Read ronga Lk 11 Bible Online

Lk 11 - ronga bible

Lk 11

¹Nkama un'wana Yesu akukhongoteni kwake ku un'wanyana mbangu, loko ahetile, mun'we ku vadondrisiwa vakwe aku ku yene: Hosi, hi dondrise kukhongota, swanga hileswi Yohana Mubabatisi angadondrisa a vadondrisiwa vakwe.

²Yesu aku ku vone: Loko n'wikhongota, hlayani n'wiku: Tatana a vito draku adrihlawuliwe. Awute a Mfumu waku.

³Hihanane a swakuda sweru swa siku drin'wana ni drin'wana.

⁴Hidrivalele a swihono sweru, swanga hi leswi na hine hi drivalela mun'wana-ni-mun'wana lweyi angani nandru ku hine. Nakone ungahitrike hiwela mindringweni.

⁵Yesu ayengesa aku ku vone: Kungaku loko a mun'we ku n'wine ani nakulobye, aya ku yene a makari ka vusiku, aku: Nakulori, nivoleke a makati mararu,

⁶hikusa a nakulori lweyi wa mufambi ahambukeli ku mine, kambe anina swakumufihluta ha swone.

⁷Hinga pimisani loko lweyi anga ndlwini angamuyangula aku: Unganikarate! Mfuri a nyangwa yipfaliwile, a vatrongwana vanga vana mine avunan'wini. Aninakupfuka nikuhanana makati.

⁸Yesu ayengeta aku: Nan'wibyela nili, nambi loko angaka angapfuki amunyika a makati, a vugamu atapfuka amunyika hinkwaswu leswi aswidjulaka, angali hikuva nakulobye, kambe ali hikuva angahatimukarata.

⁹Hikola ka leswo nili ku n'wine, kombelani n'witanyikiwa hi Xikwembu Nkulukumba, djulani n'witaswikuma, gongondrani n'witapfuleliwa.

¹⁰Hikusa lweyo ni lweyo lweyi akombelaka awanyikiwa; lweyi adjulaka awaswikuma; ni lweyi agongondraka atapfuleliwa.

¹¹Xana tatana ku n'wine hi wini, lweyi anhaka loko a n'wanakwe akombela a kati angamunyikaka a ribye? Ni loko akombela nhlampfi, xana angamunyika a nyoka matrhan'wini ya nhlampfi xana?

¹²Kumbe loko akombela a tandra, angamunyikaka mubalana xana?

¹³Nambi n'wine n'wingalava vamfani n'wiswikotaka a kuhanana a vanenu leswi swinene, angopfu Tatana lweyi wa le Tilweni atanyika a Moya wakuxwenga ku lava vakombelaka ku yene!

¹⁴Yesu afa ahlongola a demoni ledri afaka drili mbheveve. A demoni dritiki drahuma, a mhunu lweyo asungula a kuvulavula. A switrhungu swihlamala.

¹⁵Kambe a van'we ku vone vaku: Ahlongola mademoni hi ntamu wa Belzebule, mufumi wa mademoni.

¹⁶A van'wana nangweso vamudringa vakombela a xikombiso lexi xipfaka ku Xikwembu Nkulukumba.

¹⁷Kambe Yesu hi kutiva amiyanakanyu yavu, aku ku vone: A mfumu un'wana ni un'wana lowu wutravukaniki hi le makari, wutandruluka hula, ni tiyindlu ta kone tiwelana henhla.

¹⁸Naye Sathana ke loko atravukanisiwi hi le makari, xana a mfumu wakwe wutayimisa kuyini? Leswi n'wiliki nihlongola mademoni ha Belzebule.

¹⁹Ke, loko mine nihlongola mademoni ha Belzebule, xana a vanenu vamahlongola ha mani? Hileswo-ke hi vone vatakava vatremi venu.

²⁰Kambe loko nihlongola a mademoni hi ntamu wa Xikwembu Nkulukumba, hileswaku a Mfumu wa Xikwembu Nkulukumba wutlhasile swoswi ku n'wine.

²¹Lweyi wa ntamu loko ahlomile, alavelela a yindlu yake, a nhlengwe yake yitrhamisekile swinene,

²²kambe loko lweyi amutlulaka hi ntamu ata, amuhlula, amutekela ni swihlomo leswi afaka a dumbi swone, ayava ni leswi aswiwutliki ku yene.

²³Lweyi angeke na mine, alwa na mine, naye lweyi wakuka anga nhlengeleti na mine, awa hangalasa.

²⁴Yesu aya mahlweni aku: Loko a moya lowu mfani wuhumi mhunwini, wutifambela hi mimbangu leya kuwoma, wuyadjula kuwisa; wunga kukumi, wuku: Nitabuyela andlwini yanga leyi ninga huma ku yone.

²⁵Wutiki wata, wuyikuma na yikukuliwile, yiva yilongisiwa.

²⁶Wahanga famba wuyatitekela min'wana mimoya ya ntlhanu na mibiri leyi miwutlulaka hikuva mimfani, minhingena, miyatrhama kone. A mahanyela ya mhunu lweyo mahanga biha kutlula lawa ya kusungula.

²⁷Yesu aku aheta kuhlaya leswo, lweyi wansati, axitrhungwini atlakuxa ritu aku ku yene: Akatekile lweyi akubelekiki, ava akuyan'wisa.

²⁸Kambe Yesu aku: Ngopfu vakatekile lava vayingelaka Ritu dra Xikwembu Nkulukumba vava vadribekisa.

