Read ronga Mrk 10 Bible Online

Mrk 10 - ronga bible

Mrk 10

¹Loko Yesu asuki kolahu aya mintremanweni ya Yudeya halahaya ka nambu wa Yordana. A switrhungu switlhela swihlengelatana ku Yene, aswidondrisa tani hi laha atoloveliki ha kone.

²A vafarisi vatiki vatlhasa, vamuvutisa hi kumudringa vaku: Xana a nawu wapfumela akuva a wanuna ahlongola a nsati wakwe?

³Yene avayangula hi xivutiso aku: Moxe aleleti yini xana?

⁴ Vone vaku: Moxe ahipfumeleli leswaku hitrala a papela dra kudlaya a vukati himuhlongola.

⁵Kambe Yesu aku ku vone: Amitraleli a leleto ledro hinkonta ya kunonon'hwa ka timbilu tenu.

⁶ Kambe a nkama angasungula a kutumbuluxa misava, Xikwembu Nkulukumba avayentxi nuna ni nsati.

⁷Hileswo-ke, a wanuna atasiya a tatana wakwe ni mamana wakwe, atanamarela a nsati wakwe,

⁸vatava miri min'we hi vubiri byavu, hi leswo-ke avehe vabiri kambe hi vubiri byavu i nyama yin'we[17]

⁹Ke leswi Xikwembu Nkulukumba angaswitlhanganisa a mhunu angatxhuki aswitravukanisa.

¹⁰Loko vatlhasi a kaya, a vadondrisiwa vatlhela vamuvutisa a mhaka leyo.

¹¹Yesu aku ku vone: A wanuna lweyi ahlongolaka a nsati wakwe, ateka mun'wana, ayentxa vumbuye mayelano ni nsati wakwe.

¹²Nakone, loko a wansati atrika a nuna wakwe, atlhela atekana ni mun'wana wanuna na yene ayentxa vumbuye.

¹³Kutani vatisa ku Yene a vatrongwana akuva avantlhanteka a mavoko, kambe a vadondrisiwa vakhwavela a vhanu lavo.

¹⁴Yesu atiki aswivona, asola, aku ku vone: Trikani a vatrongwana vata ku mine, n'wingavatsimbeni hikusa a Mfumu wa Xikwembu Nkulukumba i wa volava vafanaka na vone.

¹⁵Drimukani leswi: lweyi wakuka angayamukeli a Mfumu wa Xikwembu Nkulukumba swanga hi ntrongwana angaka anganhingeni ku wone.

¹⁶Kutani ateka a vatrongwana avaxingara, avakatekisa, na avantlhanteka a mavoko.

¹⁷Kuti loko Yesu ahumi kone, akhoma a ndlela, mun'we mhunu atrutruma ata ku yene, akhisama, amuvutisa aku: Mudondrisi lweyi munene, xana nitayentxa yini akuva nitada a pfindla dra vutomi lebyi byingahelikiki?

¹⁸Yesu aku ku yene: Xana unihlayela yini lweyi munene? Akuna lweyi munene loko ange Xikwembu Nkulukumba ntsena.

¹⁹Wayitiva a milawu: Ungayentxi vumbuye, ungadlayi, ungayivi, ungalumbeti mhunu kuloni hi kuhemba, ungakanganyisi van'wana, txhava a tatana waku ni mamana waku. [18]

²⁰Kambe lweyo aku ku Yene: Mudondrisi, nabekisi hinkwaswu leswo kusukela a vutrongwanini byanga.

²¹Kambe Yesu amulavisa, amurandra, aku ku yene: I xin'we ntsena lexi upfumalaka xone; famba uyaxavisa hinkwaswu leswi unganaswu unyika a mali ku swisiwana, kutani utavani nhlengwe atilweni. Ntrhaku tana unilandra.

²²Kambe yene avaviseka hi ritu ledro, asuka hi kuvaviseka, hikusa afa ali ni vukosi byinyingi.

²³Kolahu Yesu aralarala matlhelo hinkwawu, abyela a vadondrisiwa vakwe aku: Swinonon'hwa swakunhati ku swipfundri a kunhingena a Mfun'wini wa Xikwembu Nkulukumba!

²⁴Kambe a vadondrisiwa vahlamala hi maritu yake. Yesu atlhela avabyela aku: Vananga, swinonon'hwa ngopfu (ku lava vadumbaka vupfundri) a kunhingena a Mfun'wini wa Xikwembu Nkulukumba![19]

²⁵Swanabyala loko a kamela drinhingena hi nomo wa ximari kutlula loko a xipfundri xinhingena a Mfun'wini wa Xikwembu Nkulukumba.

²⁶A vadondrisiwa vahundrisa kuhlamala (hi leswi vaswiyingeliki), vavutisana vaku: I mani-ke lweyi angatihuluxaka?

²⁷Loko avalavisile, Yesu aku ku vone: Ku vhanu aswikoteki, kambe ku Xikwembu Nkulukumba, hinkwaswu swakoteka, hikusa Xikwembu Nkulukumba angahluliwi hi ntxhumu.

