Read ronga Lk 9 Bible Online

Lk 9 - ronga bible

Lk 9

¹Yesu a hlengeleta vadondrisiwa vakwe va khume na vabiri, avanyika a ntamu ni vufumi a henhla ka mimoya hinkwayu lemimfani, ni kuholisa ka mavabyi.

²Avaruma kurera ta Mfumu wa Xikwembu Nkulukumba ni kuhanyisa timbabyi.

³Aku ku vone: n'wingatekeni ntxhumu xa ndlela, nambi yili nhonga, nambi yili nkwama, nambi drili kati, nambi yili mali, na kone n'wingatekeni swiyambalu swakutxhintxa.

⁴Andangwini wa kukari loko n'witlhasa van'wiyamukela, trhamisani kone n'wikota n'wisuka a tikwanini dra kone.

⁵Kambe loko vangan'wiyamukeli atikweni ledro humani ku drone, phumunani ntrhuri aminengeni yenu, byitava vumboni ku vone.

⁶A vadondrisiwa Vahumi vafamba, hi tiko ni tiko, varera Ivangeli ni kuhanyisa vhanu a mavabyi ku matlhelo hinkwawu.

⁷Heroda mufumi wa Galileya afa ayingela vakhanela hi hinkwaswu leswi swihumeleliki, kutani aganaganeka hikusa van'we afa vahlaya leswaku Yohana Mubabatisi apfuki kufeni,

⁸a van'wana afa vahlaya leswaku kuhumeleli muprofeta Eliya, avan'wana kambe vaku i mun'wana wa muprofeta wa khale apfukiki kufeni.

⁹Kambe Heroda aku: Mine ha byanga nivarumi vatrema a nhloko ya Yohana Mubabatisi. Xana lweyi angava mani, lweyi niyingelaka vadrungula swinyingi ha yene? Afa adjula kuvona Yesu.

¹⁰A vapostola, loko vatlhelile, vadrungulela Yesu hinkwaswu leswi vaswiyentxiki. Yene avatekela atlhelweni, avayisa atikwanini ledri valiki i Betsayida.

¹¹Loko a vhanu vaswitivile vamulandra kutani Yesu avayamukela, akhanela navu hita Mfumu wa Xikwembu Nkulukumba, kutani aholisa timbabyi.

¹²Loko a dambu driya kupeleni, a vadondrisiwa lava khume na vabiri, vatrhindrekela kusuhi na Yesu vaku: Tlhelisa a vhanu vaya wisa ni kuya djula a swakuda mitanini ni le masin'wini lawa manga kusuhi, hikusa ku mbangu lowu akuna ntxhumu.

¹³Yesu aku ku vone: Vanyikani a swakuda n'wine. Vone vayangula vaku: Ahina swakutlula ntlhanu wa makati ni tinhlampfi tibiri, loko swinge leswaku hifamba hine, hiyaxavela a vhanu lava hinkwavu a swakuda!

¹⁴Hikusa afa vadjula kuva ntlhanu wa makume ya madzana (5.000) ya vhanu. Kutani Yesu aku ku vadondrisiwa vakwe: Vatrhamisisani hi mintlawa ya ntlhanu wa makume (50).

¹⁵Vayingiseta, vayentxisa xiswoswo, vavatrhamisisa hinkwavu.

¹⁶Kuva loko Yesu ateka a makati laya ntlhanu ni tinhlampfi tibiri, alavisa Tilweni, atlangela. Akhemelela anyika vadondrisiwa vakwe akuva vayavela vhanu.

¹⁷Hinkwavu vada, vaxura, mfuri kuhlengeletiwa a mantlhantlha lawa masaliki, vatata khume dra swihundru na swibiri.

¹⁸Siku drin'wana loko Yesu ali kukhongoteni, vuswake, a vadondrisiwa vakwe afa vatrhindrekela ku yene, avavutisa aku: Xana a vhanu vali ni mani, xana?

¹⁹Vone vayangula vaku: Vambeni vali u Yohana Mubabatisi, avan'we vali u Eliya, avan'wana vali u muprofeta mun'wana wa khale lweyi apfukiki kufeni.