²⁹A switrhungu loko swihlengeletani ku Yesu, asungula kuvabyela aku: A lixaka ledri i lixaka ledrimfani; dridjula xikombiso, kambe dringaka dringa nyikiwi xikombiso, loko xinge xikombiso xa muprofeta Yona.

³⁰Hikusa swanga heswi Yona angava xikombiso xa Xikwembu Nkulukumba ku va-le-Ninivha, hi swoswo naye N'wana wa Mhunu atava xikombiso ku lixaka ledri.

³¹A mufumi wa xisati wa le nyingitimu ata sekeleka, akuyavanyiseni, kun'we ni vavanuna va lixaka ledri, atavayavanyisa, hikusa apfi vugan'wini bya misava, atatayingela vutlhari bya Salomoni, kasi akone kola lweyi atlulaka Salomoni.

³²A vavanuna vale Ninivha vatasekeleka, akuyavanyiseni, kun'we ni lixaka ledri, vadriyavanyisa hikusa vandrulukile loko vakhongoteliwa hi Yona. Kasi akone kola lweyi atlulaka Yona!

³³Akuna mhunu lweyi, loko alumeki motre, awubekaka lomu kakufihleka, kumbe ahansi ka xihundru. Awubeka ahenhla, akuva lava nhingenaka vavona ku vaninga ka wone.

³⁴A motre wa miri yaku i tihlu draku. Loko a tihlu draku drili drinene, a miri yaku hinkwayu mitavaningiwa. Kambe loko dribihile, nayo miri yaku mi le munyameni.

³⁵Tivone-ke, suka akuvaninga loku kunga ndreni kwaku, kuva munyama.

³⁶Loko a miri yaku hinkwayu mivaningiwa, kungena mbangu wakuva munyameni, mitavaningiwa hinkwawu swanga hi loko a motre wuvaninga hi kuvaninga ka wone.

³⁷Yesu aku na ahavulavula, amun'we wa mufarisi a mukhongota kuyada na yene. Anhingeniki atrhama kudeni.

³⁸Kambe lweyi wa mufarisi, loko amuvona, ahlamala hi leswi angarangangakiki a hlamba a mavoko na angasanganada.

³⁹Kambe Hosi yiku ku yene: Hileswo n'wine vafarisi n'wibasisa ahandle ka ntrheko ni mbaka, kasi andreni kwenu kutali hivuyivi ni vubihi.

⁴⁰Masinge ndrun'wine! Xana lweyi angahamba a swale handle angahambanga ni swalendreni xana?

⁴¹Hananani swisiwana kusungula ku leswi n'winganaswu, hi kone n'witaka basiseliwa hinkwaswu.

⁴²Kambe yowee n'wine vafarisi! Hikusa n'winyika a swa vukhume bya ximbowana ni bya muhensa ni timbowa hinkwatu, kasi n'widrela kululama ni lirandru dra Xikwembu Nkulukumba! Afa swifanekela a kuyentxa mintxhumu leyo n'wingaswitriki ni kuyentxa yin'wana.

⁴³Yowee n'wine vafarisi! N'wirandraka vutrhamu bya kuranga amasinagogeni ni kulosiwa a tihubyini.

⁴⁴Yowee n'wine, vatrali ni vafarise vamandrendre, n'wifana ni maxira lawa yakuka mangavoneki, a vhanu vafambaka a henhla ka wone na vangaswitivi!

⁴⁵Amun'we ku vadondrisi va Nawu aku ku yene: Mudondrisi, hikuhlaya leswo wahikhunguvanyisa na hine.

⁴⁶Yesu aku: Yowee na n'wine vadondrisi va Nawu, hikusa n'wirwexa a vhanu a mintrhwalu leyi ya kuka mingarwaleki, kasi n'wine an'wimikhumbi nihi litiho drin'we drenu.

⁴⁷Yowee n'wine, hikusa n'wiyaka a maxira ya vaprofeta lava a vatatana venu vangavadlaya.

⁴⁸Hileswo-ke n'witimboni ta leswaku n'wapfumela mintiro ya vatatana venu, hikusa vone vavadlayile, n'wine n'wiyaka maxira.

⁴⁹Hilaha-ke na byo vutivi bya Xikwembu Nkulukumba byihlayiki byiku: Nitavarumela vaprofeta ni vapostola, a van'we vata vadlaya, vataxanisa van'wana;

⁵⁰Akuva ku lixaka ledri kudjuliwa ngati ya hinkwavu vaprofeta, leyi yingahalatiwa kusukela akutumbuluxiweni ka misava,

⁵¹akusungula hi ngati ya Abele, a kuyatlhasa angatini ya Zakariya, lweyi angadlayiwa a makari ka vuhiselo bya timhamba ni mbangu wa Vuhlawuleko. Ahina! Nan'wibyela nili: Xikwembu Nkulukumba atakhatisa a lixaka ledri dra nguva leyi.

⁵²Yowee n'wine, vadondrisi va Nawu hikusa n'wisusi mpfungulu wa kutiva vukhongoti n'wine n'winganhingeni, kutani n'wisivela ni van'wana lava vadjulaka kunhingena.

⁵³Yesu na ahahuma, a vadondrisi va Nawu ni vafarisi vasungula kumukarata ngopfu, vamuvutisa a swivutiso leswi swakutala,

⁵⁴vamureya vatakuma hi vutlhari a ritu ledri drihumaka a non'wini wakwe.