Read ronga Yhn 16 Bible Online

Yhn 16 - ronga bible

Yhn 16

¹Nin'wibyeli timhaka leto akuva n'wingatxhuki n'wikhunguvanyeka.

²Vatan'wihlongola amasinagogeni; na swone a nkama wata lowu mun'wana-ni-mun'wana lweyi atakan'widlaya atakapimisa leswaku atirela Xikwembu Nkulukumba.

³Vatayentxa swoleswo hikusa avativanga Tatana, nambi mine.

⁴Kambe nin'wibyeli leswo akuva loko nkama lowo wutlhasa, n'witaswidrimuka leswaku nin'wibyelile swone. Anin'wibyelanga leswo akusunguleni, hikusa afa nahali na n'wine.

⁵Kambe swoswi nimuka ku lweyi anirumiki. Kutani akuna mhunu amakari kwenu lweyi anivutisaka, aku: umuka kwini xana?

⁶Kambe leswi nin'wibyeliki leswo, a kuvaviseka kukone a timbilwini tenu.

⁷Kambe nan'wibyela xihlayelamfuri nili i swinene ku n'wine akuva ni muka, hikuva loko ningamuki, a Mutxhaveleli angaka angati ku n'wine; Kasi loko nisuka ku n'wine, nitan'wirumela yene.

⁸ Na yene kutaku loko atlhasile, atakholwisa misava leswaku xihono xikone, ni kululama kukone ni kuyavanyisa kukone.

⁹ A xihono, hikuva avapfumelanga ku mine;

¹⁰a kululama hikuva nimuka ku Tatana, n'wine n'wingahanivoni;

¹¹a kuyavanyisa, hikuva a mufumi wa misava leyi ayavanyisiwile.

¹²Neheni swakutala nifanelaka kun'wibyela swone, kambe swoswi an'wina kuswibyatrha.

¹³Kambe yelweyo ataku loko atile, wunga Moya wa xihlayelamfuri, atan'wifambisa axihlayelamfurini hinkwaxu. Hikuva angaka angavulavuli ha swake, kambe hinkwaswu leswi atakaswiyingela ataswihlaya, na kone atan'witivisa ni leswi switakahumelela.

¹⁴Atanitwalisa, hikuva leswi atakan'witivisa swone, atava aswikumi ku mine.

¹⁵Hinkwaswu leswi Tatana anganaswu, i swanga. Hi laha ningahlaya leswaku leswi atakan'witivisa swone, ataswikuma ku mine.

¹⁶Antrhaku ka nkamanyana, n'wingahandrivoni; kambe ntrhaku ka nkamanyana, n'witanivona. Hikusa niya ku Tatana

¹⁷A van'we ku vadondrisiwa vavutisana, vaku: Xana ahlaya yini, loko aku: Ntrhaku ka nkamanyana, n'wingahanivoni, kambe ntrhaku ka nkamanyana n'witanivona xana? Nileswi aliki: Hikusa niya ku Tatana?

¹⁸Vatlhela vaku: Ahlaya yini loko aku Ntrhaku ka nkamanyana xana? Ahiswitivi leswi ahlayaka swone!

¹⁹Yesu aswitiviki leswaku vadjula kumuvutisa, aku ku vone: Xana n'wivutisana hinkonta ya leswi nin'wibyeliki niku: Ntrhaku ka nkamanyana, n'winganivoni, kambe ntrhaku ka nkamanyana n'witanivona, xana?

²⁰Nihlayelamfuri nili ku n'wine: n'witabongosa n'widrila, kambe misava mitatrhava. N'wine n'witavaviseka kambe kuvaviseka kwenu kutandruluka kutrhava.

²¹Loko wansati adjula kuphuluka awavaviseka, hikusa nkama wutlhasile; kambe loko aphuluki n'wana, angahadrimuki kuxaniseka kwake hikola ka kutrhava, hi leswi kuphulukiwiki mhunu misaveni.

²²Switanu na n'wine: n'wavaviseka swoswi, kambe nitatlhela nin'wivona, kutani a timbilu tenu titatrhava; na kone akuna mhunu lweyi atakan'wisusela kutrhava kwenu.

²³Hi siku ledro, n'winganivutisi ntxhumu. Nihlayelamfuri nili ku n'wine: Hinkwaswu leswi n'witakakombela ku Tatana hi vito dranga atan'winyika.

²⁴Kutlhasa swoswi, an'wisangana kombela ntxhumu hi vito dranga; kombelani, n'witanyikiwa, akuva kutrhava kwenu kuhetiseka.

²⁵Nin'wibyeli leswo hi swifaniso; Kambe a nkama wata, lowu ningahatikivulavula ha swifaniso, kambe nitan'witivisa swa Tatana alivaleni.

²⁶Asikwini ledro n'witakombela hi vito dranga; kambe anin'wibyeli leswaku nitakhongota Tatana hinkonta yenu;

²⁷hikuva Tatana hi ntshima yake awan'wirandra hinkwenu hi leswi n'wine n'winirandriki, n'wiva n'wipfumela leswaku nipfi ku Xikwembu Nkulukumba.

²⁸Nisuki ku Tatana, nita misaveni; swoswi nitlhela nisiya misava, nimuka ku Tatana.

²⁹A vadondrisiwa vakwe vaku ku yene: Ahaa! Swoswi uvulavula alivaleni; awahavulavuli hi swifaniso.

³⁰Swoswi hayingelisisa leswaku utiva hinkwaswu, kolahu aswifaneli leswaku mhunu akuvutisa ntxhumu. Hikola ka leswo, hapfumela leswaku upfa ku Xikwembu Nkulukumba.

³¹Yesu avayangula, aku: Swoswi n'wapfumela xana?

³²Vonani, a nkama wata, ni swoswi wutlhasile, lowu n'witakahangalasiwa, mun'wana-ni-mun'wana a tlhelo drakwe, n'winisiya nili vuswanga. Kambe anivuswanga, hikusa Tatana ana mine.

³³Nin'wibyeli leswo akuva n'wivani kurula ku mine. Amisaveni leyi n'witavani nhlomulu, kambe tiyani ntamu, mine nihluli misava.