Read ronga Mrk 3 Bible Online

Mrk 3 - ronga bible

Mrk 3

¹Ku drin'wana Savata Yesu atlheli anhingena a sinagogeni, kone afa kuni wanuna lweyi afaka a wonyani voko.

²Kambe afa kuni vhanu lava afaka valavisisa Yesu loko kumbe angamuhanyisa hi siku dra Savata, vatakota ku murambela ha swone.

³Yesu aku ku mhunu lweyi wa kuwonyana a voko: Sekeleka uta la makari.

⁴Kutani aku ku vone: Xana a nawu wenu wapfumela hi Savata, a kuyentxa swinene kumbe swakubiha, kuhuluxa mhunu, kumbe kudlaya xana? Kambe vone vamiyela.

⁵Yesu atiki avarala-rala hi mahlu na ahlundrukile, avaviseka hinkonta yakunonon'hwa ka timbilu tavu, aku ku nuna lweyo: Nalavuta a voko. Ahanga drinalavuta, dritlhela driwololoka.

⁶Vatiki vahuma a vafarisi, vahatla vahlengeletana ni va-Heroda vakhanela makungu ya leswaku xana vatamudlayisa ku yini Yesu.

⁷Kutani Yesu afamba hi tlhelo dra tiva, kun'we ni vadondrisiwa vakwe. A xitrhungu xikulu xi mulandra xipfa Galileya ni le Yudeya,

⁸ni le Yerusalema, ni le Idumeya[3], ni halahaya ka Yordana, ni le tikweni ledri dringa kusuhi ni le Tiri, ni le Sidoni. Vatiki vayingela leswikulu leswi aswiyentxaka, vata ku Yene.

⁹Yesu abyela a vadondrisiwa vakwe leswaku axibyatrhwana xiva kone kusuhi na Yene, hinkonta ya xitrhungu, xingati mukamanyeta.

¹⁰Hikusa afa ahanyisa vanyingi, lakakuva hinkwavu lava vangani vuvabyi vakunyuluta vayatiwisa kusuhi na Yene akuva vamukhumba.

¹¹Na vone lava afaka vani mimoya leyi mimfani, loko vamuvona, vamukhisamela, kutani a mimoya leyi mimfana leyi afaka mili ku vone mibandlukana miku: Wene, u N'wana wa Xikwembu Nkulukumba.

¹²Kambe Yesu afa amikhwavela ngopfu, akuva mingamupaluxi alivaleni.

¹³Yesu antlhantukeli anhaveni, ativitanela lava avadjuliki. Vatrhindrekela ku Yene,

¹⁴ahlawula khume na vabiri, akuva vava na Yene, atavaruma a kurera a Ivangeli,

¹⁵ni kuvanyika a ntamu wa kuhlongola a mademoni.

¹⁶Lava va khume na vabiri angavahlawula hi lava: Simoni lweyi amutxhuliki a vito dra Petrosi,

¹⁷Yakobe na Yohana makwavu, vanga vana va Zebedeya, lava avatxhuliki a vito dra Bowanergesi (hileswaku, Vana vakudruma ka Tilo),

¹⁸na Andreyasi, na Filipi, na Bartolomewu, na Matewu, na Tomasi, na Yakobe n'wana Alifewu, na Tadeya, na Simoni, wa ntlawa wa va Tiko,

¹⁹na Yudasi Iskariyota, lweyi anganyikela Yesu.

²⁰A nkameni wun'wana, Yesu ayi ndangwini wa kukari. A xitrhungu xitlhela xihlengeletana, lakakuva Yesu ni vadondrisiwa vakwe vahluleka ni kuda.

²¹Vatiki vaswiyingela a valekwavu, vatata mukhoma, hikusa afa vaku[4] ahambani nhloko.

²²A vatrali lava vafulameliki, vapfa Yerusalema, vaku: Ani Beelzebule; ahlongola mademoni hi ntamu wa mufumi wa mademoni.

²³Kutani Yesu avavitana, avabyela xifaniso aku: Xana Sathana angaswikotisa ku yini kuhlongola Sathana?

²⁴Ni loko a mfumu wutravukanile, a mfumu lowo awuswikoti kutiya.

²⁵Ni loko a ndangu wutravukanile, a ndangu lowo awuswikoti kutiya.

²⁶Ni loko Sathana atilwisa ali yene, atravukana ha vuswake, angaswikoti kutiya, kutava kuhela kwake.

²⁷Kambe akuna mhunu lwyi anganhingenaka andlwini ya lweyi wa ntamu, ni kuphanga a vukosi byake, loko angaranganga atrimba lweyi wa ntamu, hi kone atakaphanga a yindlu yake.

²⁸Nihlayelamfuri nili ku n'wine: A vana va vhanu vatadrivaleliwa a swidoho swavu hinkwaswu, ni swisandru hinkwaswu leswi vasandriki ha swone.

²⁹Kambe lweyi ataka sandra a Moya wa Kuxwenga angaka angadrivaleliwi hi la kungahelikiki. Kambe atava ni nandru wa xihono lexi xakuka xingaheli.

³⁰Yesu ahlaya leswo hi leswi afaka vati: Yene ali ni moya lowu mfani.

³¹Kutani kutlhasi a mamana wa Yesu ni vamakwavu vayima handle. Varumela kuya muvitana.

³²A xitrhungu afa xitrhamile ximutrhandrela makari, vaku ku yene: Lavisa, a mamana waku ni vamakwenu vakola handle, vakudjulaka.

³³Avayangula aku: Xana a mamana wanga i mani, ni vamakweru i vamani?

³⁴Kutani aralarala lava vatrhamisiki, vamutrandrela makari, aku; Hi lava, a mamana wanga ni vamakweru.

³⁵Hikusa lweyi ayentxaka a kurandra ka Xikwembu Nkulukumba, hi yene a makweru wa xinuna ni makweru wa xisati, ni mamana wanga.