Read ronga Mrk 14 Bible Online

Mrk 14 - ronga bible

Mrk 14

¹Afa kusali ntsena masiku mabiri akuva Paska ni nkhuvu wa makati lawa mangekena handrelo swiva kone. A vaprista lava vakulu ni vadondrisi va Nawu afa vadjula a rengu dra ku khoma Yesu, akuva vamudlaya.

²Hikusa afa vaku aswifanekeli kumukhoma ankhubyini suka swipfuxa a dzolonga amakari ka xitrhungu.

³Kuti loko Yene ali Betaniya, andlwini ya Simoni, lweyi wa nhlokonho, na atrhami atafuleni kutrhindrekela ku yene wansati, lweyi afaka atameli nhlembeto ya vumba dra ntlhohe na yini mafura ya kunun'hwela ya lisima, mahambiwi hi xinsinyana xa nardo; adlaya a nhlembeto, kutani atxhela mafura anhlokweni ya Yesu.

⁴Van'we vhanu afaka vali kolahaya vahlundruka swone, atimbilwini tavu, vasungula a kunu'nunu'ta vaku: Xana a mafura hinkwawu lawa mahalateliwela yini?

⁵Hikusa afa mangaxavisiwa hi mali ya kutlula madzana mararu (300) leyi afa yitanyikiwa a swisiwana. Kutani afa vahlundrukela lweyi wansati.

⁶Kolahu Yesu aku ku vone: Mutrikani lweyi wansati, n'wingamusoleni, hikusa yene anitireli ntiro wa kuxonga.

⁷A swisiwana n'wina swone minkama hinkwayu, kutani n'wingaswiyentxela a mintxhumu leminene, loko n'wiswirandra, kambe mine n'wingave na mine hi minkama hinkwayu.

⁸Yene ayentxi leswi aswikotiki, ahantli anitota hi mafura mayelano nikuyisiwa kwanga axireni.

⁹Nihlayelamfuri nili ku n'wine: Amisaveni hinkwayu lomu kutakareriwa Ivangeli, kutahlayiwa leswi ahaka kuswiyentxa wansati akuva atadrimukiwa ha swone.

¹⁰Yudasi Iskariyota, mun'we wa vadondrisiwa lava va khume na vabiri, ayikhanela ni vaprista lava vakulu akuva avanyiketa Yesu.

¹¹Vone vanyoxa ngopfu ha swone, vamudumbisa kumunyika mali; kolahu adjuletela a nkama wunene wa kuvanyiketa Yene.

¹²Hi siku dra kusungula dra nkhuvu wa makati lawa mangeke na handrelo, loko kutlhabyiwa a xihambana xa Paska, a vadondrisiwa vakwe vamuvutisi vaku: Xana urandra leswaku hilulamisela kwini akuva uda a Paska?

¹³Kolahu Yene aruma vabiri ku vadondrisiwa vakwe, aku: Fambani amutini, n'witatlhangana ni wanuna na arwali a hotro ya mati. Mulandrani lomu atakanhingena kone,

¹⁴byelani a n'winyi wa yindlu n'wiku: A Mudondrisi avutisa leswaku: Xi kwini xilawu lexi ni takadela ku xone a Paska kun'we ni vadondrisiwa vanga?

¹⁵Yene atan'wikomba xilawu xa yindlu ya le henhla, lexi xilongisiwiki hi hinkwaswu leswi swifanekeliki. Bekisani kone a Paska dreru.

¹⁶A vadondrisiwa vafambiki, vanhingena amutini, vakuma hinkwaswu swanga hi leswi Yesu ava byelisiki xiswone kutani vabekisa a Paska.

¹⁷Driku drapela, Yene afamba kun'we ni lava va khume na vabiri.

¹⁸Vaku na vatrhami atafuleni vada, Yene aku: Nihlayelamfuri leswaku mun'we ku n'wine, adaka na mine ataniwonga.

¹⁹Vone va vaviseka ngopfu vasungula kumuvutisa ha mun'we ha mun'we vaku: Xana hi mine?

²⁰Kutani Yene ayangula aku: I mun'we wa lava khume na vabiri, hi lweyi apetaka a kati kun'we na mine ambengeni.[26]

²¹ Hi xihlayelamfuri a N'wana wa Mhunu atafa swanga hileswi switraliwiki ku Matralwa hikola kwake. Kambe yowee, ku lweyi a N'wana wa Mhunu atakanyiketiwa ha yene! Afa swili swa hombe ku yene loko afa angapswaliwanga!

²²Amakari ka xilalelo, Yesu ateka kati, adrikatekisa, adrikhemelela, anyika vadondrisiwa, aku: Tekani, leyi i miri yanga.

