Read ronga Yhn 21 Bible Online

Yhn 21 - ronga bible

Yhn 21

¹Antrhaku ka leswo Yesu atlhela ativonekisa ku vadondrisiwa vakwe kusuhi ni tiva[60] dra Tiberiyasi. Ativonekisa hi ndlela leyi:

²Simoni Petrosi, na Tomasi lweyi valiki i Didimusi, na Nataniyele wa Kana wa le Galileya, ni vana va Zebedeya, ni vadondrisiwa van'wana vabiri va Yesu, afa vali kun'we.

³Simoni Petrosi aku ku vone: Niya ku kukuteni. Vaku ku yene: Na hine hifamba na wene. Kutani vasuka vaya nhingena abyatrhwini; kambe avaphasanga ntxhumu hi vusiku byolebyo.

⁴Loko byixa, Yesu ayima nkingeni wa tiva, kambe a vadondrisiwa avamutivanga leswaku i Yesu.

⁵Yesu ahangaku ku vone: Vana, n'wini swakuda xana? Vamuyangula, vaku: Im'hi.

⁶ Aku ku vone: Txukumetelani nkukutu hi tlhelo dra xinene dra byatrhu, n'witatikuma. Vahangatxukumetela, kutani vahluleka ni kuwukoka hikola ka kutala ka tinhlampfi.

⁷A mudondrisiwa lweyi Yesu afaka amurandra, aku ku Petrosi: Hi Hosi! Loko Simoni ayingeli leswaku I Hosi, ayambala xiyambalu xakwe xa le henhla, (hikusa afa angayambalanga ntxhumu), kutani atitxukumetela tiveni.

⁸Kambe a vadondrisiwa van'wana vata hi byatrhu, na vakoka nkukutu lowu afaka wutali hi tinhlampfi, hikusa afa vange kule ni nkinga; a mpfhuka wa kone afa wudjula kudringana madzana mabiri (200) ya minkono.

⁹Loko vahumi saveni, vata nkingeni, vavona makhala, ni nhlampfi leyi ntlhantekiwiki henhla ka wone, ni kati.

¹⁰Yesu aku ku vone: Pumbani tinhlampfi ku leti n'wahaka kuphasa swoswi, n'wibuyisa.

¹¹Simoni Petrosi anhingena, akokela nkukutu asaveni, na wutali hi dzana ni ntlhanu wa makume na tiraru (153) ya tinhlampfi leti tikulu. Kambe, nambi leswi afaka titali ngopfu, a nkukutu awuhandrukanga.

¹²Yesu aku ku vone: Buyani n'watafihlula. Kambe akavanga na mun'we lweyi angatiya kumuvutisa leswaku: Umani? Hikusa afa vaswitivile leswaku I Hosi.

¹³Kutani Yesu ayateka kati avanyika; ayentxisa xiswoleswo ni hi nhlampfi.

¹⁴ Ledri hi dra vuraru ledri Yesu angativonekisa ha drone ku vadondrisiwa vakwe, antrhaku ka loko apfuki kufeni.

¹⁵Kuti loko vafihlulile, Yesu aku ku Simoni Petrosi: Simoni, n'wana Yohana[61], xana wanirandra kutlula lava xana? Aku ku yene: Kunene Hosi! Waswitiva leswaku nakurandra, