Read ronga Lk 10 Bible Online

Lk 10 - ronga bible

Lk 10

¹A ntrhaku ka swone, Hosi Yesu ahlawuli van'wana va ntlhanu wa makume na makume mabiri na vabiri (72), avaruma ha vabiri-vabiri amahlweni kwake, amitini hinkwayu ni le mimbangwini hinkwayu lomu atakafamba ha kone.[18]

²Afa aku ku vone: A ntrhovelo i wukulu, kambe a vatiri i vatrongo. Kombelani-ke ku n'winyi wa ntrhovelo aruma a vatiri akutrhoveleni kwake.

³Fambani; lavisani, nin'wiruma n'wili swanga hi tihamba a makari ka timhisi.

⁴N'wingatekeni a nkwama, nambi yi hwama ni swifambu. Mfuri n'wingaloseni mhunu andleleni.

⁵A ndangu lowu n'witakanhingena ku wone, rangani n'wiku: A kurula akuve andangwini lowu.

⁶Loko a mhunu wa kurula ekone kolahu, a kurula kwenu kutava henhla kwake; loko ange kone kutatlhelela ku n'wine.

⁷Trhamisani andangwini wolowo, n'wida, n'winwa leswi vatakan'winyika swone, hikusa a mutiri afanekeli hi hakelo drakwe. N'wingasukeni n'wiya ndangwini wun'wana ni wun'wana.

⁸Ni loko n'winhingena a mutini wakukari ni wakukari, van'wiyamukela, danani leswi van'wibekelaka swone;

⁹n'wiva n'wihanyisa timbabyi leti tinga ku wone, n'wivabyela n'wiku: A Mfumu wa Xikwembu Nkulukumba wutlhasile ku n'wine.

¹⁰Kambe loko n'winhingena amutini wakukari ni wakukari vangan'wiyamukeli, humani n'wiya atindleleni ta wone, n'wiyavabyela n'wiku:

¹¹Antrhuri wa muti wenu lowu wuhinamareliki hiwuphumunela ku n'wine. Nambi swili tanu, switivani leswaku a mfumu wa Xikwembu Nkulukumba wutlhasile.

¹²Yesu aku natiyisa ku n'wine leswaku: Asikwini ledro, a xikhatiso xitavevuka ku Sodoma kutlula ku muti lowo.

¹³Yowee Korazini! Yowee Betsayida! Hikusa a mahlolana lawa mayentxiwiki amakari kwenu, loko fanga mayentxiwi amitini ya Tiri na Sidoni, inha mindruluki khale miyambala a saka, mitola ni nora.

¹⁴Hileswo-ke ku Tiri ni le ku Sidoni kuta vevuka, akuyavanyisiweni, akutlula ku n'wine.

¹⁵Na wene Kapernawume, xana afa udjula akutitlakuxa kuyatlhasa Tilweni? Utatrongahatiwa akuya tlhasa Kheleni!

¹⁶Ntrhaku abyela a vadondrisiwa aku: Lweyi an'wiyingelaka, awa niyingela; nangweso lweyi an'widrelaka, awanidrela; mfuri lweyi anidrelaka adrela lweyi anirumiki.

¹⁷A vadondrisiwa lava va ntlhanu wa makume na makume mabiri (70), vabuya hi kutrhava vaku: Hosi, nayo mimoya lemimfani amihluliwa ha hine loko hikhanela hi vito draku:

¹⁸Yesu aku ku vone: Afa nihlalela Sathana na awa, apfa tilweni swanga hi lihati.

¹⁹Yingisetani! Nin'winyiki a ntamu wakukandretela tinyoka ni mibalana ni le henhla ka ntamu hinkwawu wa nala; akuna xa kuva xitaka n'wihona ha ntxhumu.

²⁰Nambi swilitanu, n'winganyoxeni hi leswi a mimoya mihluliwaka ha n'wine. Kambe nyoxani hi leswi a mavito yenu matraliwiki Matilweni.