²³Ntrhaku ateka ntrheko, awukatekisa anyika vadondrisiwa vanwa ha wone hinkwavu.

²⁴Kutani aku ku vone: Leswi i ngati yanga, ngati ya xipfumelelanu (lexi ximpswha), leyi yihalateliwaka lava vanyingi.

²⁵Kutani nihlayelamfuri nili ku n'wine, leswaku ningahatlheli ninwa vhinyo, kukondra kutlhasa siku ledri nitakanwa vhinyo drimpswha Afun'wini wa Xikwembu Nkulukumba.

²⁶Ntrhaku ka loko vayimbeleli lisimu vayi Nhaveni ya Minhlwari. [27]

²⁷ Yesu aku ku vadondrisiwa vakwe: Hinkwenu n'witanitrika, hikusa a Matralwa mali: Nitaba a mubyisi a tihamba titahangalaka.

²⁸Kambe ntrhaku ka kuva nipfuki kufeni nitayan'wirangela akuya Galileya.

²⁹Kolahu Petrosi aku: Nambi hinkwavu vakutrika mine ningakutriki!

³⁰Kambe Yesu aku ku yene: Lavisa, Petrosi! Avusikwini byolebyi, na nkuku wungasinayimba kubiri, utava unilandruli kuraru.

³¹Kambe Petrosi afa ahundrisa akuhlaya aku: Nambi swifanekela akuva nifa na Wene, ningaka ningakulandruli. Na vone a van'wana hinkwavu vahlayisa xiswoswo.

³²Ntrhaku vayi mbangwini lowu valiki i Getsemani, Yesu aku ku vadondrisiwa: Trhamisani kola, nahayakhongota.

³³Atekiki Petrosi, na Yakobe, na Yohana, asungula a kutxhuka ngopfu ni kukamiwa ka mbilu,

³⁴kutani aku: Nitwa kuvaviseka ka kufa. Salani kolahu n'wilavelela.

³⁵Aya mahlweninyana, akinsama, akombela ngopfu ku Xikwembu Nkulukumba leswaku loko swingakoteka, angamuhuluxa ku nkama wa nhlomulo.

³⁶Afa aku: Abba, Tatana, ku Wene hinkwaswu swakoteka. Trhindreta a ntrheko lowu kule na mine. Kambe, kungayentxiwi a kurandra kwanga, kambe im'na, akuyentxiwi a kurandra kwaku.[28]

³⁷Ntrhaku atlhelela ku vadondrisiwa, kambe avakumi na vakhutriyela. Kolahu aku ku Petrosi: Simoni, wene wakhutriyela? Awuswikotanga kulavelela hi nkama mun'we xana?

³⁸Hitekani, n'wikhongota, akuva n'wingatihluliwa hi ndringo. A moya waswirandra, kambe a miri mini gome.

³⁹Asukiki mfuri, akuva ayakhongota, na ahlaya maritu wolawo.

⁴⁰Atiki atlhelela ku vadondrisiwa, avakuma na vakhutriyela, hikusa a mahlu yavu afa mabindra. Kutani avativanga leswi vataka muyangula swone.

⁴¹Loko atlheleli ku vone hi dra vuraru, aku ku vone: N'wahakhutriyela ni kuwisa? Swadringana! A nkama wutlhasile, lowu a N'wana wa Mhunu atakanyiketiwa ha wone a mavokweni ya vadohi.

⁴²Sekelekani, ahifambeni. Awata swoswi lweyi aniwongaka.

⁴³Afa Yene ahakhanela loko kakutlhasa Yudasi Iskariyota mun'we wa vadondrisiwa lava va khume na vabiri. Afa atisa a vhanu vanyingi na vahlomi timpanga ni tinhonga. Afa varumiwi hi vaprista lava vakulu, ni vadondrisi va Nawu, ni vakulu va tiko.

⁴⁴A muwongi afa ayingelani na vone hi xikombiso lexi aku: Lweyi nitakamulosa hi kumunyunta hi yene, mukhomani n'wimufambisa hi kutiyisela.

⁴⁵Xikan'we loko Yudasi atlhasi kusuhi na Yesu, aku ku yene: Mudondrisi! Kutani amunyunta.

⁴⁶Van'wana vayisa mavoko a henhla kwake, vamutrimba.

⁴⁷ Ke mun'we wa lava afaka vali kone, ahlomula lipanga, a ba a nandra wa muprista lwenkulu, amutrema ndleve.

⁴⁸Yesu aku ku vone: N'wihumi na n'witameli timpanga ni tinhonga, akuva n'witatanikhoma, swanga hi loko nili xiyivi?

