Read ronga Lk 24 Bible Online

Lk 24 - ronga bible

Lk 24

¹Hi siku dra kusungula dra vhiki, ampundrwini wa vuxa, a vavasati vatlhasa xireni, na vatameli mafura ya kunun'hwela lawa mabekisiwiki.

²Vakuma ribye dri pfinguliwi kule ni xira.

³Vanhingeniki, vangawukumi ntrumbu wa Hosi Yesu.

⁴Vaku nava hakarateka ha swone, lavisani vavanuna vabiri, vahumelela, vayima na vone, na vayambali swiyambalu leswi swakuphatima.

⁵Vavani kutxhava, vakaramelisa liso ahansi. Kambe vavanuna vaku ku vone: Xana n'widjulela yini lweyi ahanyaka ku lava va kufa?

⁶Drimukani leswi angan'wibyelisa xiswone, loko ahali Galileya,

⁷leswaku N'wana wa Mhunu swifanekeli anyiketiwa mavokweni ya vhanu va swihono, avambiwa, kutani atapfuka hi siku dra vuraru.

⁸Vahanga drimuka maritu ya Yesu.

⁹Vasukiki xireni, vaya bika hinkwaswu leswo ku lava va khume na mun'we ni ku van'wana hinkwavu.

¹⁰Afa ali Maria wa Magadala, na Yuhwana, na Maria mamana wa Yakobe; navo van'wana lava afaka vali navu, vayabikela vapostola swoleswo.

¹¹Kambe ku vapostola a maritu lawu afa mahamba swanga hi xihitana, vangapfumeli.

¹²Kambe Petrosi asuka atrutrumela xireni. Ayahlomela, avona makapulana ntsena, ahanga kutimukela kaya kwake, na ahlamala hi leswi swiyentxekiki.

¹³Hi siku droledro, lavisani, vabiri ku vone, afa vaya mutini lowu wunga kule na Yerusalema hi mimpfhuka ya khume dra makilometro ni ntlhanu, a vito dra wone anga Emawusi.

¹⁴Andleleni afa vatikhanelela hi timhaka hinkwatu leti tiyentxekiki.

¹⁵Vaku na vahavulavula, vavutisana, Yesu hi ntshima yake atrhindrekela ku vone, afamba na vone.

¹⁶Kambe a mahlu yavu afa maxireliwile, mahluleka kumutiva.

¹⁷Yesu ahangaku ku vone: I maritu muni lawa n'wivutisanaka ha wone, la ndleleni na n'wihlunamile?

¹⁸A mun'we ku vone a vito drakwe afaka ali Kleyopasi, ayangula aku ku yene: Xana akuva wene vuswaku ku vayaki va Yerusalema, lweyi angativikiki leswi swiyentxekiki kone a masikwini lawa xana?

¹⁹Aku ku vone: Hi leswakuyini xana? Vaku ku yene: Aswa Yesu wa le Nazarete, lweyi afaka ali muprofeta wa ntamu, akutireni ni le kudondriseni, amahlweni ka Xikwembu Nkulukumba ni le ku tiko hinkwadru.

²⁰Ni leswaku a vaprista lava vakulu ni tindruna teru vangamunyiketa akuyavanyiseliwa kufa, vava vamuvamba.

²¹Kambe hine afa hidumba leswaku atava yene lweyi atakavani kutirula Israyele! Kambe kutani i siku dra vuraru na timhaka leti tiyentxekile.

²²Kambe avan'we vavasati va le kweru vahihlamalisi ngopfu; vavindruki vaya xireni,

²³avawukumanga a ntrumbu wakwe. Vabuya navaku, vavoni mahlolana ya swirun'wa leswi switiki, awahanya.

²⁴A van'wana ku va-kweru, vasuka vaya xireni, vaya kuma swili swoswi a vavasati vahlayisiki xiswone, kambe Yesu avamuvonanga.

²⁵Yesu aku ku vone: Yo! Vhanu lava vakuka vangayingeli, lava vatimbilu leti tinanaka kupfumela hinkwaswu leswi vaprofeta vangahlaya swone!

