Read ronga Lk 4 Bible Online

Lk 4 - ronga bible

Lk 4

¹Yesu asuki anambyeni wa Yordana na atali hi Moya wa Kuxwenga. A Moya wumuyisi huleni,

²atrhami kone mune wa makume (40) ya masiku na adringiwa hi Diyavulosi. Angadi ntxhumu hi masiku wolawo, antrhaku atwa ndlala.

³Kutani Diyavulosi aku ku yene: Loko ke uli N'wana wa Xikwembu Nkulukumba hlaya leswaku a ribye ledri drindruluka a kati.

⁴ Yesu amuyangula aku: Kutraliwi leswaku: ‘A mhunu angaka angahanyi hi kati ntsena.’

⁵Kutani Diyavulosi amuntlhantukelisa henhla, amukomba matiko hinkwawu

⁶aku ku yene: Nitakunyika a ntamu lowu hinkwawu ni kuphatima ka matiko lawa, hikusa ninyikiwi swone, ninganyika lweyi nimurandraka.

⁷Wene-ke, loko unikhisamela unigandrela, hinkwaswu leswi switava swaku.

⁸ Yesu ayangula aku ku yene: Kutraliwi leswaku: ‘Utakhisamela Hosi Xikwembu Nkulukumba waku, ugandrela yene ntsena.’

⁹Diyavulosi atlhela ayisa Yesu a Yerusalema, aya mubeka axihlungwini xa Tempele, aku ku yene: Loko-ke uli N'wana wa Xikwembu Nkulukumba dladlama hansi,

¹⁰hikusa kutraliwi leswaku: Xikwembu Nkulukumba ata leleta a tintrumi takwe leswaku swikubekisa ni kukumpfekela

¹¹ switakuyamukela hi mavoko ya swone, leswaku a minenge yaku mingavavisiwi hi maribye.

¹² Yesu ayangula aku ku yene: Nakone kutraliwi leswaku: ‘Ungadringi Hosi Xikwembu Nkulukumba waku.’

¹³Loko Diyavulosi adringi Yesu hi tindlela hinkwatu, atrhindreki kule na yene hi nkamanyana.

¹⁴Kutani Yesu atlhelela Galileya hi ntamu wa Moya wa kuxwenga, a kutwala kwake kuhangalaka hi tiko hinkwadru.

¹⁵Afa avadondrisa amasinagogeni yavu, na adrumisiwa hi vhanu hinkwavu.

¹⁶Kutani Yesu aya Nazarete lomu afaka a kuleli kone, anhingena asinagogeni hi siku dra Savata hi matolovelela yake, kutani asekeleka ayimela kuhlaya a matralwa.[12]

¹⁷Vamunyika a buku dra muprofeta Ezaya; atiki analavuta a buku akuma lomu kutraliwiki leswaku:

¹⁸A Moya wa Hosi wule henhla kwanga, hikusa yi nitotile, akuva nidrungulela swisiwana a Ivangeli, yi nirumi kuhuwelela kuntrhunxeka ku lava vabohiwiki, ni kubuyisela kuvona ku lava vakufa-mahlu, ni kuntrhunxa lava vaxanisiwaka;

¹⁹ni kurera a nyiwa ya lembe drimpswha dra Hosi.

²⁰Ntrhaku Yesu asongiki a buku adritlhelisela ku nandra, kutani atrhamisa. Hinkwavu lava afaka vali sinagogeni vamupondrolela mahlu.

²¹Yesu ahanga sungula kuvabyela aku: Namunhla a tralwa ledri n'widriyingelaka drihetisekile.

²²Hinkwavu afa vahlaya swakuxonga ha Yesu, vahlamala hi maritu ya kunyoxisa lawa amahlayaka. Vavutisa vaku: Xana yelweyi ahiye n'wana Yosefa xana?

²³Yesu ahanga vayangula aku: Kunene n'witanibyela a xihlayahlaya, lexi xaku: We n'anga tihanyise ha swaku. Hinkwaswu leswi hi swiyingeliki leswaku u swiyentxi Kapernawume, swiyentxe ni kola tikweni draku.

