Read ronga Lk 6 Bible Online

Lk 6 - ronga bible

Lk 6

¹Kuhumeleli leswaku hi Savata drin'we loko Yesu ahundra makari ka masimu, a vadondrisiwa vakwe vatrhova switrhetrho swa tirigo vaswiswoswa hi mandla vada tinhleke ta swone.

²Avan'we va vafarisi vavutisa vaku: Xana n'wiyentxela yini leswi swingapfumeleliwikiki kuswiyentxa hi Savata?

³Yesu ayangula aku ku vone: Xana an'wingi hlaya leswi Davida angaswiyentxa loko atwa ndlala, yene ni lava afaka vali na yene?

⁴Leswi anganhingena a Tempeleni, ateka makati ya kugandrela Xikwembu Nkulukumba ha wone, ada, ava anyika ni lava afaka vali na yene, lawa mafanekelaka kudiwa ntsena hi vaprista.

⁵Ahangaku ku vone: A N'wana wa Mhunu i Hosi ni ku dro Savata.

⁶Hi drin'wana Savata, Yesu anhingena asinagogeni asungula kudondrisa. Kone afa kuni mhunu lweyi a voko drakwe dra xinene afaka driwomelelile.

⁷A vadondrisi va Nawu ni vafarisi vaxiyisisa loko kumbe xana atamuholisa hi Savata, akuva vatakuma a xa kumurambela ha xone.

⁸Kambe Yesu hi kutiva a miyanakanyu yavu, aku ku lweyi wakuwomelela voko: Sekeleka uyima kola makari. Lweyi wanuna asekeleka ayima.

⁹Yesu aku ku vone: Nan'wivutisa, xana kupfumeleliwa a kuyentxa yini hi Savata, a kuyentxa leswi swinene kumbe leswi swakubiha? A kuhanyisa mhunu kumbe a kumutrika afa?

¹⁰Aralarala hinkwavu lava vamutrandreliki, kutani aku ku mhunu lweyo: Nalavuta a voko draku. Ayentxisa xiswoswo, a voko drakwe drihanyisiwa.

¹¹Kambe vone vahlundruka ngopfu, vasungula kukhanelisana hileswaku vangakota a kuyentxa yini ha Yesu.

¹²Amasikwini lawo, Yesu asuka aya nhaveni a kuyakhongota, aheta vusiku hinkwabyu hi kukhongota.

¹³Byitiki byaxa, avitana vadondrisiwa vakwe, ahlawula makari kwavu khume na vabiri, avatxhula vapostola. Anga lava:

¹⁴Simoni lweyi amutxhuliki Petrosi, na Andreyasi, makwavu, Yakobe, Yohana, Filipi, Bartolomewu,

¹⁵Matewu, Tomasi, Yakobe n'wana Alifewu, Simoni lweyi va liki i Muhiseki,

¹⁶Yudasi a n'wana Yakobe, na Yudasi Iskariyota lweyi angandruluka muwongi.

¹⁷Yesu afulameli navu hi le nhaveni, ayayima alivaleni. Kone afa kutlhangani vunyingi bya vadondrisiwa vakwe ni vhanu vanyingi va tiko drale Yudeya, ni le Yerusalema ni le kingeni wa le Tiri na Sidoni;[14]

¹⁸afaka vateli a kutata yingela Yesu ni kuva vaholisiwa vuvabyi byavu. Na vone lava vaxanisekaka hi mimoya lemimfani afa vahanyisiwa.

¹⁹Mfuri hinkwavu vhanu afa vadjula kukhumba Yesu, hikusa afa vahanyisiwa hinkwavu hi ntamu lowu afaka wuhuma ku yene.

²⁰Yesu alavisa a vadondrisiwa vakwe, aku ku vone: N'wikatekile n'wine swisiwana, hikusa a Mfumu wa Xikwembu i wenu.

²¹N'wikatekile n'wine n'wingani ndlala swoswi, hikusa n'witaxurisiwa. N'wikatekile n'wine n'widrilaka swoswi, hikusa n'witahleka.

²²N'witatovoka loko a vhanu van'wivenga, van'wihlongola, van'wiruka, vasandra ni vito drenu swanga hi loko dribihile, hinkonta ya N'wana wa Mhunu.

²³Trhavani ngopfu hi siku ledro, n'wiva n'witrhavisisa, hikusa a hakelo drenu dritava drikulu atilweni. Hikusa na vone vatatana vavu vaxanisisi xiswoswo a vaprofeta.

²⁴Kambe, yowee, n'wine vafuyi, hikusa n'wikumi khale a kumiyetiwa kwenu.

²⁵Yowee, n'wine lava vadaka vaxura swoswi, hikusa n'witava ni ndlala. Yowee, n'wine n'wihlekaka swoswi, hikusa n'witadrila n'wiva n'wihlatiyela.

²⁶Yowee n'wine loko vhanu hinkwavu van'wikhensa, hikusa a vatatana vavu vayentxisi xiswoswo ku vaprofeta va madrimi.