²⁶Xake, afa swingafanekeli Kriste atwa kuvaviseka, ava anhingena kuphatimeni kwake?

²⁷Ahangasungula ku Moxe ni vaprofeta hinkwavu, a vatlhavukanyisa aMatralweni hinkwawu, a timhaka leti tikongometaka yene.

²⁸Vatrhindrekela mutini lowu afaka vaya ku wone; kambe Yesu ahamba swanga hi loko adjula kukhaluta.

²⁹Kambe vone vamuphikelela vaku: Trhama na hine namuhla, hikusa i madambu, ni dambu dripelile mfuri. Yesu ahanganhingena atrhama navu.

³⁰Kuti loko atrhami navu akudeni, ateka kati atlangela ku Xikwembu Nkulukumba, akhemelela avayavela.

³¹A mahlu yavu mahangapfuleka, vamutiva; kambe yene avanyamalalela.

³²Vone vabyelana vaku: Xana a timbilu teru afa tingapfuri a ndreni kweru, loko ahavulavula na hine andleleni, ahi pfuletela Matralwa?

³³Vasukiki hi nkama wolowo, vabuyela Yerusalema, vaya kuma lava va khume na mun'we na vahlengeletani kun'we ni lava afaka vali navu,

³⁴lava valiki: Kunene Hosi yi pfukile! Yi tivonekisi ku Simoni!

³⁵Na vone lava vapfiki hi le Emawusi, vadrungula leswi swihumeleliki ndleleni, ni leswi atibyiwiki hi vone a kukhemeleleni ka kati.

³⁶Vaku na vahakhanela, Yesu ayima makari kwavu, aku ku vone: A kurula akuve na n'wine.

³⁷Kambe vone vakhindlimuka vatxhava, vapimisa leswaku vavona xintrhuti.

³⁸Yesu aku ku vone: Xana n'wikhindlimukela yini? Xana a miyanakanyu leyi ya kunhatu mihumelelela yini atimbilwini tenu?

³⁹Lavisani mandla ni minkondro yanga, leswaku hi mine hi ntshima yanga. Nitevetelani n'wivona, a xintrhuti axina miri ni marambu swanga hi leswi n'winivonaka ninganaswu.

⁴⁰Atiki avabyela leswo, avakomba a mandla yake ni minkondro yake. [27]

⁴¹Vaku na vangasipfumela hinkonta ya kutrhava ni kuhlamala, aku ku vone: Xana n'wini swakuda kola xana?

⁴²Vamunyika nhluve wa nhlampfi leyi ya ku woxiwa.

⁴³Ateka ada mahlweni kwavu.

⁴⁴Yesu ahangaku ku vone: Hiwo maritu lawa ningan'wibyela, loko nahali na n'wine niku: Swifanekeli kuhetiseka hinkwaswu leswi swingatraliwa hinkonta yanga aNawini wa Moxe ni le madrunguleni ya vaprofeta ni le Swidrumiseni.

⁴⁵Kahangava kone apfulaka swifuva swavu, akuva vayingelisisa Matralwa

⁴⁶aku ku vone: Switralisiwi xiswoswo, leswaku Kriste atatwa kuvaviseka, apfuka makari ka lava vakufa hi siku dra vuraru,

⁴⁷kutadondrisiwa matiko hinkwawu hi vito drakwe akundruluka, ni kudrivaleliwa ka swihono, akusungula hi Yerusalema.

⁴⁸N'wine n'wi timboni ta mintxhumu leyi.

⁴⁹Lavisani, nitan'wirumela leswi n'widumbisiwiki swone ha Tatana. N'wine trhamani kola Yerusalema, n'wikota n'wiyambexiwa ntamu wa le henhla.

⁵⁰Kutani Yesu avayisa ahandle ka muti, kuyatlhasa Betaniya. Atlakuxa mavoko henhla, avakatekisa.

⁵¹Na ahavakatekisa, akutravukana navu, antlhantukelisiwa Tilweni.

⁵²Vone vamugandrela, kutani vatlhelela Yerusalema hi kutrhava loku kukulu,

⁵³afa vava kone a Tempeleni masiku hinkwawu, vatwalisa Xikwembu Nkulukumba.