Read ronga Yhn 1 Bible Online

Yhn 1 - ronga bible

Yhn 1

¹[1] Akusunguleni, a Ritu afa drili kone. A Ritu afa drili na Xikwembu Nkulukumba, kutani Ritu afa drili Xikwembu Nkulukumba.

²A Ritu afa drili kone kusunguleni ku Xikwembu Nkulukumba.

³ Hinkwaswu switumbuluxiwi ha Drone, kutani akuna ntxhumu ni mun'we lowu wutumbulukiki loko kungavanga ha Drone.

⁴Ku drone afa kuli ni vutomi kutani vutomi afa byili kuvaninga ku vhanu.

⁵A livaningo dritivonekisi munyameni, kutani munyama awudrihlulanga.

⁶Kahumeleli mhunu, avito drakwe afa ali Yohana[2] lweyi angarumiwa hi Xikwembu Nkulukumba.

⁷Ateli kuva mboni, kutabeka vumboni henhla ka kuvaninga akuva hinkwavu vapfumela hikola kwake.

⁸Yohana afa ange yene livaningo, kambe ateli kuhambela livaningo vumboni.

⁹A livaningo dra xihlayelamfuri, ledri drivaningelaka vhanu hinkwavu, dritile amisaveni. Ledri drivaningelaka vhanu hinkwavu, dritile amisaveni

¹⁰ A Ritu afa drili kone misaveni; ni misava mitumbuluxiwi ha drone, kambe a misava amidritivanga,

¹¹Atile ku va le kwavu[3], kambe avamuyamukelanga.

¹²Kambe hinkwavu lava vamuyamukeliki, avanyiki ntamu wa kuva vana va Xikwembu Nkulukumba, vanga lava vapfumeliki ku vito drakwe,

¹³lava vangapswaliwangakiki hi ngati, nambi kukurandra ka nyama, nambi kukurandra ka wanuna, kambe vapswaliwiki hi kurandra ka Xikwembu Nkulukumba.

¹⁴A Ritu drandruluki nyama, driva driyaka makari kweru, kutani hihlaleli kuphatima[4] ka drone kunga kuphatima ka n'wana lweyi wa mun'we wa Tatana; afa atali hi timpswalu ni xihlayelamfuri.

¹⁵ Yohana amuhambeli vumboni, loko ahuweleli aku: Hi yelweyi afaka nihlayi yene loko niku: Lweyi ataka ntrhaku kwanga, awanitlula hi vukulu, hikusa afa ali kone loko ningasanganava kone, hikusa hi lweyi afaka anirangela.

¹⁶Kutani hi ntalo wa timpswalu takwe, hine hinkweru hiyamukeli timpswalu henhla ka timpswalu.

¹⁷ Hikusa a Nawu wunyikiwi hikola ka Moxe, kambe a timpswalu ni xihlayelamfuri switi ha Yesu Kriste.

¹⁸Akuna mhunu lweyi asamaka avona Xikwembu Nkulukumba ni kun'we. A N'wana lweyi anga mun'we, lweyi anga xifuveni xa Tatana, hi yene lweyi ahitlhamuxeliki leswi Tatana angaxiswone.

¹⁹Hi byolebyi a vumboni lebyi Yohana angahlaya byone, a siku ledri va-Yuda va-le-Yerusalema vangaruma vaprista ni va-Levi ku yene, akuyamuvutisa, vaku: Xana wene umani?

²⁰Angakanetanga, ayanguli hi kutiyisa swinene, aku: Mine, ahi mine Kriste.

²¹Kutani vamuvutisa, vaku: Loko swili tanu, wene umani xana? Hi wene Eliya xana? Aku: Ahi mine. Vaku: Umuprofeta xana? Ayanguli, aku: Im'hi!

²²Kutani vaku ku yene: Hi wene mani xana? Hidjula kutlhela ni yangulo ku lava vahirumiki. Xana wene utihlaya mani?

²³ Yohana aku: Mine ni ritu ledri drihuwelelaka huleni, driku: Lulamisani ndlela ya Hosi, hi laha na yene muprofeta Ezaya ahlayiki ha kone.

²⁴Vafarisi van'wana na vone afa varumiwile.

²⁵Kutani vamuvutisa vaku: Leswi ungeke Kriste, ungeke Eliya, na kone ungeke muprofeta, hikola ka yini ubabatisa xana?

²⁶Yohana avayangula, aku: Mine nibabatisa hi mati; kambe amakari kwenu akone lweyi n'wine n'wingamutivikiki;

²⁷lweyi ataka ntrhaku kwanga, lweyi swinga nifanekelangakiki kuntrhunxa tingoti ta swifambu swake.

