Read ronga Mrk 8 Bible Online

Mrk 8 - ronga bible

Mrk 8

¹Amasikwini lawo katlheli kuva ni xitrhungu xikulu, loko kungahali na swakuda, Yesu avitana a vadondrisiwa aku ku vone:

²Nitwela vurombe a xitrhungu lexi, hikusa i masiku mararu na vatrhamisi ku mine na vangana ntxhumu xa kuda.

³Ni loko nivatlhelisela ma kaya kwavu na vangadanga, vatahela ntamu andleleni. Mfuri van'we ku vone vapfa kule.

⁴A vadondrisiwa vakwe vamuyangula vaku: Xana hingaswikuma kwini a swakuda swa vhanu vanyingi kola huleni?

⁵Yene avavutisa aku: Xana n'wina makati mangani? Vone vaku: Ntlhanu na mabiri.

⁶Ahangaleleta a xitrhungu leswaku xitrhamisa hansi, Kutani ateka a ntlhanu wa makati na mabiri, atlangela Xikwembu Nkulukumba, akhemelela, anyika a vadondrisiwa akuva vayavela vhanu, kutani vone vavayavela.

⁷Nakone afa vani tinhlampfinyana tinge-tingani, atikatekisa anyika vadondrisiwa akuva vatiyavela na tone ku vhanu.

⁸A vhanu vada vaxura vava vatata ntlhanu wa swihundru na swibiri hi swibuvu leswi swisaliki.

⁹Kambe afa vatlula mune wa makume ya madzana (4000), ya vhanu. Kutani Yesu avatlhelisa.

¹⁰Ahatla anhingena byatrhwini kun'we ni vadondrisiwa vakwe, vaya tikweni dra le Dalmanuta[14]

¹¹Ka kutlhasa van'we va vafarisi, vasungula kukanetana na Yene. Afa vadjula akuva anyika xikombiso, ayentxa a xikombiso xa le Tilweni.

¹²Yene ahefemula ahikeni drakwe aku: Xana hayini a lixaka ledri, drikombela a xikombiso? Nihlayelamfuri nan'wibyela: Kungatinyikiwa xikombiso ku lixaka ledri.

¹³Kutani asuka, atlhela anhingena byatrhwini awelela halahaya ka tiva.

¹⁴A vadondrisiwa afa vadrivali kuteka a makati, mfuri afa vangena ntxhumu abyatrhwini loko dringe kati drin'we ntsena.

¹⁵Kutani Yene avaleleta aku: Lavisani! Tivonelani ku handrelo ya vafarisi ni handrelo ya Heroda.

¹⁶Kutani a vadondrisiwa afa vakanetana vaku: Ahlaya leswo hi leswi hingekena makati.

¹⁷Yesu aswiyingela, aku ku vone: Xana n'wikanetelana yini hi leswi n'wingekena makati? Xana an'wisina yanakanya ni kuyingelisisa ntxhumu xana? Mahanonon'hwa atimbilwini tenu kuyingelisisa?

¹⁸Leswi n'wingani mahlu ni tindleve ha yini n'wingavoni ni kuyingela, xana? An'widrimuki,

¹⁹ loko nikhemeleli ntlhanu wa makati ku lava va ntlhanu wa makume ya madzana (5000) ya vhanu? Xana n'witati swihundru swingani hi mantlhantlha, xana? Vaku ku Yene: Khume na swibiri.

²⁰Ni loko nikhemeleli makati lawa ya ntlhanu na mabiri ku vhanu va kutlula mune wa makume ya madzana (4000) n'waroleli mantlhantlha kutala swihundru swingani xana? Vaku ku Yene: Ntlhanu na swibiri.

²¹Ahangavabyela aku: Xana an'wisina yingelisisa ntxhumu?

²²Kutani Yesu ni vadondrisiwa vatlhasa a Betsaida. A vhanu vatisa mun'we wa kufa-mahlu vamukombela leswaku amukhumba.

²³Yene akhoma lweyi wa kufa-mahlu hi voko, amuyisa a handle ka muti. Loko athukeli mari ku mahlu yake, amuntlhanteka mavoko, amuvutisa aku: Xana uvona xa txhumu?

²⁴A wanuna lweyo apfula a mahlu ayangula aku: Nivona a vhanu, nivavonaka vafamba swanga i minsinya!

²⁵Atlhela antlhanteka a mavoko amahlweni ya mhunu lweyo, yene asungula ku vona hi kuhetiseka, lakakuva avona hinkwaswu swinene.

²⁶Yesu amutlhelisela a kaya kwake, na aku ungahanhingeni mutini.

²⁷Kutani Yesu asuka kun'we ni vadondrisiwa vakwe, aya mitanini ya le Khezareya wa Filipi! Vaku na vahali ndleleni a vutisa vadondrisiwa vakwe aku: Xana a vhanu vali ni mani?

²⁸Vaku ku yene: Van'we vali u Yohana Mubabatisi, a van'wana vali u Eliya, a van'wana kambe vali u mun'we wa vaprofeta.

²⁹Yesu ayengeta avavutisa aku: N'wine-ke, n'wili ni mani xana? Petrosi ayangula aku ku yene: Wene u Kriste.

³⁰Kambe avalaya leswaku vangabyeli mhunu a takwe.

³¹Kolanu, asunguli kudondrisa a vadondrisiwa vakwe leswaku swifanekeli a N'wana wa Mhunu atwisiwa kuvaviseka loku kulu, ni kutxukumetiwa hi vakulu va tiko ni vaprista lava vakulu ni vadondrisi va Nawu, ava adlawa, atlhela apfuka kufeni loko kuhundri masiku mararu.

³²Afa avabyela a ritu ledro alivaleni. Petrosi amutekela tlhelweni asungula kumulaya hikuva ahlayi leswo.

³³Kambe Yene andruluka avona vadondrisiwa vakwe alaya Petrosi aku: Suka lani ku mine Sathana! Hikusa awuyanakanyi swa Xikwembu Nkulukumba kambe uyanakanya a swa vhanu.

³⁴Kutani avitana a xitrhungu kun'we ni vadondrisiwa vakwe, aku ku vone: Loko a mhunu arandra a kunilandra, atiyale, atirwexe xihambano xakwe anilandra.

³⁵Hikusa lweyi arandraka kuhuluxa a vutomi byake atabyilahla, kambe lweyi atakalahla a vutomi byake ha mine ni hi dondriso dranga, yene atabyihuluxa.

³⁶Hikusa switamupfuna yini a mhunu, nambi afuya a misava hinkwayu, hi vugamu atilahla?

³⁷A mhunu anganyika yini a kuxava a hika drakwe?

³⁸A mhunu lweyi atakavani tingana ha mine ni maritu yanga amakari ka lixaka dra kusandra, ni dra kudoha, a N'wana wa Mhunu na yene atava ni tingana ha yene, a siku atakabuya hi kuphatima ka Tatana wakwe, kun'we ni swirun'wa leswi swakuxwenga.