Read ronga Mrk 2 Bible Online

Mrk 2 - ronga bible

Mrk 2

¹Antrhaku ka man'wana masiku, Yesu atlhelela Kapernawume. Kutwala leswaku ali ndangwini wa kukari,

²a vhanu lava vanyingi vahlengeletana, lakakuva kupfumaleka ni mbangu mahlweni ka nyangwa. Yesu afa arera a ritu,

³kutani kutlhasa a vhanu, vamutiselaka a wanuna wa kuwonyana swiro, na a byatrhiwi hi mune wa vavanuna.

⁴Vone-ke loko vahluleka a kumuyisa ku Yesu, hinkonta ya xitrhungu, vakhandriya a lwangwini dra yindlu leyi afaka atrhami ku yone, vapfula pholwa, vanembeleta vunanu lebyi lweyi wa kuwonyana swiro afaka yetleli ku byone.

⁵Yesu, atiki avona kupfumela kwavu, abyela lweyi wa kuwonyana a swiro, aku: N'wananga, udrivaleliwi swidoho swaku.

⁶Kambe afa kuni van'wana va vadondrisi va nawu lava vatrhamiki kone, lava afaka vatipimisela leswaku;

⁷Xana lweyi, ahlayisa xileswo ha yini? Asandra Xikwembu Nkulukumba. Xana hi mani lweyi akotaka kudrivalela a swidoho, loko angali Xikwembu Nkulukumba ntsena?

⁸Yesu ahatliki kuswitiva amoyeni wakwe, leswaku vatipimisela leswo, aku ku vone: Xana mitipimiselela yini timhaka leto andreni kwenu?

⁹Xana kunabyala yini, loko niku ku lweyi wa kuwonyana a swiro: Udrivaleliwi swidoho swaku, kumbe loko niku ku yene: Pfuka, utlakula vunanu byaku, ufamba?

¹⁰Switivani leswaku a N'wana wa Mhunu ani ntamu wa kudrivalela a swidoho amisaveni. Kutani aku ku lweyi wa kuwonyana a swiro:

¹¹Pfuka, utlakula vunanu byaku, utifambela a kaya kwaku.

¹²A mhunu lweyi wa mbabyi ahanga pfuka, ahatla atlakula vunanu, ahuma mahlweni ka hinkwavu, lakakuva vahlamala hinkwavu. Vatwalisa Xikwembu Nkulukumba, vaku: Ahingiswivona swanga hi leswi!

¹³Yesu atlheli ahuma aya nkingeni wa tiva dra Galileya. A xitrhungu hinkwaxu xiya ku yene; kutani avadondrisa.

¹⁴Loko akhaluta, avona Levi, a n'wana Alifewu, lweyi afaka atrhamisi andlwini ya kuhakela ku yone a tinemba, aku ku yene: Nilandre! Levi asekeleka, amulandra.

¹⁵Kuti loko Yesu atrhami akudeni a kaya ka Levi, a vahakelisi vatinemba ni vadohi lava vanyingi vatrhama kun'we na Yesu ni vadondrisiwa vakwe. Hikusa afa vali vanyingi, lava afaka vamulandra.

¹⁶Kambe a vadondrisi va Nawu ni vafarisi vatiki vavona leswaku ada[2] ni vadohi ni vahakelisi va tinemba, vaku ku vadondrisiwa vakwe: Xana, a mudondrisi wenu adela yini ni vahakelisi va tinemba ni vadohi?

¹⁷Yesu atiki awa swiyingela, aku ku vone: Lava vanga vatomi avadjuli n'anga, kambe ntsena lava va vabyaka. Anitelanga kuvitana valulami, kambe im'na, vakuva vadohi.

¹⁸A vadondrisiwa va Yohana Mubabatisi ni va vafarisi afa vatitrona, kutani a van'wana vavu vata ku Yesu vaku: Ha yini a vadondrisiwa va Yohana ni va vafarisi vatitrona, kasi a vadondrisiwa vaku avatitroni?

¹⁹Yesu avayangula aku: Xana a vanakulobye va mulovoli vatitrona, loko yene ahalina vone? A nkama hinkwawu lowo vangani mulovoli avana kutitrona.

²⁰Kambe a masiku matata, lawa a mulovoli atakasusiwa ku vone. Lahuke, vatatitrona, a kusukela a sikwini ledro.

²¹Akuna mhunu lweyi arungelaka xihlama xa kapulana drimpswha ku xiyambalu xakhale, suka a xihlama lexi ximpswha xihandrula a xiyambalu xakhale, ahandrukela dra kone dritabiha kutlulisa.

²²Nakone akuna mhunu lweyi atxhelaka a vhinyo drimpswha aminkwameni ya khale, suka a vhinyu drimpswha drihandrula minkwama; kuhalaka a vhinyo na yone minkwama mihoneka. Kambe vatxhela a vhinyu drimpswha aminkwameni mimpswha.

²³Kuti hi siku dra Savata, loko Yesu ahundra amakari ka masimu, a vadondrisiwa vakwe vasungula kutrhova a switrhetrho swa tirigo akuva vada.

²⁴A vafarisi vavutisa Yesu vaku: Lavisa; xana vayentxela yini leswi a nawu wungapfumelikiki hi Savata?

²⁵Kambe Yesu aku ku vone: Xana a n'wingihlaya leswi Davida angaswiyentxa, loko apfumali swakuda na ani ndlala, yene ni lava afaka vali na yene?

²⁶Anhingeni andlwini ya Hosi, ankameni wa Muprista Abiyatari, ada a makati ya mhamba, lawa amangafanelikiki kudiwa hi vhanu van'wana, loko vangali Vaprista ntsena, ava anyika ni lava afaka ali na vone?

²⁷Kutani Yesu aku ku vone: A Savata driyentxeliwi mhunu, swingali leswaku a mhunu ayentxeliwi Savata.

²⁸Hileswo-ke a N'wana wa Mhunu i Hosi nambi ku dro Savata.