Read ronga Mrk 1 Bible Online

Mrk 1 - ronga bible

Mrk 1

¹A kusungula ka Ivangeli ya Yesu Kriste, N'wana wa Xikwembu Nkulukumba[1],

²swanga hi leswi swingatraliwa hi muprofeta Ezaya, angaku: Nitaruma a ntrumi yanga amahlweni kwaku, leyi yitakabekisa a ndlela yaku.

³Yene i ritu ledri dribandlukanaka ahuleni driku: Bekisani gudju dra Hosi, na n'wihamba tindlela ta Yone tilulama.

⁴Xileswo kuhumeleli mhunu lweyi atxhuliwaka Yohana, na ababatisa atikwanini dra hula, na atekisa ahlaya ku vhanu aku: Ndrulukani ku swakubiha n'wiyamukela Babatiso, akuva Xikwembu Nkulukumba atan'widrivalela a swidoho swenu.

⁵A vhanu hinkwavu va-le-Yudeya ni vayaki va Yerusalema afa vaya yingela Yohana Mubabatisi. Afa vatihlaya a swidoho swavu kutani yene afa avababatisa a nambyeni wa Yordana.

⁶Yohana afa ayambala xiyambalu xa voya bya kamela, ni bandi dra nhlonge alikhalwini, afa ada humbi ni vulombe bya nhova.

⁷Afa aku ku xitrhungu: Kuta mun'wana antrhaku kwanga, lweyi anitlulaka hi ntamu, ningafanelikiki akuva nikarama nintrhunxa a ngoti ya tintangu takwe.

⁸Mine, nin'wibabatisa hi mati, kambe yene atan'wibabatisa hi Moya wa Kuxwenga.

⁹Amasikwini lawo, Yesu apfi Nazarete wa Galileya, ababatisiwa hi Yohana Mubabatisi a nambyeni wa Yordana.

¹⁰Yesu aku ahahuma matini, avona matilo makendlukile hi le makari, ni Moya wa Kuxwenga wuxikelaka henhla kwake, swanga hi tuva.

¹¹Ava ayingela a ritu ledri dripfaka Tilweni, driku: Wene, u N'wananga lweyi wa kurandreka, lweyi nimutrhavelaka.

¹²Kutani hi nomu-lo, a Moya wa Kuxwenga wumuyisa ahuleni;

¹³ayatrhama kone mune wa makume ya masiku, amakari ka swihari na ali kari adringiwa hi Sathana. Na swirun'wa swimutirela.

¹⁴Kuti antrhaku kakubohiwa ka Yohana Mubabatisi, Yesu atlhelela Galileya, arera a Ivangeli ya Xikwembu Nkulukumba, aku:

¹⁵A nkama wuhetisekile, a Mfumu wa Xikwembu Nkulukumba wutlhasile. Xileswo ndrulukani n'wipfumela ku Ivangeli.

¹⁶Loko Yesu akhaluta kusuhi ni tiva dra Galileya, avona Simoni ni makwavu Andreyasi, na vakukuta ativeni; hikusa afa vali vaphasi va tinhlampfi.

¹⁷Yesu aku ku vone: Nilandrani, nitan'wiyentxa vaphasi va vhanu.

¹⁸Vone, vahatla vatrika minkukutu, vamulandra.

¹⁹Afambiki kutrongonyana, avona Yakobe ni makwavu Yohana, vana va Zebedeya, na vabusetela a minkukutu yavu abyatrhwini.

²⁰Avavitana, vone vahatla vatrika tatana wavu, Zebedeya, abyatrhwini kun'we ni vatiri vakwe, vamulandra.

²¹Yesu ni vadondrisiwa vayi Kapernawume. Kuku hi siku dra Savata Yesu anhingena asinagogeni, asungula a kudondrisa.

²²A vhanu afa vahlamala hi dondro yake, hikusa afa avadondrisa hi ntamu, kungali swanga hi vadondrisi va Nawu.

²³Asinagogeni dravu afa kuni wanuna lweyi angani moya lowu mfani, ahatla abandlukana aku:

²⁴Xana a mhaka yeru na wene hi yini, wene, Yesu wa le Nazarete? U teli kuhisuvisa! Mine nakutiva lweyi unga yene; wene u Muxwengi wa Xikwembu Nkulukumba!

²⁵Kambe Yesu awukhwavela, aku: Miyela, huma ku nuna lweyi.

²⁶A moya lowu mfani wutrekatrekisa nuna lweyo wubandlukana hi ritu ledri drikulu, wuhuma ku yene.

²⁷A vhanu vahangahlolelwa hinkwavu, vava vavutisana, vaku: Xana impswini leswi? Van'wana vaku i dondro yimpswha ni ya ntamu! Mfuri yene aleleta ni mimoya leyi mimfani mimuyingiseta.

²⁸A xidrumo xa Yesu xihatla xihangalaka atikweni hinkwadru dra Galileya.

²⁹Loko vahumi asinagogeni, Yesu afambi kun'we na Yakobe na Yohana a kaya ka Simoni na Andreyasi.

³⁰A mukon'wana wa xisati wa Simoni afa ayetlelile, ani kuhisa ka miri, kutani vativisa Yesu.

³¹Atrhindrekeliki, amukhoma hi voko amupfuxa; kutani a kuhisa ka miri kumutrika, ava avatirela.

³²Amadambyeni, loko a dambu dripela, vatisa hinkwavu lava vavabyaka, ni lava vaxanisiwaka hi mimoya leyi mimfani.

³³A vhanu va muti hinkwawu afa vahlengeletani anyangweni.

³⁴Yesu ahanyisa lava vanyingi, lava vaxanisiwaka hi vuvabyi bya tinxaka-xaka, ahlongola ni mademoni manyingi. Nakone, afa angapfumeleli a mademoni a kuvulavula, hikusa afa mamutiva.

³⁵Ampundrwini, na kahatimphu, Yesu apfuka, ahuma, atiyela mbangwini wa hula, ayakhongota.

³⁶Simoni ni lava afaka vali na yene, vamulandra.

³⁷Loko vamukumile, vaku ku yene: Hinkwavu vakudjula.

³⁸Kutani Yesu aku ku vone: Ahifambeni kun'wana, amitanini leyi minga kusuhi akuva niyarera na kone, hikusa nihumeli swone.

³⁹Kutani afamba, arera a masinagogeni yavu, ni hi dra Galileya hinkwadru, na ahlongola mademoni.

⁴⁰Mun'we wa nhlokonho ati ku Yesu, awa hi matrolo amahlweni kwake, amukhongota aku ku yene: Loko uswidjula, ungaswikota a kunibasisa.

⁴¹Yesu aviki ni vurombe, analavuta a voko amukhumba, aku ku yene; Naswidjula! Basisiwa.

⁴²Hi nomu-lo a nhlokonho yimutrika, abasisiwa.

⁴³Yesu ahatla amulaya ngopfu, amutlhelisa aku:

⁴⁴Tivoneli, ungayibyela mhunu xa ntxhumu. Kambe famba ku muprista, akuva uyisa ku yene leswi Moxe angaleleta swone, hinkonta ya kubasisiwa kwaku, leswaku byiva vumboni ku vone.

⁴⁵Kambe a nuna lweyo, aku awasuka, asungula a kuhuwelela leswi swinyingi ni kudrungula leswi swimuhumeleliki, lakakuva Yesu angahaswikoti ni kunhingena amutini mun'we alivaleni. Kambe afa atitrhamela handle, amimbangwini ya mananga; kutani vaya ku yene, vapfa matlhelweni hinkwawu.