Read ronga Yhn 10 Bible Online

Yhn 10 - ronga bible

Yhn 10

¹Yesu aku: Nihlayelamfuri nili ku n'wine; lweyi anganhingenikiki hi nyangwa arangeni dra tihamba, kambe atlulelaka hi kun'wana, i muyivi, ni muwutli.

²Kambe lweyi anhingenaka hi nyangwa, hi yene anga mubyisi wa tihamba.

³A mulaviseli wa nyangwa awamupfulela, kutani tihamba tiyingela ritu drakwe; avitana a tihamba leti tinga takwe hi mavito ya tone, atihumexa handle.

⁴Loko atihumexi handle ka ranga hinkwatu, afamba mahlweni ka tone, kutani tihamba timulandra hi le ntrhaku, hikusa titiva ritu drakwe.

⁵Tingaka tingalandri mhunu mumbeni, kambe titatrutrumela kule na yene, hikusa atitivi ritu dra vambeni.

⁶Yesu avabyeli xifaniso lexi, kambe vone avayingelisisanga leswaku afa avabyela yini.

⁷Yesu ayengeta aku ku vone: Nihlayelamfuri nili ku n'wine: hi mine nyangwa ya tihamba.

⁸ Hinkwavu lava vatiki na ningasanganatlhasa, i vayivi ni vawutli, kambe tihamba ativayingelanga.

⁹Hi mine nyangwa. Loko mhunu anhingena ha mine, atahuluxiwa. Swanga hi hamba leyi yinhingenaka yitlhela yihuma, yikuma vudelo.

¹⁰A muyivi atela kuyiva ntsena, ni kutlhava, ni kudlaya. Mine nitile leswaku tihamba tanga tivani vutomi, tibyikuma hi ntalo.

¹¹ Hi mine Mubyisi lweyi munene. A Mubyisi lweyi munene anyiketa vutomi byake hinkonta ya tihamba.

¹²Lweyi atirelaka mali na ange n'winyi wa tihamba, loko avona hava drita, atrika tihamba atrutruma kutani a hava dritiwutla ni kutihangalasa.

¹³Hi leswi angamutireli wa mali ntsena, angahlayi ntxhumu hi tihamba.

¹⁴Hi mine Mubyisi lweyi munene. Nitiva tihamba tanga, na tone tanitiva.

¹⁵ Swanga hi leswi Tatana anitivaka, ni leswi mine nitivaka Tatana; ninyiketa vutomi byanga hinkonta ya tihamba.

¹⁶Nakone, nini tihamba tin'wana leti tingeke ta ranga ledri. Nifanela kutibuyisa na tone. Titatayingela ritu dranga, kutani titava ntlhambi mun'we, tiva na Mubyisi mun'we.

¹⁷Tatana awanirandra, hikusa nitiyimiseli kunyiketa vutomi byanga, akuva nitatlhela nibyikuma.

¹⁸A kuna mhunu lweyi anganitekelaka byone. Mine nibyinyika hi kurandra kwanga. Nini ntamu wa kubyinyiketa, ni ntamu wakutlhela nibyikuma. Hi swoleswi Tatana wanga anileletiki kuyentxa swone.

¹⁹Akuhambana kutlhela kuva kone amakari ka va-Yuda hikola ka maritu wolawo.

²⁰ Lava va kutala ku vone afa vaku: Ani demoni, ahungukile! Xana n'wimuyingisetela yini?

²¹Kambe avan'wana afa vaku: A maritu lawa ahiya mhunu lweyi angani demoni. Xana a demoni dringaswikota kupfula mahlu ya va kufa mahlu xana?

²²A nkhuvu wa kukhangula ka Tempele[42] wuva kone Yerusalema ankameni lowo. Afa byili vuxika,

²³kutani Yesu afa aratela Tempeleni, aligumbeni dra Salomoni.

²⁴A va-Yuda vahanga mutrandrela, vaku ku yene: Utahidrivata kuyatlhasa drini xana? Loko uli Kriste, hibyele switwala.

²⁵Yesu avayangula, aku: Nin'wibyelile, kambe an'wipfumeli. A mintiro leyi nimiyentxaka hi vito dra Tatana wanga, hi yone minihambelaka vumboni.

²⁶Kambe an'wipfumeli, hikusa an'wi tihamba tanga.

²⁷A tihamba tanga tiyingela ritu dranga. Tadritiva, kutani tanilandra.

²⁸Nitinyika vutomi lebyi byingahelikiki; tingaka tingasuvi ni siku ni drin'we. Akuna mhunu lweyi atakatiwutla avokweni dranga.

²⁹Leswi Tatana wanga aninyikiki swone, swi ni lisima ngopfu, akuna lweyi angani ntamu kutlula yene.[43] Hikolahu ka leswo akuna mhunu lweyi akotaka kutiwutla avokweni dra Tatana.

³⁰Mine na Tatana hi mun'we.

³¹A va-Yuda vatlhela varola maribye vadjula kumukhandla.

³²Yesu aku ku vone: Hi kuyingiseta Tatana wanga niyentxi mintiro leya kutala ya kuxonga, leyi mipfaka ku Tatana. Xana hi wini ku yone, a ntiro lowu n'winikhandlelaka wone xana?

³³A va-Yuda vamuyangula, vaku: Ahikukhandli hi ntiro wunene lowu uwuyentxiki, kambe hi leswi usandraka Xikwembu Nkulukumba; hikusa wene umhunu kambe utiyentxa Xikwembu Nkulukumba.

³⁴Yesu avayangula, aku: Xana akutraliwanga Nawini wenu leswaku: Mine ni hlayi niku: mun'wana-ni-mun'wana i xikwembu nkulukumba?

³⁵ Loko Xikwembu Nkulukumba atxhuli swikwembu lava vangayamukela a ritu drakwe, (na kasi a Matralwa amana kuhelisiwa),

³⁶xana n'wine, n'wihlaya ha yini n'wiku nisandra Xikwembu Nkulukumba, na kasi mine nihlawuliwi niva nirumiwa misaveni ha Yene, xana?

³⁷Loko leswi niswiyentxaka minge mintiro ya Tatana wanga, n'wingatxhuki n'wipfumela ku mine!

³⁸Kambe loko nitira mintiro ya Tatana, nambi n'wingapfumeli ku mine, pfumelani mintiro, n'witayingelisisa ni kutiva leswaku Tatana ale ku mine, na mine ni le ku Tatana.

³⁹Kuva loko vayengeta vadringisa kumukhoma, kambe Yesu aphonyoka mavokweni yavu.

⁴⁰Kutani atlhela awela nambu wa Yordana, aya laha Yohana afaka ababatisi kone akusunguleni, kutani atrhama kone.

⁴¹Lava va kutala vata ku yene, vaku: Yohana angayentxanga xikombiso ni xin'we, kambe hinkwaswu leswi Yohana angahlaya henhla ka mhunu lweyi, switiyile.

⁴²Kutani vanyingi vapfumela ku yene.