²⁰Yesu avavutisa aku: N'wine-ke, n'wili ni mani, xana? Petrosi amuyangula aku: U Kriste, lweyi arumiwiki hi Xikwembu Nkulukumba.

²¹Yesu avalaya ngopfu akuva vangabyeli mhunu a mhaka leyo.

²²Aku ku vone: N'wana wa mhunu atatwisiwa kuvaviseka ngopfu, adreliwa hi vakulukumba ni vaprista lava vakulu ni vadondrisi va Nawu. Vatamudlaya, kambe atapfuka hi siku dra vuraru.

²³Kutani aku ku hinkwavu: Loko mhunu adjula kuva mudondrisiwa wanga, aatiyale, aatirwexe xihambano xakwe hi siku drin'wana-ni-drin'wana, kutani anilandra.

²⁴Hikusa lweyi arandraka a kuhuluxa a vutomi byake atabyilahla, kambe lweyi atakalahla a vutomi byake ha mine, atabyihuluxa.

²⁵Xana swingamupfuna yini a mhunu loko angafuya a misava hinkwayu, ava atilahla, atihona ha vuswake?

²⁶Lweyi atakavani tingana ha mine ni hi maritu yanga, na yene N'wana wa Mhunu atava ni tingana ha yene, loko atabuya hi kuphatima kwake ni kuphatima ka Tatana wakwe, ni ka tintrumi ta kuhlawuleka.

²⁷Nihlayelamfuri nili ku n'wine: van'we lava vanga kola vangatifa, na vangasinavona a Mfumu wa Xikwembu Nkulukumba.

²⁸Afa swidjula kuva ntlhanu wa masiku na mararu a ntrhaku ka maritu lawo, Yesu antlhantukela anhaveni akuya khongota. Ateki Petrosi, na Yohana na Yakobe.

²⁹Loko ali kari akhongota, a mavonekela ya liso drakwe mandruluka, ni swiyambalu swake swindruluka ntlhohe, swiphatima.

³⁰Kuhumelela vavanuna vabiri vakhanela na yene. Veva Moxe na Eliya,

³¹afa vatrandreliwi hi kuphatima ka Matilo, vakhanela hi kusuka ka Yesu amisaveni leyi, loku kutakava Yerusalema.

³²Kambe Petrosi ni vanakulobye afa vani vurongo ngopfu, loko vasisimuka, vavona kuphatima ka Yesu ni ka vavanuna vabiri lava afaka vali na yene.

³³Loko a vhanu lavaya vatravukani na Yesu, Petrosi aku: Mudondrisi, i swa hombe hitrhamisa kola! Hitahamba mintronga miraru; wun'we wuva waku, wun'wana wuva wa Moxe, wun'wana wuva wa Eliya, kambe Petrosi afa angaswitivi leswi ahlayaka swone.

³⁴Aku na ahahlaya leswo, ka kutlhasa a tlavi drivafukumeta, kutani vatxhava akunhingeneni kwavu atlavini.

³⁵Kutani atlavini kutwala a ritu driku: Lweyi i N'wananga lweyi nimurandraka, muyingisetani.

³⁶Loko a ritu drimiyelile, Yesu akumiwa na ali swake. Kutani a vadondrisiwa vamiyela, vangadrunguleli mhunu leswi vaswivoniki, hi masiku lawo.

³⁷Hi siku ledri drintlhantamaka, loko vafulamela vapfa anhaveni, a xitrhungu lexi xikulu xihumelela xitlhangaveta Yesu.

³⁸Mun'we wanuna a makari ka vhanu abandlukana hi ntamu aku: Mudondrisi, nakukhongota lavisa a n'wananga, hikusa hi yelweyi ntsena ninga na yene;

³⁹a moya lowu mfani wamukhoma, abandlukana xikan'we, wumutrekatrekisa, wumutlhutlhisa ni duvi. Wumuxanisa wungamutriki antrhunxeka.

⁴⁰Nikombeli a vadondrisiwa vaku akuva vahlongola a moya lowo, kambe vahlulekile.

