Read ronga Yhn 14 Bible Online

Yhn 14 - ronga bible

Yhn 14

¹A timbilu tenu tingaganaganeki; pfumelani ku Xikwembu Nkulukumba; n'wipfumela ni le ku mine.

²A vutrhamu i byinyingi andlwini ya Tatana wanga; loko afa swinge tanu, ana nin'wibyelile; kutani niya n'wibekisela mbangu.

³Ni loko nitava ni fambile, nin'wibekiselile mbangu, nitabuya; nitan'witekela ku mine, akuva lomu ninga kone, na n'wine n'witava kone.

⁴Kutani a ndlela ya kuya lomu niyaka kone n'wayitiva.

⁵Tomasi aku ku yene: Hosi, lomu uyaka kone ahikutivi; xana a ndlela hingayitivisa kuyini?

⁶Yesu aku ku yene: Hi mine ndlela, ni xihlayelamfuri, ni vutomi; akuna mhunu lweyi angataka ku Tatana, loko kunge ha mine.

⁷Loko afa n'winitivile, an'witativa ni Tatana wanga; kusukela swoswi, n'wamutiva, na swone n'wimuvonile.

⁸Filipi aku ku yene: Hosi, hi kombe Tatana, kutani switahidringana.

⁹Yesu aku ku yene: Nitrhami na n'wine nkama wunyingi, kutani awusinitiva, Filipi? Lweyi anivoniki, avoni Tatana. Kutani uhlaya ha yini uku: Hikombe Tatana?

¹⁰Xana awupfumeli leswaku ni le ku Tatana, ni leswaku Tatana ale ku mine xana? Leswi nin'wibyelaka swone, aniswihlayi ha vuswanga. Tatana lweyi anga ku mine hi yene atiraka mintiro.

¹¹Nipfumelani leswaku ni le ku Tatana, na yene Tatana a le ku mine; loko n'winganipfumeli, pfumelani hikola ka mintiro.

¹²Nihlayelamfuri nili ku n'wine: Lweyi apfumelaka ku mine, na yene atatira mintiro leyi nimitiraka; atatira ni leyi mitlulaka yone, hikusa niya ku Tatana.

¹³Kutani nambi n'wingakombela yini na yini hi vito dranga, nitaswiyentxa, akuva Tatana atwalisiwa ku N'wana.

¹⁴Loko n'wikombela xa ntxhumu, hi vito dranga, nitaxiyentxa.

¹⁵Loko n'winirandra, n'witabekisa milawu yanga.

¹⁶Kutani mine nitakombela Tatana, yene atan'winyika Mupfuni mun'wana, lweyi atakava na n'wine hi la kungahelikiki,

¹⁷wunga Moya wa xihlayelamfuri, lowu a misava mihlulekaka kuwuyamukela, hikusa amiwuvoni, amiwutivi; kambe n'wine n'wawutiva, hikuva wutrhama na n'wine, kutani wutava ndreni kwenu.

¹⁸Ningan'witriki n'wiva swirombe; nitata ku n'wine.

¹⁹Antrhaku ka nkamanyana, a misava mingahanivoni, kambe n'wine n'witanivona. Leswi ni hanyaka, na n'wine n'witahanya.

²⁰Hi siku ledro, n'witativa leswaku ni le ku Tatana, na n'wine n'wile ku mine, na mine ni le ku n'wine.

²¹Lweyi ayamukelaka milawu yanga, ava amibekisa, hi yene lweyi anirandraka; kutani lweyi anirandraka, atarandriwa hi Tatana wanga; na mine nita murandra, niva nitivonekisa ku yene.

²²Yudasi (kungeke Iskariyota) aku: Hosi, ha yini uhlaya leswaku: utativonekisa ku hine, kunge ku misava xana? Yesu amuyangula, aku:

²³Loko mhunu anirandra, atabekisa ritu dranga, kutani Tatana wanga atamurandra, hitata ku yene, hitrhama na yene.

²⁴Lweyi anganirandrikiki, angabekisi maritu yanga; kutani a ritu ledri n'widriyingelaka, ahidranga, kambe i dra Tatana lweyi anirumiki.

²⁵Nin'witivisi leswi na nahali na n'wine.

²⁶Kambe Mutxhaveleli, wunga Moya wa Kuxwenga, lowu Tatana atakawurumela hi vito dranga, wutan'widondrisa hinkwaswu, ni kun'widrimuxa hinkwaswu leswi ni n'wibyeliki swone.

²⁷Nin'wisiyela kurula, nin'winyika kurula kwanga. Anin'winyikisi xileswi misava minyikisaka xiswone. A timbilu tenu tingatxhuki tiganaganeka, tingatxhuki titxhava.

²⁸N'wiswiyingelile leswi nin'wibyeliki niku: Nafamba, kutani nitatlhela nibuya ku n'wine. Loko afa n'winirandra, ana n'witrhavile leswi niyaka ku Tatana, hikusa Tatana i nkulu kutlula mine.

²⁹Kutani, nin'wibyeli leswi na swingasina humelela, akuva loko swihumelela n'witakota kupfumela.

³⁰Ni ngaha khaneli swakutala na n'wine, hikusa mufumi wa misava leyi awata. Kambe angana ntamu ahenhla kwanga.

³¹Kambe hileswaku misava mitiva leswaku nirandra Tatana, ni leswaku nitira swanga hi leswi Tatana anileletisiki xiswone. Sekelekani, ahifambeni hisuka la!