²⁸Petrosi ahangamubyela aku: Vona, hine hitriki hinkwaswu akuva hikulandra.

²⁹Yesu aku: Nihlayelamfuri nili: Mani na mani lweyi atrikiki yindlu, kumbe vamakwavu vaxinuna ni vaxisati, kumbe mamana wakwe, kumbe tatana wakwe, kumbe vana, kumbe masimu, ha mine, ni hikola ka Ivangeli,

³⁰yelweyo atayamukela leswi switlulaka ka dzana (100) swoswi amisaveni leyi, a tiyindlu ni vamakwavu va vaxinuna ni vaxisati, ni vamamana ni masimu, kun'we ni tinxanisa. Nakone atakuma a vutomi lebyi byingahelikiki ankameni lowu wutaka.

³¹Kambe lava vanyingi swoswi vanga va kuranga vatava va le ntrhaku, ni lava swoswi vanga va le ntrhaku vatava va kuranga.

³²Afa vali ndleleni na vantlhantukela Yerusalema, Yesu afa afamba amahlweni ka vadondrisiwa. Vone afa vatxhukisiwa, ni lava vamulandraka vatxhava. Yesu atlhela ateka a vadondrisiwa lava va khume na vabiri hi tlhelo asungula kuvabyela leswi switakamuhumelela, aku:

³³Lavisani! Hi ntlhantukela a Yerusalema, kutani a N'wana wa Mhunu atanyiketiwa amavokweni ya vaprista lava vakulu ni vatrali. Vatamuyavanyisela kufa, vamunyiketa ku va-Matiko,

³⁴vatamuhleka, vava vamuthukela mari, vamuba hi ntshilana vamudlaya. Kambe atapfuka-kufeni hi siku dra vuraru.

³⁵Kutani Yakobe na Yohana, a vana va Zebedeya, vata ku Yene vaku: Mudondrisi, hirandra leswaku uhiyentxela leswi hitakakukombela swone.

³⁶Kutani Yesu aku ku vone: Xana n'widjula leswaku nin'wiyentxela yini?

³⁷Vone vaku ku yene: Hinyike leswaku mun'we atrhama axineneni, mun'wana aximantrhini xaku, a Mfun'wini waku wa lidrumo.

³⁸Kambe Yesu aku ku vone: An'wiswitivi leswi n'wikombelaka swone. Xana n'wingaswikota a kunwa ntrheko lowu ninwaka wone, ni kubabatisiwa hi babatiso ledri nibabatisiwaka ha drone?

³⁹ Vone vaku: Hingaswikota! Kambe Yesu aku ku vone: A ntrheko lowu ninwaka, n'witawunwa, na drone a babatiso ledri nibabatisiwaka ha drone, n'witababatisiwa ha drone na n'wine,

⁴⁰kambe loko kuli kutrhama axineneni kumbe aximantrhini xanga ahi mine ninganyikaka. Kambe a mimbangu leyo kutanyikiwa lava swibekiseliwiki vone.

⁴¹Vatiki vaswiyingela lava va khume, vasungula a kuhlundrukela Yakobe na Yohana.

⁴²Kutani Yesu avavitana aku ku vone: N'waswitiva leswaku lava ingiki vafuma a matiko, vamafuma hi kunonon'hwa, ni leswaku a vakulu va wone vamafuma hi ntamu.

⁴³Kambe, ku n'wine aswitanu; na swone lweyi adjulaka kuva nkulu amakari kwenu atava mutireli wenu;

⁴⁴ntlhantakubiri lweyi adjulaka kuva lweyi wa kuranga amakari kwenu, atava nandra wa hinkwavu.

⁴⁵ Hikusa na Yene N'wana wa Mhunu angatelanga kutatireliwa, kambe kutirela, ni kunyiketa a vutomi byake xiva xitirulo ku lava vanyingi.

⁴⁶Kutani vatlhasa Yeriko. Loko Yene ahuma mutini ni vadondrisiwa vakwe, ni xitrhungu xikulunyana, Bartimeya a n'wana Timeya, afaka ali mukombeli wa kufa-mahlu, afa atrhama andleleni.

⁴⁷Kuti loko ayingeli leswaku hi Yesu wa Nazarete, asungula kubandlukana aku: Yesu, N'wana Davida, niyentxele vurombe!

⁴⁸A vhanu vanyingi afa vamukhwavela akuva amiyela, kambe yene afa ahundrisa a kubandlukana aku: N'wana Davida, niyentxele vurombe!

⁴⁹Yesu ayima aku: Muvitanani. Vahangayavitana lweyi wa kufa-mahlu vaku ku yene: Tiya ntamu sekeleka, awakuvitana.

⁵⁰Yene atxukumetiki a xiyambalu xakwe, atlula ata ku Yesu.

⁵¹Yesu amuvutisa aku: Xana urandra leswaku nikuyentxela yini? Lweyi wakufa-mahlu aku: Mudondrisi! Akuva nitlhela nivona.

⁵²Yesu aku ku yene: Muka, akupfumela kwaku kukuhuluxile. Hi nomu-lo atlhela avona, kutani alandra Yesu andleleni.