Read ronga Lk 15 Bible Online

Lk 15 - ronga bible

Lk 15

¹A vahlengisi hinkwavu ni vhanu va mahanyela ya kubiha afa vatrhindrekeli ku Yesu vata muyingela.

²A Vafarisi ni vadondrisi va Nawu van'unun'utela vaku: Lweyi, ayamukela vadohi ada navu.[22]

³Yesu avabyela xifaniso lexi aku:

⁴Xana hi wini mhunu ku n'wine, lweyi angani dzana dra tihamba, alahlekeliwa ha yin'we kutone; anaka angatriki leti ta ntlhanu wa makume na mune ni ntlhanu na mune anhoveni, afamba ayadjula leyi ya kulahleka akota ayikuma?

⁵Kuku loko ayikumile, ayibyatrha makatleni na atrhavile,

⁶ayatlhasa kaya, avitana vanakulobye ni lava ayakelaniki navu, aku ku vone: Trhavani na mine, hikusa nikumi hamba yanga leyi afaka yilahlekile.

⁷Nili ku n'wine, hiswoswo akutrhava kutava kone Matilweni, hinkonta ya mudohi mun'we lweyi andrulukiki, akutlula valulami va ntlhanu wa makume na mune ni ntlhanu na mune (99) lava vangadjulikiki ku ndruluka.

⁸Kumbe a wansati hi wini lweyi angana khume dra matxheleni, kulahleka drin'we. Ayentxa yini yene? Alumeka motre, akukula yindlu yake, adjulisisa, akondra adrikuma?

⁹Aku awadrikuma kutani avitana vanakulobye ni lava ayakelaniki navu, aku: Trhavani na mine hikusa nikumi mali yanga leyi afaka yilahlekile.

¹⁰Hiswoswo, nili ku n'wine kutrhava kukone amahlweni ka swirun'wa swa Xikwembu Nkulukumba ha mudohi mun'we lweyi andrulukaka.

¹¹Yesu ayengesa aku: A mhunu afa ena vana vabiri.

¹²Lweyi wandrisana aku ku Tatana wakwe: Tatana, niyavele vukosi lebyi byitakava byanga. Kutani avayavela, vukosi.

¹³Loko kuhundri masiku yakuhlawa, a n'wanakwe lweyi wandrisana, axavisa swake hinkwaswu, afamba aya tikweni dra le kule, laha ayiki heta mali hinkwayu hi kuhanyisa xixifi.

¹⁴Kuti loko a heti mali hinkwayu, ka kuwa ni ndlala leyikulu ku tiko ledro, ahanga sungula kupfumala.

¹⁵Afambiki ayaroliwa hi mhunu wa tiko ledro, amuruma masin'wini, kuyabyisa tinguluve.

¹⁶Kutani anavela kuxura hi makamba lawa madiwaka hi tinguluve; kambe afa kungena mhunu wa kumunyika.

¹⁷A kutiyanakanya aku: A vatalanga ha kone, vatiri va tatana, lava vaxuraka hi makati, na kasi mine halenu nafa hi ndlala.

¹⁸Nitasekeleka niya ku tatana, niyaku ku yene: We tatana, nidoheli Xikwembu Nkulukumba ni le mahlweni kwaku.

¹⁹Anahafaneli kuva nihlayiwa n'wanaku; niyentxe swanga hi mun'wana ku vatiri vaku.

²⁰Asekelekiki aya ku tatana wakwe. Aku na ahali kule a tatana wakwe amuvona. Avani lirere atrutruma ayamukhwambareta axifuveni xakwe, amunyunta.

²¹Kambe a n'wana aku: Tatana, nidoheli Xikwembu Nkulukumba ni le mahlweni kwaku. Anahafaneli akuva nihlayiwa n'wanaku.

²²Kambe a tatana wakwe aku ku malandra yake: Hangwesani n'wibuyisa a xiyambalu lexi xa kuxonga ngopfu, n'wiva n'wimuyambexa. Behelani xitlan'wana litihweni drakwe, ni swifambu aminkondrweni.

²³N'wibuyisa ni role ledri dra kunona, n'witlhava hida hitrhava,

²⁴hikusa a n'wananga lweyi, afa afile, kutani awa hanya, afa lahlekile kutani akumiwile. Vahanga sungula kutrhava.

²⁵Kambe a n'wanakwe lweyi wa nhondrwa afa ali masin'wini. Kaku loko abuya, atrhindrekela kusuhi ni yindlu, ayingela kuyimbelela ni kukina.

²⁶Avitana mun'we ku malandra, amuvutisa aku impswini leswo.

²⁷Yelweyo amubyela aku: Hileswi makwenu abuyiki, a tatana waku atlhavi role ledri dra kunona, hikusa amukumi na aha hanya.

²⁸Kambe yene ahlundruka ayala ni kunhingena. Kutani a tatana wakwe ahuma amukhongota.

²⁹Ayangula aku ku tatana wakwe: Mine nikutireli hi malembe ya kutala yanga hi lawa, ningatluli nawu waku ni kan'we; kambe awungininyika ni ximbutana akuva nitrhava ni vanakulori.

³⁰Kasi a n'wanaku lweyi angada vukosi byaku ni timbuye, eku awabuya, wa kumutlhavela role ledri dra kunona.

³¹Kambe a tatana wakwe aku ku yene: N'wananga, wene una mine hi minkama hinkwayu, mfuri hinkwaswu leswi ninganaswu i swaku,

³²Kambe afa swifanela hi trhava ni kutlangela, hikusa a makwenu lweyi afa afile kutani ahanyile, afa lahlekile, kutani akumikile.