⁴¹Yesu ayanguli aku: Yowee, vhanu lava vangalikina kupfumela, vakusomboloka! Xana nitava na n'wine, nin'wilehisela a mbilu kutlhasa drini? Buyisa n'wanaku halenu.

⁴²Loko a ntrongwana ahatrhindrekela ku Yesu, a moya lowu mfani wumutlatlalata, wumutrekatrekisa. Kambe Yesu akhwavela a moya lowu mfani, aholisa ntrongwana amutlhelisela ku tatana wakwe.

⁴³Kutani hinkwavu vahlamala hi vukulu bya ntamu wa Xikwembu Nkulukumba. Vaku na vahahlamala hinkwavu hi hinkwaswu leswi Yesu afaka aswitira, aku ku vadondrisiwa vakwe:

⁴⁴Yingisetani swinene leswi atindleveni tenu: A N'wana wa Mhunu atanyiketiwa amandleni ya vhanu.

⁴⁵Kambe vone avayingelelisanga leswi afaka aswihlaya, hikusa afa angasina vatlhavukanyisa akuva vayingelisisa; hinkwavu afa vatxhava a kuvutisa ku Yesu akuva avatlhamuxela.

⁴⁶Kutani kusungula akukanetana makari ka vadondrisiwa, hileswaku i mani lwenkulu ku vone.

⁴⁷Yesu, ativiki leswi afaka vapimisa swone, ateka a ntrongwana, amuyimisa kusuhi na yene,

⁴⁸aku ku vone: Lweyi ayamukelaka a ntrongwana wanga hi lweyi hi vito dranga, awaniyamukela, ni lweyi aniyamukelaka, ayamukela lweyi anirumiki. Hikusa lweyi atitrongohataka amakari kwenu hinkwenu, hi yene lweyi anga nkulu.

⁴⁹Yohana aku: Mudondrisi, havoni mun'we lweyi ahlongolaka mimoya lemimfani hi vito draku, kutani himutsimbile hikusa ahi wakweru.

⁵⁰Yesu aku ku yene: N'wingamutsimbeni, hikusa lweyi angayalanikiki na hine ayima na hine.

⁵¹Loko nkama wa kutlakuxiwa ka Yesu atilweni wukusuhi a tiyisa mbilu akongoma Yerusalema.

⁵²Aruma vadondrisiwa amahlweni lava vangaya mutini wa va-Samariya akuva vaya bekisela a kutlhasa ka Yesu.

⁵³Kambe a va-Samariya vayala kumuyamukela, hikusa afa vativa leswaku Yesu akongomi Yerusalema.

⁵⁴Loko a vadondrisiwa vakwe, Yakobe na Yohana vavoni leswi vaku: Hosi, xana waswirandra akuva hileleta leswaku kuxika a ndrilo wa le tilweni wuvaheta?[16]

⁵⁵Kutani Yesu andrulukeliki ku vone avatshinya.[17]

⁵⁶Vahangaya ku mun'wana mutana.

⁵⁷Loko vali ndleleni, amun'we mhunu aku ku Yesu: Nitakulandra hinkwaku lomu uta kaya kone.

⁵⁸Yesu aku ku yene: A mabuwana mani mimpala, ni tinyanyana tini vusaka, kambe a N'wana wa Mhunu angana laha angadamaka nhloko yake kone.

⁵⁹Aku ku mun'wana: Nilandre. Yelweyo aku: Hosi, nipfumelele niranga hi kuya lahla a tatana wanga.

⁶⁰Yesu aku ku yene: Trika vafi valahla a vafi vavu, wene famba uya tivisa ta Mfumu wa Xikwembu Nkulukumba.

⁶¹A mun'wana aku: Hosi, nidjula kukulandra, kambe akusungula nipfumelele, niranga niyalelela a va le kaya kwanga.

⁶²Yesu aku ku yene: A mhunu lweyi abekaka a voko xikon'wini, atlhela alavisa a ntrhaku, angafaneliwi hi Mfumu wa Xikwembu Nkulukumba.