Read ronga Lk 23 Bible Online

Lk 23 - ronga bible

Lk 23

¹Kutani vasekeleka hinkwavu vayisa Yesu ku Pilato.

²Vasungula kumurambela vaku: Hikumi lweyi, ahlohlotelaka tiko dreru, adritsimba ni kuhakela tinemba ku Khezari, aliki yene i Kriste, Hosi.

³Pilato amuvutisa aku: Xana u Hosi ya va-Yuda xana? Yesu amuyanguli aku: Uhlaya swone.

⁴Pilato aku ku vaprista lava vakulu ni switrhungu: Anikumi nandru wa ntxhumu ku mhunu lweyi.

⁵Kambe vone vatshima vaku: Apfuxa tiko, adondrisa dra Yudeya hinkwadru; mfuri asunguli hi dra Galileya akota atlhasa kola.

⁶Pilato loko aswiyingela, avutisa loko nha mhunu lweyi ali wa le Galileya.

⁷Atiki ayingela leswaku i wa mfumu wa Heroda, amurumela ku Heroda, lweyi afaka ali ko Yerusalema na yene amasikwini wolawo.

⁸Heroda loko avona Yesu anyoxa ngopfu. Hikusa afa kulikhale na anavela kumuvona, hikusa afa ayingeli timhaka takwe. Na swone afa adumba leswaku atavona xikombiso xin'we xitiriwa hi Yesu.

⁹Amuvutisa hi maritu lawa ya kutala, kambe Yesu angamuyangulanga ntxhumu.

¹⁰Kambe a vaprista lava vakulu ni vadondrisi va Nawu afa vayimi kone, vamurambela hi kulebya.

¹¹Kutani Heroda, ni butrhu drakwe, vamudrela, vamuhleka. Vamuyambexa ni xiyambalu lexi xa kuphatima, vamubuyisela ku Pilato.

¹²Hi siku drodro Heroda na Pilato vava vanakulobye, hikusa akhale afa vahambulana.

¹³Pilato ahlengeleta vaprista lava vakulu ni tindruna ta tiko, aku ku vone:

¹⁴N'witisi mhunu lweyi ku mine, n'wiku ahlohlotela tiko. Lavisani, nimukambi mahlweni kwenu; anikumanga nandru ku mhunu lweyi, wa leswi afaka n'wimurambela swone.

¹⁵Na yene Heroda swilitanu; hikusa amubuyelisi ku hine. Hileswo lavisani, a mhunu lweyi angayentxanga ntxhumu lexi afanekeliki kufa ha xone.

¹⁶Ke nitamuba, nitamuntrhunxa. [

¹⁷Hi nkama wa Paska, Pilato minkama hinkwayu afa vantrhunxela mubohiwa.]

¹⁸Kambe hinkwavu vabandlukana xikan'we, vaku: Susa lweyi uhintrhunxela Barabasi.

¹⁹Barabasi lweyi, afa anhingenisiwi abohelweni, hinkonta ya dzolonga ledri dringatumbuluka mutini, ni hi kudlaya mhunu.

²⁰Pilato atlhela avulavula navu, hikusa afa arandra kuntrhunxa Yesu.

²¹Vone vabandlukana vaku: Muvambe! Muvambe!

²²Pilato aku ku vone ka vuraru: Xana ahoni yini lweyi xana? Hikusa anikumanga nandru ku yene lowu angafanelaka kufa ha wone. Ke, nitamuba, nimuntrhunxa.

²³Kambe vone vatshima kubandlukana hi maritu lawa ya kutlakuka, vakombela leswaku avambiwa. Akubandlukana kwavu kutshimisisa,

²⁴Pilato atrema leswaku swiyentxeka hi kukombela kwavu:

²⁵Ahanga vantrhunxela yelweyo, lweyi afaka anhingenisiwi bohelweni hinkonta ya dzolonga, ni kudlaya, lweyi afaka vamukombela, kambe avanyiketa Yesu akurandreni kwavu.

²⁶Loko vamufambisa, vakhoma mun'wana lweyi valiki i Simoni wa le Kirene, na apfa masin'wini, vamubyatrhisa xihambano, axibyatrha hi le ntrhaku ka Yesu.

²⁷A vunyingi lebyi byikulu bya tiko ni bya vavasati afa byi mulandra byitiba swifuva, byimudrilela.

²⁸Yesu andrulukela ku vone aku: Vanhwanyana va le Yerusalema, n'winganidrileli mine, tidrilelani mfuri, n'wine ni vanenu.