⁴⁹Afa nina n'wine masiku hinkwawu, na nidondrisa a Tempeleni, kambe an'wanikhomanga! Kambe hileswaku a Matralwa mahetiseka.

⁵⁰Hi nkama wolowo a vadondrisiwa vakwe vamutrika kutani vatrutruma hinkwavu.

⁵¹Mun'we wa ndrisanyana, lweyi afaka afunekeli kapulana ntsena amirini afa alandra Yesu, vamukhoma,

⁵²kambe yene asiya a kapulana amandleni yavu, kutani atrutruma na angayambalanga ntxhumu.

⁵³Ntrhaku vayisa Yesu a kaya ka muprista lwenkulu, lomu afaka kuhlengeletani a vaprista lava vakulu ni vakulu va tiko, ni vadondrisi va Nawu.

⁵⁴Petrosi afa alandra Yesu hi le kule, akondra ayanhingena linxonxeni dra muprista lwenkulu. Atrhama kone ni malandra awora ndrilo.

⁵⁵A vaprista lava vakulu ni huvu hinkwayu afa vadjula vumboni bya kurambela Yesu, vatakota a kumudlaya, kambe avabyikumanga.

⁵⁶ Vanyingi afa vabeka vumboni bya madrimi bya kumurambela, kambe a vumboni byavu afa byingapfumelelani.

⁵⁷Kolahu van'wana vasekeleka akuva vatanyika vumboni ni kuhlaya leswaku:

⁵⁸ Hine hamuyingeli aku: Nitabutrhuta a Tempele leyi yiyakiwiki hi mavoko ya vhanu, na hi masiku mararu nitayaka yin'wanyana, leyi yakuka yingayakiwanga hi vhanu.

⁵⁹Kambe nambi swili tanu, amhakeni leyi akuhlaya kwavu afa kungayamukeleki.

⁶⁰Kolahu a muprista lwenkulu ayima amakari ka huvu, kutani avutisa Yesu aku: Xana awuyanguli ntxhumu? Hi swini leswi lava va kurambelaka ha swone?

⁶¹Kambe Yesu amiyela angayanguli ntxhumu. Kolahu a muprista lwenkulu atlhela amuvutisa aku: Hi wene Kriste, N'wana wa Xikwembu Nkulukumba lweyi akhensiwaka, xana?

⁶² Yesu aku: Hi mine. Mfuri n'witavona a N'wana wa Mhunu na atrhami axineneni xa Xikwembu Nkulukumba wa mintamu hinkwayu, apfa hi le henhla ka matlavi ya tilo.

⁶³Hi kuyingela leswo a muprista lwenkulu ahandrula a swiyambalu swake, xikombiso xa kukaneta, aku: Ahahadjuli swikombiso swimbeni.

⁶⁴ N'wiyingelile hi laha Yene asandriki Xikwembu Nkulukumba ha kone! N'wiswivonisa ku yini? Ntrhaku ka leswi, a huvu hinkwayu yitremi leswaku Yene afanekela kuyavanyiseliwa lifu.

⁶⁵ Van'wana vasungula kumuntsekela mari. Vamupfala mahlu, vamuyamasa hi swihahati, ni kumuvutisa vaku: Pfhumba lweyi akubiki loko uli muprofeta. Kutani a malandra mamuyamukela hi kumuba hi swihahati.

⁶⁶Loko Petrosi ahali hansi alinxonxeni, kuhumelela mun'wana wansati, a nandra wa muprista lwenkulu.

⁶⁷Yene avona Petrosi na awora ndrilo, amulavisisa, aku ku yene: Na wene afa uli na Yesu mu-Nazarete!

⁶⁸[29] Kambe Petrosi alandrula, aku: Animutivi, nambi leswi uswihlayaka, aniswiyingelisisi. Kolahu, ahumi aya lixonxeni alikupakupeni kutani hi nkama lowo a nkuku wuyimba.

⁶⁹Kambe a nandra atlhela amulavisisa kutani aku ku lava afaka vali ku mbangu wolowo: lweyi i mun'we wavu.

⁷⁰Kutani yene atlhela alandrula. Hi nkamanyana, lava afaka vali kone vatlhela vaku ku Petrosi: Akuna kuganaganeka ka leswaku u mun'we wavu, hikusa na kone u mu-Galileya.

⁷¹Kutani yene asungula kuhlaya leswaku Xikwembu Nkulukumba amukhatise loko ange xihlayelamfuri. Kutani afunga aku: Animutivi a mhunu lweyo n'wihlayaka yene.

⁷²[30] Hi nomu lo a nkuku wuyimba ka vubiri. Petrosi ahangadrimuka a maritu ya Yesu lawa yaku: A nkuku wungasinayimba utava unilandruli kuraru. Kutani atlhaveka, adrila.