²⁴Ayengeta aku: Nihlayela mfuri nili ku n'wine: akuna muprofeta lweyi ayamukeliwaka tikweni dra le kwavu.

²⁵Nihlayelamfuri nili, a vavasati vamafelwa afa vali vanyingi, amasikwini ya muprofeta Eliya a Israyele, loko a tilo dripfaliwile, kungavi na mpfula, ha malembe mararu na ntlhanu wa tihweti na yin'we, kutani kuhumeleli ndlala leyi yikulu atikweni hinkwadru.

²⁶Kambe Eliya angarumiwanga ni ku mun'we wa mafelwa ya va-Israyelea, ntsena arumiwi ku lweyi wa le Sarepta, atikweni dra le Sidoni.

²⁷Na swone afa kuni vhanu vanyingi va nhlokonho a Israyele ankameni wa muprofeta Elixa, kambe akahanyisiwanga ni mun'we ku vone, ntsena Kahanyisiwi Naamana wa le Siriya.

²⁸Hinkwavu lava afaka vali sinagogeni, loko vayingela maritu lawa Yesu afaka amahlaya, vahlundruka ngopfu.

²⁹Vasekeleka, vakokovisela Yesu ahandle ka muti. Vamuyisa xiweni xa nhava, leyi a muti afaka wuyakiwiki henhla ka yone, akuva vamususumetela hansi,

³⁰kambe Yesu aphonyota, ava akhaluta hi le makari kwavu atifambela.

³¹Yesu ayi Kapernawume amutini wa le Galileya, adondrisa vhanu hi masavata.

³²Kutani a vhanu vahlamala hi madondrisela yake, hikusa a kukhanela kwake afa kuli loku ka ntamu.

³³Asinagogeni afa kuni mhunu lweyi afaka ani moya wa demoni dra xambya, afaka abandlukana ngopfu, aku:

³⁴Ha! Amhaka yeru na wene hi yini, Yesu wa le Nazarete? Xana uteli kuta hi suvisa xana? Nakutiva lweyi unga yene, u Muxwengi lweyi arumiwiki hi Xikwembu Nkulukumba.

³⁵Yesu awutshinya aku: Miyela, huma ku mhunu lweyi! A moya lowumfani wumutlatlalata mahlweni ka hinkwavu wuhuma, na wungamuvavisanga.

³⁶Kutani hinkwavu vahlamala, vavutisana vaku: Xana swihlaya yini leswi xana? Leswi aleletaka hi vuhosi ni ntamu a mimoya lemimfani, yone mimuyingela, mihuma!

³⁷Kutani a kutwala ka Yesu kuhangalaka amimbangwini hinkwayu ya tiko.

³⁸Yesu asukiki asinagogeni, anhingena andlwini ya Simoni. A mukon'wana wa xisati wa Simoni afa avabya, ani kuhisa kukulu ka miri, vahanga mukombelela ku Yesu akuva amuhanyisa.

³⁹Yesu akaramiki kusuhi na yene, akhwavela kuhisa ka miri, kutani kahanga mutrika. Hi nomu-lo apfuka, asungula kuvatirela.

⁴⁰Loko a dambu dripela, hinkwavu lava afaka vani timbabyi ta mavabyi ya tinxaka-xaka vatibuyisa ku Yesu, yene antlhanteka a mavoko ku mun'wana-ni-mun'wana wavu, avahanyisa.

⁴¹Ni ku lava vanyingi afa kuhuma ni mademoni lawa afaka mabandlukana maku: Wene, u N'wana wa Xikwembu Nkulukumba! Kambe Yesu amakhwavela akuva mangakhaneli hikusa afa mamutiva leswaku i Kriste.

⁴²Loko byixile Yesu ahuma handle ka muti aya huleni. Kutani a vhanu lava vanyingi va mudjula, vata laha afaka ali kone, vamudrivata akuva anga hambani na vone.

⁴³Kambe Yesu avabyela aku: Nifanekeli kuya tivisa Ivangeli ya Mfumu wa Xikwembu Nkulukumba ni le mitini min'wana. Hikusa nirumeliwi swone.

⁴⁴Kutani Yesu aya dondrisa amasinagogeni ya tiko dra Yudeya.