²⁹Hikusa lavisani matata masiku lawa vatakaku: Swini ndjombo swihiko, ni lava vangapswalangakiki vana, ni kuyan'wisa!

³⁰Hi kone vatakasungula kuhlaya ku tinhava leswaku: Hiwelani henhla! Ni ku switrunga: Hinkhapametani!

³¹Hikusa nambi lihunyi ledri dritrakamaka vayentxaka leswi, xana kuta yentxiwa yini ku ledri drakuwoma?

³²Afa kuni vambeni vabiri, vaswidohi, vafambisiwa kun'we na Yesu a kudlayiweni.

³³ Kuti loko vatlhasi ku mbangu lowu valiki i Pala, vamuvamba kone kun'we ni lava vaswidohi, a mun'we axineneni, amun'wana aximantrhini.

³⁴Kutani Yesu aku: Tatana, vadrivalele, hikusa avaswitivi leswi vaswiyentxaka! Vayavelana swiyambalu swake, hi kuswihlahluva hi mpswhampswha.[26]

³⁵A tiko afa driyimile drihlalela, kun'we ni tindruna na timutreketrela tiku: Ahuluxi van'wana, atihuluxi, loko kunene ali Kriste ni Muhlawuliwa wa Xikwembu Nkulukumba.

³⁶Na wone masotxha mamuhleka, matrhindrekela, mamunyika nhlowa

³⁷maku: Loko nha u Hosi ya va-Yuda, tihuluxe.

³⁸Afa kuni papela ledri dritraliwiki, hi le nhlokweni yake, leswaku: LWEYI I HOSI YA VA-YUDA.

³⁹A mun'we ku lava vaswidohi lava vahayekiwiki, afa amusandra, aku: Xana ahi wene Kriste xana? Tihuluxe ka, na hine uhihuluxa!

⁴⁰Kambe a mun'wana ayangula, amutshinya aku: Xana na wene awutxhavi Xikwembu Nkulukumba, na swone umuyavanyisiwa kulobye?

⁴¹Loko ali hine, swihilulamelile, hikusa hiyamukela leswi swifanekelaka leswi hi swiyentxiki; kambe lweyi anga yentxanga ntxhumu leximfani.

⁴²Atlhela aku: Yesu, nidrimuki loko utata kufumeni kwaku.

⁴³Yesu aku ku yene: Kunene nili ku wene, namunhla utava na mine a Paradiseni.

⁴⁴Afa nkama wudjula kuva wa ntlhanu na mun'we, kuva ni munyama amisaveni hinkwayu, akuyatlhasa kuwa ntlhanu na mune.

⁴⁵A dambu driyentxa ntima, a xisirelelo xa Tempele xihandruka hi le makari.

⁴⁶Yesu abandlukaniki hi ritu dra kutlakuka, aku: Tatana, ninyiketa moya wanga mavokweni yaku. Atiki ahlaya leswo, afa.

⁴⁷Lweyi wa ndruna ya dzana loko avoni leswi swihumeleliki, atwalisa Xikwembu Nkulukumba aku: Kunene a mhunu lweyi afa alulamile!

⁴⁸Kutani vhanu hinkwavu lava afaka vahlengeletanile kuhlalela, vavona leswi swiyentxekiki vatiba swifuva, va muka.

⁴⁹Kambe hinkwavu lava vativanaka na Yesu, ni vavasati lava afaka vamulandrile vapfa Galileya, afa vayimi hi le kule, valavisa swoleswo.

⁵⁰Afa mhunu ali kone, avito drakwe ali Yosefa, wa Arimateya wa muti wa Yudeya, anuna lweyinene wa kululama, na yene afa alavisela a Mfumu wa Xikwembu Nkulukumba.

⁵¹Afa ali wa huvu ya xi-Yuda, afa angapfumelelananga navu arengwini dravu ni le ku leswi vaswitiriki,

⁵²Yelweyo-ke, aya ku Pilato ayakombela ntrumbu wa Yesu.

⁵³Awuhawula kutani, awutrondriyela hi kapulana, aya wubeka xireni ledri drikehliwiki aribyeni, lomu kungikibekiwa mhunu.

⁵⁴A siku ledro afa drili drakutibekisela, nadro Savata afa drili kusuhi.

⁵⁵A vavasati lava afaka vati na Yesu, vapfa Galileya, valandra Yosefa. Vavona xira ni malahliwela ya ntrumbu wa Yesu.

⁵⁶Nangweso vamuka, vabekisa mafura ya kunun'hwela ya kutota miri ya Yesu. Kutani hi Savata vawisa hi kulandra nawu.