Read ronga Yhn 13 Bible Online

Yhn 13 - ronga bible

Yhn 13

¹Na nkhuvu wa Paska wungasangava kone, Yesu hi kutiva leswaku a nkama wakwe wa kusuka misaveni, aya ku Tatana, wutlhasile, leswi arandriki vhanu vakwe lana misaveni, avarandriki kuyatlhasa vugan'wini.

²Kutani, loko vatrhami kudeni, Diyavulosi afa abeki khale ambilwini ya Yudasi Iskariyota, n'wana Simoni arengu dra kuwonga Yesu.

³Yesu, hikutiva leswaku Tatana abeki hinkwaswu amahlweni kwake, ni leswaku ahumi ku Xikwembu Nkulukumba, na swone aya ku Xikwembu Nkulukumba.

⁴Asekeleka atrika xilalelo, asusa xiyambalu xakwe, ateka thawula, atikhama ha drone.

⁵Kutani atxhela mati axibyeni, asungula kuhlampswa minenge ya vadondrisiwa, amisula hi thawula ledri afaka atikhami ha drone.

⁶Atrhindrekela Simoni Petrosi; kutani Petrosi aku ku yene: Hosi, udjula kunihlampswa minenge, xana?

⁷Yesu amuyangula, aku: Leswi niswiyentxaka awusinaswitiva swoswi, kambe utaswitiva ntrhaku.

⁸Petrosi aku ku yene: Anha ungahlampswi a minenge yanga, ni siku ni drin'we! Yesu amuyangula, aku: Loko ningakuhlampswi, awuna kuyaveliwa txhumu na mine.

⁹Simoni Petrosi aku ku yene: Hosi mingavi minenge ntsena, kambe ni mavoko ni nhloko!

¹⁰Yesu aku ku yene: Lweyi ahlambiki aswahadjuleki kutlhela ahlamba, loko minge minenge ntsena, hikusa miri yake hinkwayu mibasile. Kutani n'wine, n'wibasile, kambe ahi hinkwenu.

¹¹Hikusa afa ativa lweyi anga muwongi; hi laha angahlaya ha kone aku: Ahi hinkwenu n'wibasiki.

¹² Loko aheti kuhlampswa minenge yavu, ateka a xiyambalu xakwe, atlhela atrhama tafuleni; aku ku vone: N'wiyingelisisile leswi niswiyentxiki ku n'wine xana?

¹³N'winihlaya Mudondrisi ni Hosi. N'wihlayelamfuri, hikusa ni Yene.

¹⁴Kutani ke, loko mine ninga Hosi ni Mudondrisi wenu, nihlampswi minenge yenu, nan'wine n'wifanela kuhlampswana minenge.

¹⁵Hikusa nin'wibekeli xikombiso, akuva na n'wine n'wiyentxisa xileswi niyentxisiki xiswone ku n'wine.

¹⁶Nihlayelamfuri nili ku n'wine: A nandra ahi nkulu ku n'winyi wakwe, ni murumiwa ahi nkulu ku lweyi amurumiki.

¹⁷Loko n'witiva leswo, n'wini ndjombo loko n'wiswiyentxa.

¹⁸ Anihlayi n'wine hinkwenu; navativa lava nivahlawuliki; kambe hileswaku a tralwa drihetiseka, ledri dringaku: Lweyi adaka na mine kati, anitlakuxeli xirendre.

¹⁹ Nan'wibyela ni swoswi na swingasihumelela, akuva loko switahumelela, n'witapfumela leswaku Ni Yene.

²⁰Nihlayelamfuri nili ku n'wine: lweyi ayamukelaka lweyi ni murumiki, awaniyamukela; ni lweyi aniyamukelaka, ayamukela lweyi anirumiki.

²¹Loko Yesu ahlayi timhaka leto, atxhuka hi kuvaviseka moyeni, kutani apaluxa mhaka, aku: Nihlayelamfuri, nili ku n'wine, a mun'we ku n'wine ataniwonga.

²²A vadondrisiwa afa valavisana, vaganaganeka hi leswi afaka vangativi leswaku ahlaya mani.

²³Mun'wana wa vadondrisiwa vakwe, lweyi Yesu afaka amurandra, afa atrhami hi tlhelo dra Yesu, dra xinene;

²⁴kutani Simoni Petrosi amukwehleta akuva avutisa leswaku ahlaya mani.

²⁵A mudondrisiwa lweyo aseketela axifuveni xa Yesu, ahlevetela, aku: Hosi, hi mani xana?

²⁶Yesu ayangula, aku: Hi lweyi nitakapeta katinyana nimunyika. Kutani apeta katinyana, anyika Yudasi Iskariyota, n'wana Simoni.

²⁷Ntrhaku ka kuyamukela akatinyana, Sathana anhingena ku Yudasi. Kutani Yesu aku ku yene: Leswi udjulaka kuswitira, kahlula uswitira.

²⁸Akuvanga ni mun'we wa lava vatrhamisiki kudeni, lweyi angativa leswaku ahlaya yini ha swone.

²⁹A van'wana vayanakanyi leswaku, leswi Yudasi afaka ali mutameli wa xikhwama xa mali, Yesu amubyela kuya xava a swa nkhuvu leswi swidjulekaka, kumbe kuya nyika xa ntxhumu ku swisiwana.

³⁰Kolahu, loko Yudasi ateki katinyana, ahatla ahuma. Afa byili vusiku.

³¹Loko Yudasi ahumile, Yesu aku: Swoswi N'wana wa Mhunu atwalisiwile, na kone Xikwembu Nkulukumba atwalisiwile ku yene.

³²Loko Xikwembu Nkulukumba atwalisiwile ku yene, na yene Xikwembu Nkulukumba atamutwalisa amahlweni kwake, atahatla amutwalisa.

³³ Vana vanga, nahali na n'wine nkamanyana; n'witanidjula, kambe swanga hi leswi nibyeliki va-Yuda, na n'wine nan'wibyela: Laha ndriyaka kone n'wine an'wina kuswikota kuya.

³⁴Nin'winyika nawu lowu wumpswha, hileswaku: Randranani! Swanga hi leswi na mine nin'wirandriki, na n'wine randranani!

³⁵Hi kurandrana kwenu, hinkwavu vatativa leswaku n'wi vadondrisiwa vanga.

³⁶Simoni Petrosi aku ku yene: Hosi, uya kwini? Yesu amuyangula, aku: Lomu niyaka kone, ungaka ungaswikoti ku nilandra swoswi; kambe ntrhaku utanilandra.

³⁷Petrosi aku ku yene: Hosi, xana ninga hluleka kukulandra swoswi hikola kayini xana? Ninga nyiketa vutomi byanga hikola kwaku!

³⁸Yesu amuyangula, aku: Xana unganyiketa vutomi byaku hikola kwanga? Nihlayelamfuri nili ku wene, loko nkuku wungasina dringa, utava unilandruli kuraru.