Im'na, loko kuli im'na, ni Im'hi, loko kuli im'hi. Hinkwaswu leswi switlulaka leswo, i ntiro wa kupfa ku lweyi mfani.

³⁸ N'wiswiyingelile leswi swingahlayiwa vaku: A tihlu hi tihlu, ni tinyo hi tinyo.

³⁹Kambe mine nili ku n'wine: N'wingayaleleni lweyi mfani. Loko mhunu akuhodlota lirama dra xinene, munyiki ni drin'wana.

⁴⁰Loko mhunu akurambela adjula kukutekela a xiyambalu xaku, munyike na drone djansi.

⁴¹Loko mhunu akusindrisa leswaku ufamba na yene mpfhuka wa kilometro drin'we, muheketi hi mpfhuka wa makilometro mabiri.

⁴²Nyika lweyi akukombelaka; ungafulareli lweyi adjulaka kuvoleka ku wene.

⁴³ N'wiswiyingelile leswi swingahlayiwa vaku: Utarandra a wa-le-kwenu, uvenga a nala waku.

⁴⁴Kambe mine nili ku n'wine: Randrani a valala venu, n'wikombelela ku Xikwembu Nkulukumba, lava van'wixanisaka

⁴⁵akuva n'witava vana va Tatana wenu lweyi anga Matilweni, hikusa atlhavisa a dambu drakwe a henhla ka lava vanene ni ku lava vamfani, anisa a mpfula ku lava vanene nambi ku lava vamfani.

⁴⁶Hikuva loko n'wirandra ntsena lava van'wirandraka, n'wini hakelo drini xana? Na vone a vahlengisi[12] avayentxisi xiswoswo xana?

⁴⁷Ni loko n'wilosa a va-le-kwenu ntsena, n'witlula van'wana ha yini? Na vone va-Matiko avayentxisi xiswoleswo xana?

⁴⁸Kolahu-ke, vanani lava vahetisekiki, swanga hi Tatana wenu lweyi anga Matilweni ahetisekiki.