²⁸A timhaka leto tihumeleli le Betaniya[5], a halahaya ka nambu wa Yordana, lomu Yohana afaka ababatisa kone.

²⁹ A siku ledri drintlhantamaka, Yohana avona Yesu na ata ku yene, kutani aku: Vonani! Hi leyi a Hambana ya Xikwembu Nkulukumba leyi yisusaka swidoho swa misava!

³⁰Hi yene lweyi afaka nihlaya yene loko niku: Kuta wanuna antrhaku kwanga lweyi anitlulaka hi vukulu, hikusa afa ali kone na mine ningasanganava kone.

³¹Mine afa ningamutivi, kambe nitile na nili lweyi ababatisaka hi mati, leswaku atavonekisiwa ku vana va Israyele.

³²Yohana abeki vumboni byake aku: Nivoni Moya wuxika hi le tilweni wufana ni tuva, watatrhama henhla kwake[6]

³³Mine afa ningamutivi, kambe Xikwembu Nkulukumba anibyelile, aku: Lweyi utakavona a Moya wuxikela ku yene, wutrhama henhla kwake, hi yene lweyi ababatisaka hi Moya wa Kuxwenga.

³⁴Mine Yohana nimuvonile, kutani nibeki vumboni bya leswaku hi yene N'wana wa Xikwembu Nkulukumba.

³⁵A siku ledri drintlhantamaka, Yohana atlhela ava kone kolahu, na ali ni vadondrisiwa vakwe vabiri.

³⁶ Loko avona Yesu na ahundra, aku: Vonani! Hi leyi Hambana ya Xikwembu Nkulukumba!

³⁷A vadondrisiwa lavo vabiri, vatiki vayingela leswi aswihlayaka, valandra Yesu.

³⁸Loko Yesu andruluka, avavona na vamulandra, ahanga vavutisa aku: N'widjula yini xana? Vaku ku yene: Rabi, utrhama kwini? (Rabi hileswaku Mudondrisi).

³⁹Aku ku vone: Tanani, n'watakuvona. Vahangaya, vayavona laha atrhamaka kone; kutani vatrhama ku yene a siku droledro; a nkama afa wudjula kuva wa vumune wa lihungu.

⁴⁰Andreyasi makwa Simoni Petrosi, afa ali mun'we ku lava va vabiri lava vayingeliki kukhanela ka Yohana, valandra Yesu.

⁴¹Yene arangi akuma Simoni makwavu, kutani aku ku yene: Hikumi Mesiya (hileswaku Kriste, Mutotiwa, loko kutlhamuxeliwa).

⁴²Amuyisa ku Yesu. Loko Yesu amulavisile, aku: U Simoni, n'wana Yohana. Utatxhuliwa Kefasi (Xigirika: Petrosi; hileswaku Ribye).

⁴³A siku ledri drintlhantamaka, Yesu afa adjula kuya Galileya, kutani akumi Filipi aku ku yene: Ni landre!

⁴⁴(Filipi afa ali wa le Betsayida[7], muti wa Andreyasi na Petrosi.)

⁴⁵ Filipi akuma nakulobye Nataniyele, aku ku yene: Lweyi Moxe atraliki timhaka takwe Nawini, ni vaprofeta himukumile: Hi Yesu wa Nazarete, n'wana Yosefa.

⁴⁶Nataniyele aku ku yene: Xana kungahuma yini lexi xinene a Nazarete ke? Filipi aku ku yene: Tana, uswivona.

⁴⁷Yesu loko avona Nataniyele ata na amukongomile, kutani aku: Vonani a mu-Israyele wa xihlayelamfuri, lweyi kungekena kukanganyisa ku yene.

⁴⁸Nataniyele amuvutisa aku: Xana unitivisa kuyini? Yesu amuyanguli, aku: Loko Filipi angasangana kuvitana, afa nikuvoni uli hansi ka nkuwa.[8]

⁴⁹ Nataniyele amuyangula, aku: Rabi, u N'wana wa Xikwembu Nkulukumba, u Hosi ya Israyele.

⁵⁰Yesu ayangula, aku ku yene: Xana upfumela hi leswi nitiki: Nikuvoni a hansi ka nkuwa, xana? Utavona leswi swikulu kutlula leswi.

⁵¹ Ayengeta aku ku yene: Nihlayelamfuri nili ku n'wine: n'witavona tilo dripfulekile, ni ntrumi ya Xikwembu Nkulukumba yili kari yintlhantuka ni kuxikela ku N'wana wa Mhunu.