Read ronga Mrk 4 Bible Online

Mrk 4 - ronga bible

Mrk 4

¹Yesu atlhela aya dondrisa kusuhi ni tiva dra Galileya. A xitrhungu xikulu ngopfu xihlengeletana ku yene, lakakuva anhingena byatrhwini, atrhamisa ku drone. A xitrhungu afa xili nkingeni wa tiva.

²Afa a vadondrisa swakutala hi swifaniso, akudondriseni kwake afa aku ku vone.

³Yingisetani! Kahumi mubyali ayabyala.

⁴Akubyaleni kwake tin'we tinhleke taweli ndleleni, a tinyanyana titatada hinkwatu.

⁵Tin'wana tinhleke tiwela a maribyeni, laha kungeke na misava yakutala. Tihatla timila, hileswi misava mingatalangakiki.

⁶A dambu driku dratlhava, tibuna hi leswi tingekena mitru.

⁷Tin'wana tiyawela amitweni, a mitwa mimila, mitikamalata, tingabeki mihandru.

⁸Kambe a timbewu tin'wana tayi wela a misaveni leminene, tikula, tirumbuka tibeka a mihandru ya kuyandra, kutlhasa makume mararu, ni le ku ntlhanu wa makume na kume drin'we, ni le ku dzana (100), ha yin'we ha yin'we

⁹Kutani aku ku vone: Lweyi anganitindleve ta kuyingela, ayingiseti!

¹⁰Loko xitrhungu xifambile lava vangasala na Yene kun'we ni lava khume na vabiri, vamuvutisisa hita xifaniso.

¹¹Yene aku ku vone: N'wine, n'winyikiwi kutiva xihundla xa Mfumu wa Xikwembu Nkulukumba, kasi ku lava va le handle, hinkwaswu swiyentxiwa hi swifaniso,

¹²akuva nambi vavona, vangavonisisi, nambi vayingela vangayingelisisi, akuva vangatitlhelela ku Xikwembu Nkulukumba vadrivaleliwa swidoho swavu.

¹³Yene aku ku vone: Loko n'wingayingelisisi xifaniso lexi, xana n'witayingelisisa kuyini swifaniso swin'wana?

¹⁴A mubyali hi lweyi ahangalasaka Ivangeli.

¹⁵Kambe a tinhleke leti tiweliki andleleni hi lava loko vayingela a ritu, Sathana ahatlaka ata, asusa a ritu ledri dribyaliwiki andreni kwavu.

¹⁶A vhanu van'wana vafana ni mbewu leyi yiweliki maribyeni, vatiki loko vayingela a ritu vadriyamukela hi kutrhava,

¹⁷kambe avana mitru andreni kwavu, i va nkamanyana ntsena. A ntrhaku-ke, loko a nhlomulo kumbe kuxaniseka hinkonta ya ritu dra Xikwembu Nkulukumba, swihumelela, vakhunguvanyeka vatrika xikan'we.

¹⁸A van'wana hi mbewu leyi yiweliki mitweni; lava vayingelaka ritu dra Xikwembu Nkulukumba,

¹⁹kambe akuhlatiyela hi swa misava leyi ni kukanganyisiwa hi vukosi, ni ku navela swin'wana, swinhingena swikamalata a ritu driva dripfumala ni mihandru.

²⁰Kambe lava vabyaliwiki amisaveni leminene, hi lava vayingelaka a ritu dra Xikwembu Nkulukumba, vava vadriyamukela, vabeka mihandru, a nhleke yin'we makume mararu (30), yin'wana kambe ntlhanu wa makume na kume drin'we (60), yin'wana dzana (100).

²¹Yene ayengeti aku ku vone: Xana a motre vawulumeka akuva wutabekiwa a hansi ka xihundru, kumbe ahansi ka vunanu? Xana ahi leswaku wuhayekiwa ahenhla ka tafula?

²²Hikusa akuna xa ntxhumu lexi fihliwiki, lexakuka xinga tikombisiwa livaleni, na kone akuna xantxhumu lexinga xihundleni, lexi xakuka xinga tita alivaleni.

²³Loko a mhunu ali ni tindleve ta kuyingela, ayingiseti!

²⁴Kutani ayengeta aku ku vone: Tivonelani ku leswi n'wiswiyingelaka! A mpimu lowu n'witakapima van'wana ha wone, hi wolowo n'witakapimiwa ha wone na n'wine hi Xikwembu Nkulukumba, mfuri n'witayengeseliwa.

²⁵Hikusa lweyi anganaswu, atanyikiwa, kambe lweyi angekenantxhumu, atatekeliwa ni leswi anganaswu.

²⁶Atlhela avabyela aku: A Mfumu wa Xikwembu Nkulukumba wufana ni mhunu lweyi axuviki mbewu amisaveni;

²⁷ayetlela, apfuka, vusiku ni nhlikanhi, a mbewu yitlhava, yimila, na angativi mamilela ya yone.

²⁸A misava ha swa yone mibeka mihandru: kuhumelela kusunguleni a ximilwa, antrhaku a moko, antrhaku a nhleke.

²⁹Kambe a mihandru, loko miwupfile, vasungula a kunhingenisa kone a sikela, hikusa a nkama wa kutrhovela wutlhasile.

³⁰Kutani avabyela aku: Xana hitafanisa a Mfumu wa Xikwembu Nkulukumba ha yini, kumbe hitawubeka axifanisweni xini, xana?

³¹Wufana ni nhleke ya nsinya wa sinapi, leyi yibyaliwaka na yili leyitrongo ku timbewu hinkwatu tinga misaveni.

³²Kambe loko yibyaliwile yikula, yitlula swimilwa hinkwaswu, yihamba tinkambu tikulu lani kakuva a tinyanyana ta tilo titata tihambela a vusaka atinkambyini ta wone.

³³Afa a dondrisa ritu hi swifaniso swakutala, hi laha vakotiki kuyingelisisa ha kone.

³⁴Afa angakhaneli navu loko kungali hi swifaniso, kambe afa atlhamuxela hinkwaswu ku vadondrisiwa vakwe loko vali vuswavu.

³⁵Asikwini droledro, loko dambu dripelile, ati ku vadondrisiwa vakwe: Ahiweleleni halahaya ka tiva.

³⁶Kutani vatlhelisa xitrhungu, vamuteka hi byatrhu ledri afaka ali ku drone. A man'wana mabyatrhu afa mali na vone.

³⁷Kutani kuhumelela a xidzedze xikulu, a mavimbi afa matlakuka, la kakuva a byatrhu drisungula ni kutala hi mati.

³⁸Kambe Yene afa ali nyalwini, akhutriyelile na abeki a nhloko a xidan'wini. A vadondrisiwa vahangamupfuxa, vaku: Mudondrisi, xana awuswivoni leswaku hasuva?

³⁹Yene apfuka, akhwavela mheho, yiyima ni mavimbi marula.

⁴⁰Kutani aku ku vone: Xana n'wini vutoya hayini? An'wisivana kudumba xana?

⁴¹Vone, vatxhava ngopfu, vabyelana vaku: Xana lweyi i mani, a mhunu lweyi na yone mheho ni mavimbi, swimuyingisetaka?