²⁷Kambe nan'wibyela n'wine n'winiyingelaka nili ku n'wine: Randrani valala venu, yentxelani leswi swinene lava van'wivengaka.

²⁸Hlayelani matovoko lava van'wirukaka, n'wikhongotela ni lava van'wixanisaka.

²⁹Lweyi akuhodlotaka rama, mukombetele ni drin'wana. Ni lweyi akuwutlelaka a djansi, ungamuyalele ni xo xiyambalu.

³⁰A mun'wana-ni-mun'wana lweyi akukombelaka, munyike, ni loko mun'we akuwutlela leswi swinga swaku, ungamurameli.

³¹Leswi n'wirandraka akuva a vhanu van'wiyentxela swone, vayentxelani swoleswo na n'wine

³²Loko n'wirandra ntsena lava van'wirandraka, n'witakuma a hakelo muni ku Xikwembu Nkulukumba xana? Hikusa na vone vadohi varandra lava vavarandraka.

³³Ni loko n'wiyentxa leswi swinene ku lava van'wiyentxelaka leswi swinene, n'witakuma hakelo muni xana? Na vone vadohi vayentxisa xiswoswo.

³⁴Ni loko n'wivolekisa ku lava n'widumbaka leswaku n'witatlhela n'wiswikuma ku vone, n'witakuma hakelo muni xana? Hikusa na vone vadohi vavoleka vadohi-kulobye, akuva vata tlhela vakuma leswi swidringanaka ku vone.

³⁵Kambe randrani a valala venu, n'wivayentxela leswi swinene, n'wiva n'wivolekisa na n'wingalaviseli hakelo. Hikone-ke a hakelo drenu dritakava drikulu, kutani n'witava vana va Xikwembu Nkulukumba wa le Henhla-henhla, hikusa na yene ani vumbilu ku lava vangativikiki kutlangela ni lava vamfani.

³⁶Vanani ni vunene swanga heswi Tatana wenu angani vunene.

³⁷N'wingayavanyiseni vambeni akuva n'wingatiyavanyisiwa. N'wingabekeli van'wana milandru, akuva n'wingatibekeliwa milandru. Drivalelani van'wana na n'wine n'witadrivaleliwa.

³⁸Hananani, na n'wine, n'witahananiwa. Vatan'wihanana a swifuveni swenu a mpimu lowu wunene, lowu hlukuhletiwiki, lowu wukhapaka. Hikusa a mpimu lowu n'wipimaka ha wone, na n'wine n'witapimiwa ha wone.

³⁹Yesu avabyela a xifaniso aku: Xana a wakufa-mahlu angaswikota a kufambisa a wakufamahlo kulobye? Anha vangawi kheleni hi vubiri byavu xana?

⁴⁰A mudondrisiwa angatluli mudondrisi wakwe, kambe a mudondrisiwa wini ni wini lweyi adondrisiwiki swinene, atafana ni mudondrisi wakwe.

⁴¹Xana ulavisela yini a ntwanyi atihlweni dra makwenu, na ungavoni a ntrandra lowu wunga tihlweni draku?

⁴²Xana ungahlayisa kuyini ku makwenu uku: Makweru, tana nisusa a ntwanyi lowu wunga tihlweni draku, kasi wene awuwuvoni a ntrandra lowu wunga tihlweni draku? N'wamandrendre! Ranga ususa a ntrandra atihlweni draku, kahangava kone-ke utakavonisisa a kususa a ntwanyi atihlweni dra makwenu.

⁴³Akuna nsinya lowu wunene wubekaka a mihandru ya kubiha, nakone akuna nsinya wa kubiha wubekaka a mihandru ya minene.

⁴⁴A nsinya wini ni wini wutibyiwa hi mihandru ya wone. A makuwa amakhayiwi amitweni, na vone a vana va vhinya avakhayiwi mimpumbulweni.

⁴⁵A mhunu lweyi munene ahumexa leswi swinene anhlengweni leyi yinene ya mbilu yake, na yene lweyimfani ahumexa leswi swimfani anhlengweni leyi yimfani ya mbilu yake. Hikusa a nomu wakwe wukhanela leswi switaliki ambilwini yake.

⁴⁶N'winihlayela yini: Hosi! Hosi! Na n'wingayentxi leswi nihlayaka swone?

⁴⁷Lweyo ni lweyo, lweyi ataka ku mine, ayingela a maritu yanga ava amayentxa, nitan'wikomba lweyi afanaka na yene:

⁴⁸afana ni mhunu lweyi ayakiki a yindlu, akeliki aribyeni kuyeta swinene, abeka kone a masungulu ya yindlu. A ntita yi tlhasa, a nambu wukukumuka, a mavimbi maba a yindlu leyo hi ntamu, kambe amakotanga kuyitrekatrekisa hikusa afa yiyakiwi swinene.

⁴⁹Kambe lweyi ayingelaka leswi niswihlayaka na angaswiyentxi, afana ni mhunu lweyi ayakiki a yindlu yake apfunyeni na yingena masungulu ya kutiya. A nambu wutala wuyiba hi ntamu, yiwa, yimbundrumukela.