Read ronga Mt 6 Bible Online

Mt 6 - ronga bible

Mt 6

¹Tivonelani, leswaku n'wingatxhuki n'wiyentxa kululama kwenu amahlweni ka vhanu, akuva n'witavoniwa hi vone; loko n'wiyentxisa xileswo, n'wingaka n'wingakumi a hakelo ku Tatana wenu lweyi anga Matilweni.

²Hileswo-ke, loko unyika xinyiko, ungatxhuki uyimba nanga amahlweni kwaku, swanga hi leswi a vamandrendre vayentxisaka xiswone, amasinagogeni ni le maruweni, akuva vhanu vatavatwalisa. Nihlayelamfuri nili ku n'wine: xileswo, vone vayamukelile a hakelo dravu.

³Kambe wene, loko unyika xinyiko, a voko draku dra ximantrhi dringavitiva leswi swiyentxiwaka hi dra xinene;

⁴akuva a kunyika kwaku kuyentxiwa axihundleni; kutani a Tatana waku lweyi akuvonaka axihundleni, atakunyika a hakelo draku.

⁵Loko n'wikhongota n'wingayentxi swanga hi vhanu va mandrendre lava varandraka a kukhongota na vayimile, amasinagogeni ni le matlhanganwini ya maruwa, akuva vatavoniwa hi vhanu. Nihlayelamfuri leswaku a vhanu lavo vayamukeli khale a hakelo dravu.[13]

⁶Kambe wene, loko ukhongota, nhingena andlwini yaku, kutaku loko upfali a xipfalu, khongota Tatana waku lweyi anga xihundleni; Tatana waku lweyi akuvonaka axihundleni, atakunyika a hakelo draku.

⁷Loko n'wikhongota n'wingatateleni maritu swanga hi va-Matiko. Hikusa vapimisa leswaku vatayingeliwa hi kutatela a maritu yavu.

⁸N'wingafaneni navu! Hikusa Tatana wenu awaswitiva leswi n'wiswipfumalaka na n'wine n'wingasikombela ku Yene.

⁹Hileswo-ke n'wifanela kukhongotisa xileswi: Tatana weru lweyi anga Matilweni. A vito draku adrihlawuliwe,

¹⁰awute a Mfumu waku; a kurandra kwaku akuyentxiwe amisaveni, swanga hi le Tilweni.

¹¹Hihanane namuhla a swakuda sweru swa siku drin'wana ni drin'wana,

¹²Hidrivalele a milandru yeru, swanga hi leswi na hine hidrivalelaka van'wana lava vangani milandru ku hine.

¹³Ungahiyise akudringiweni, kambe hihuluxe ku lwe mfani.

¹⁴Hikusa, loko n'widrivalela vhanu a swidoho swavu, Tatana wenu wa le Tilweni atan'widrivalela na n'wine.

¹⁵Kambe loko n'wingadrivaleli a vhanu a swidoho swavu, na Yene Tatana wenu angaka angan'widrivaleli a swidoho swenu.

¹⁶Loko n'wititrona, n'wingavi fana ni va mandrendre lava vatiwonyanisaka mimombo; hikusa vatimphumisa liso, akuva switavoneka avhanwini leswaku vatitrona. Nihlayelamfuri, nili ku n'wine: vakuma a hakelo dravu.

¹⁷Kambe wene, loko utitrona, tola mafura anhlokweni, uhlamba ni liso,

¹⁸swingativoneka avhanwini leswaku watitrona, kambe switavoniwa hi Tatana waku lweyi anga xihundleni. Kutani Tatana waku lweyi avonaka axihundleni, atakunyika a hakelo draku.

¹⁹N'wingatihlengeleteleni nhlengwe lani misaveni, lomu a tinsumba ni kukura swihoneka, ni lomu a vayivi vanhingenaka vayiva;

²⁰kambe tihlengeletelani a nhlengwe atilweni, lomu a tinsumba ni kukura swingahonikiki, ni lomu a vayivi vanganhingenikiki vayiva.

²¹Hikusa lomu a nhlengwe yaku yinga kone, hi laha a mbilu yaku yinga kone.

²²A motre wa miri i mahlu; hi leswo-ke, loko a mahlu yaku me manene, a miri waku hinkwawu wutavaninga;

²³kambe loko a mahlu mange manene, a miri waku hinkwawu watava munyameni. Ke loko a kuvaninga loku kunga ndreni kwaku kuva munyama, a kumphuma ka munyama lowo kutava loku ka kuyini!

²⁴Angakone lweyi angakotaka kutirela a tihosi tibiri; hikusa kumbe atavenga yin'we arandra yin'wana, kumbe atanamarela yin'we adrela yin'wana. An'winakuswikota a kutirela Xikwembu Nkulukumba ni mali.

²⁵Nan'wibyela nili: N'wingakaratekeni hileswaku n'witada yini, kumbe n'witanwa yini, ni leswaku amirini wenu, n'witayambala yini. Ke a vutomi abyitluli swakuda, ni miri amitluli swiyambalu xana?

²⁶Lavisani a tinyanyana ta tilo: atibyali, atitrhoveli, atihlengeleti ntxhumu aswintlhanteni; hi Tatana wenu wa le Tilweni atiphamelaka. N'wine an'wina lisima ngopfu kutlula a tinyanyana ke?

²⁷Xana hi wini ku n'wine lweyi hi kutikarata ngopfu hi vutomi byake, angakotaka a kuyengesela kutrongo a nkama wa vutomi byake?[14]

²⁸Ni loko swi swiyambalu; xana n'wikaratekela yini? Lavisani magon'wa ya nhova leswi mamilisaka xi swone! Amatiri, amaluki!

²⁹Kambe nan'wibyela leswaku nambi mufumi Salomoni, ni kutwala kwake hinkwaku, angayambalanga swanga ha drin'we dra wone.

³⁰Ke loko Xikwembu Nkulukumba ayambexisa xileswi a byanyi bya nhova, lebyi byinga kone namuhla na mundruku byitahisiwa, xana angaka angan'wiyambexi ngopfu n'wine, swipfumelinyana?

³¹Hileswo-ke, n'wingatikarateni n'wiku: Hitada yini? Kumbe hitanwa yini? Kumbe hitayambala yini?

³²Hinkwaswu leswo swidjuliwa hi va-Matiko. Hikusa Tatana wenu wa le Matilweni awaswitiva leswaku n'wipfumala hinkwaswu leswo.

³³Djulisisani kusungula a Mfumu wa Xikwembu Nkulukumba ni kululama kwake, kutani hinkwaswu leswo n'witayengeteliwa.

³⁴Hileswo-ke n'wingakaratekeni hi siku dra mundruku, hikusa a siku ledro dritatidjulela swa drone. Hikusa a siku drin'wana ni drin'wana dridringana hi khombo dra drone.