²¹Ankameni lowo Yesu atitrhaveli Moyeni wa kuxwenga aku: Nakukhensa Tatana, Hosi ya Tilo ni misava, hi leswi ungafihlela a tintlhari ni vayingeli a timhaka leti, we kutipfuletela ku vatrongwana. Ahina, Tatana, nakutlangela hikuva we kuyentxa hi kurandra kwaku.[19]

²²Hinkwaswu ninyikiwi ha Tatana. Nakone akuna mhunu lweyi ativaka lweyi N'wana anga yene, loko ange Tatana: nambi lweyi Tatana anga yene, loko ange N'wana, ni lweyi a N'wana arandraka kumupfuletela yene.

²³Andrulukeliki ku vadondrisiwa nave swavu, aku: Makatekile a mahlu lawa mavonaka leswi n'wiswivonaka.

²⁴Hikusa nan'wibyela leswaku a vaprofeta lava vanyingi ni vafumi va swirandrile ku vona leswi n'wiswivonaka kambe avaswivonanga; ni kuyingela leswi n'wiswiyingelaka, kambe avaswiyingelanga.

²⁵A mun'we wa mudondrisi wa Nawu, asekeleka adjula a kudringa Yesu aku: Mudondrisi, xana akuva nitakuma a vutomi lebyi byingahelikiki hi loko niyentxa yini xana?

²⁶Yesu aku ku yene: Kutraliwi yini anawini, xana uwuhlayisa ku yini?

²⁷ Ayangula aku: Utarandra Hosi Xikwembu Nkulukumba waku hi mbilu yaku hinkwayu, ni hi hika draku hinkwadru, ni hi ntamu waku hinkwawu, ni hi kuyanakanya kwaku hinkwaku. Urandra ni mhunukuloni swanga hi loko utirandra.

²⁸Yesu aku ku yene: Uyanguli swone. Yentxa swoleswo, utahanya.

²⁹Kambe a mudondrisi wa Nawu hi kudjula kutilulamisa, aku ku Yesu: A mhunukulori i mani?

³⁰Yesu amuyanguli aku: A mun'we mhunu afa afulamela, apfa Yerusalema aya Yeriko. Awa amandleni ya tinsulavoya, timususa a swiyambalu, timubalesa timbanga, tisuka timusiya ne kusuhi ni kufa.

³¹Kahangahumelela leswaku mun'we wa muprista afulamela hi ndlela yoleyo. Kuti loko amuvona, atingawula.

³²Hi swoswo lweyi wa Mulevi na yene, akhaluta hi mbangu lowo, amuvona, atingawula.

³³Kambe a mun'we mu-Samariya lweyi ayendraka atlhasa kolahu, amuvona, amutwela vurombe.

³⁴Atrhindrekela, amutrimbelela timbanga, atitxhela hi mafura ni vhinyo. Kutani a mukhandriyisa ku xifuyu xakwe, amuyisa andlwini ya vayendri, a mulondra kone.[20]

³⁵Byiku byaxa, a humexa a matxheleni mabiri, anyika lweyi wa n'winyi wa yindlu, aku: Mulondre, nikondra nibuya, nitakutlhelisela ni leswi utakaswihumexa kutlula leswi.

³⁶Yesu aku ku mudondrisi wa Nawu: Xana hi wini ku lava vararu lweyi utakaku avi mhunukulobye wa lweyi angawela amandleni ya tinsulavoya xana?

³⁷Aku: Hi lweyi angamuyentxela lilondro. Yesu ahangaku ku yene: Famba uya yentxisa xiswoswo na wene.

³⁸Akufambeni ka Yesu ni vadondrisiwa vakwe, anhingeni a mutanini wun'we, kutani lweyi wansati a vito drakwe afaka ali Marta ayamukela Yesu andangwini wakwe.

³⁹Afa ani makwavu lweyi a vito drakwe afaka ali Maria, lweyi angayatrhama aminengeni ya Hosi, ayingela ritu dra Yone.

⁴⁰Kambe Marta afa adrivatiwa hi mintiro leyi minyingi, atrhindrekela ku Yesu aku: Hosi, xana ahi ntxhumu ku wene loko makweru anitrika nitira vuswanga, xana? Mubyele atatanipfunisa.

⁴¹Kambe Yesu ayangula aku ku yene: Marta, Marta, utihlatiyelisela yini, utikarata hi leswi swinyingi,

⁴²kasi i xin'we ntsena lexi xidjulekaka. Kambe Maria atihlawuleli a yavelo ledri drinene ledri angatikitekeliwa.