Read ronga Lk 17 Bible Online

Lk 17 - ronga bible

Lk 17

¹Yesu aku ku vadondrisiwa vakwe: Aswikoteki kuva swikhunguvanyiso swingati, kambe yowee lweyi swihumelelaka ha yene.

²Afa swingava swinene ku yene loko vamutrimbelela ribye dra kusila anhan'wini, ava atxukumetiwa likhulwini, kunge kukhunguvanyisa mun'we ku lavatrongo lava.

³Tivonelani! Loko makwenu akudohelile, mulaye. Loko atisola, mudrivalele.

⁴Ni loko akudohela ka ntlhanu na kubiri hi siku, atlhela ata ku wene ka ntlhanu na kubiri, aku natisola, uta mudrivalela.

⁵Kutani a vapostola vaku ku Hosi: Hi yengeselele kupfumela.

⁶A Hosi yiku: Loko fanga n'wini kupfumela loko kange hi nhleke ya sinapi, afa n'wingaku ku nkuwa lowu: Tisimule uyatisimeka likhulwini; afa wuta n'wiyingela.

⁷Xana hi wini ku n'wine lweyi angani nandra lweyi amudrimelaka, kumbe amubyiselaka, anaka loko abuya apfa masin'wini, aku ku yene: Hangwesa, utrhindrekela, utrhama kudeni?

⁸Xana angopfu ana angaku ku yene: Bekisa leswi nitakalalela ha swone; tikhame likhalu, unitirela nikota niheta kuda ni kunwa, a ntrhaku utada, utanwa na wene?

⁹Xana atatlangela nandra, leswi atiriki leswi amuleletiki swone?

¹⁰Hiswoswo na n'wine, loko n'wiyentxi hinkwaswu leswi n'wileletiwiki swone hi Xikwembu Nkulukumba, hlayani n'wiku: Hi malandra, hiyentxi ntsena leswi afaka hifanela kuyentxa swone.

¹¹Loko Yesu ali kari akongoma a Yerusalema, atremakanya hi le makari ka Samariya na Galileya.

¹²Aku na ahanhingena ku mun'we muti, a vavanuna lava khume vanhlokonho vamutlhangaveta. Vayima hi le kule,

¹³vatlakuxa maritu vaku: Yesu, Mudondrisi, hiyentxele lirere!

¹⁴Yesu atiki awavavona, aku ku vone: Fambani n'wiya tivonekisa ku vaprista. Vaku na vahafamba vahanyisiwa.

¹⁵Kambe mun'we ku vone, atiki avona leswaku ahanyisiwile, atlhelela ntrhaku na twalisa Xikwembu Nkulukumba hi ritu ledrakutlakuka.

¹⁶Awa hi mombo aminengeni ya Yesu, amutlangela. Nakasi afa ali mu-Samariya.

¹⁷Yesu avutisa aku: Xana ava hanyisiwanga na vali khume? Lava ntlhanu na mune vakwini-ke?

¹⁸Avakumekanga lava vakotiki kutlhelela ntrhaku, vatata twalisa Xikwembu Nkulukumba, loko ange lweyi ntsena, lweyi anga wa matiko?

¹⁹Ahangaku ku yene: Sekeleka utifambela. A kupfumela kwaku ku kuhanyisile.

²⁰Yesu avutisiwiki hi van'we va vafarisi leswaku xana a Mfumu wa Xikwembu Nkulukumba wutata drini siku. Yesu avayangula aku: A Mfumu wa Xikwembu awuti ha kuvoniwa.

²¹Ana vangahlayi: Leswaku wukola, kumbe wulahaya. Hikusa lavisani a Mfumu wa Xikwembu Nkulukumba wule makari kwenu.

²²Ayengesa aku ku vadondrisiwa vakwe: A masiku matata lawa n'witaka navela kuvona siku drin'we ku masiku ya N'wana wa Mhunu, kambe n'wingaka n'wingadrivoni.

²³Vataku ku n'wine: Lavisani, hilweyi halenu, kumbe alahaya. N'wingayeneni, n'wingavalandreni,

²⁴hikusa swanga hileswi alihati lihatimaka ku tlhelo drin'we dra tilo, atava tanu a N'wana wa Mhunu A sikwini drakwe.

²⁵Kambe swifanekeli aranga atwisiwa kuvaviseka loku kukulu, ava adreliwa hi vhanu va nkama lowu.

²⁶Kutani swanga hi leswi swingahumelela minkameni ya Nowa, switava tanu ni le minkameni ya N'wana wa Mhunu.

²⁷Afa vada, vanwa, valovola, valovota, kuko kutlhasa siku ledri Nowa anga nhingena angalaweni ha drone. A ntita yita yivasuvisa hinkwavu.

²⁸Hiswoswo, switava swanga hi le masikwini ya Loti: afa vada, vanwa, vaxava vaxavisa, vabyala, vayaka.

²⁹Kambe hi siku ledri Loti angahuma Sodoma ha drone, kuve ni ndrilo ni xivavula, swipfa tilweni, swivasuvisa hinkwavu,

³⁰switayentxisa xiswoswo hi siku ledri N'wana wa Mhunu ataka pfuleteleka ha drone.

³¹A sikwini ledro, lweyi angahenhla ka yindlu, na nhundru yake yili ndlwini, angatxhuki axika ayayiteka. Naye lweyi angamasin'wini, angatxhuki atlhelela ku leswi swinga ntrhaku.

³²Drimukani nkata Loti!

³³Lweyi adjulaka kutilondrela vutomi byake, atabyilahla; kambe lweyi ataka byilahla, atatlhela abyihuluxa.

³⁴Nan'wibyela; avusikwini lebyo, vabiri vatava vayetleli ku vunanu byin'we; a mun'we ata tekiwa, a mun'we asiyiwa.

³⁵A vavasati vabiri vatava vasila mbangu mun'we; a mun'we atatekiwa, a mun'wana asiyiwa. [

³⁶Ku vhanu vabiri vatakava masin'wini; kutatekiwa mun'we a mun'wana asiyiwa.][23]

³⁷A vadondrisiwa vamuvutisa vaku: Switava kwini xana, we Hosi? Aku ku vone: Lomu ntrumbu wunga kone, hi lomu makhoti matakahlengeletana kone.