Read ronga Mt 8 Bible Online

Mt 8 - ronga bible

Mt 8

¹Kuti loko Yesu afulameli hansi ka nhava, a ntrhungu lowu wukulu wumulandra.

²Vonani, a mhunu wa nhlokonho ata ku yene, amukhisamela aku: HOSI, loko uswirandra unganibasisa.

³Kutani Yesu analavuta voko amukhumba aku: Naswirandra; basisiwa! Hi nomu-lo, a nhlokonho yake yidahiwa.

⁴Yesu amubyela aku: Lavisa, ungabyeli mhunu; kambe famba uyatikombisa ku muprista, uhumexa a nyiko leyi yileletiwiki ha Moxe, yiva xikombiso ku vone.

⁵[15] Atiki anhingena Kapernawume, a ndruna ya dzana yita ku yene, yiku:

⁶HOSI, a nandra wanga a le ndlwini avabyaka, awonyaniki swiro, mfuri axaniseka ngopfu.

⁷Yesu amuyangula aku: Nitaya niyamuhanyisa.

⁸Kambe lweyi wa ndruna ya dzana ayangula aku: HOSI, anifanekelanga akuva unhingena andlwini yanga; ntsena hlaya hi ritu, kutani a nandra wanga atahanyisiwa.

⁹Hikusa na mine ninga mhunu lweyi afumiwaka, nini masotxha lawa manga hansi kwanga, loko niku ku mun'we wavu: Famba; awafamba; loko niku ku mun'wana: Tana; awata; ni loko niruma a nandra wanga leswaku ayentxa xa kukari, awaxiyentxa.

¹⁰Yesu atiki ayingela leswo, ahlamala; kutani aku ku lava afaka vamulandra: Nihlayelamfuri nili ku n'wine: aningekuma kupfumela ka kufana ni loku a Israyeleni.

¹¹Nan'wibyela leswaku: Vanyingi vatapfa a Vuxeni ni le Vupeladambu, vatatatrhamisa vada kun'we na Abrahamu, na Yisaki na Yakobe a Mfun'wini wa Matilo;

¹²kambe loko vali vana va Mfumu, vatatxukumetiwa a handle, amunyameni, lomu kutakava ni swidrilo ni kuketrela ka menyo.

¹³Kutani, Yesu aku ku lweyi wa ndruna: Muka, aswiyentxeki hi laha upfumeliki ha kone. Hi nkama wolowo a nandra wakwe ahanyisiwa.

¹⁴Yesu ati aya a kaya ka Petrosi, ayakuma a mamana wa nkata Petrosi na ayetlelile, ani kuhisa ka miri;

¹⁵amukhumba, kutani a kuhisa ka miri kumutrika; ahangapfuka, asungula kumutirela.

¹⁶Akupeleni ka dambu, kutisiwa ku Yesu a vhanu vanyingi lava vangani mademoni, ahlongola mimoya hi ritu, ava ahanyisa hinkwavu lava va kuvabya.

¹⁷ Leswi swihumeleli akuva kuhetiseka leswi swingativisiwa hi muprofeta Ezaya loko aku: Yene atitekeli a mahlomulo yeru, atirwexi a mavabyi yeru.

¹⁸Yesu loko avoni xitrhungu lexi kulu ximutrandreliki, aleleta leswaku vawelela halahaya.

¹⁹Mun'we wa mutrali wa Nawu aku ku yene: Mudondrisi, nitakulandra hinkwaku lomu uta kaya kone.

²⁰Yesu amuyangula aku: A mabuwana mani mimpala, ni tinyanyana ta tilo tini vusaka, kambe a N'wana wa Mhunu angana lomu angadamaka nhloko yake kone.

²¹Mun'wana ku vadondrisiwa vakwe, aku: HOSI, nipfumeleli niranga niyalahla a tatana wanga.

²²Kambe amuyangula aku: Nilandre, trika vafi valahla a vafi vavu.

²³Kuti loko Yene anhingeni byatrhwini, a vadondrisiwa vakwe vamulandra.

²⁴Vonani, a xidzedze xikulu xihumelela, lakakuva a mavimbi madjula kufukumeta a byatrhu. Kambe yene afa ayetlelile.

²⁵A vadondrisiwa vatrhindrekela ku yene, vamupfuxa, va bandlukana vaku: HOSI, hihuluxe! Hasuva.

²⁶Yene avayangula aku: Ha yini n'wivani vutoya? Swipfumelinyana! Ahangasekeleka, akhwavela mheho ni mavimbi, kuva ni kurula loku kukulu.

²⁷Vone vahlamala, vavutisana vaku: Lweyi hi lweyi wa kuyini kasi, leswi na tone a timheho ni mavimbi swimuyingisetaka?

²⁸Loko Yene atlhasi atlhelweni drin'wana dra tiva, atikweni dra va-Gadara[16], a vhanu vabiri vahumi maxireni na vani mademoni, vamutlhangaveta. Afa vani kulebya loku kukulu, lakakuva kungena mhunu lweyi atiyaka kuhundra hi ndlela leyo;

²⁹kutani vasungula kubandlukana vaku: Udjula yini ku hine, N'wana wa Xikwembu Nkulukumba! Uti halenu kuta hixanisa na nkama wungasitlhasa, xana?

³⁰Kambe afa kuni ntlhambi wukulu wa tinguluve, leti afaka tida kule na vone.

³¹A mademoni afa mamukhongota maku: Loko uhihlongola, hirumele hiyanhingena ku ntlhambi lowuya wa tinguluve

³²Yene aku ku wone: Fambani! A mademoni mahuma ku vhanu lavo mayanhingena atinguluveni; kutani a ntlhambi hinkwawu wa tinguluve wutrutruma, wufulamela ativeni, tiyafa matini.

³³A vabyisi vatrutruma, vaya mutini, vayabikela vhanu hinkwaswu ni timhaka ta lava afaka vani mademoni.

³⁴A va muti hinkwavu vahuma, vayatlhangaveta Yesu; loko vamuvona, vamukombela leswaku asuka atikweni dravu.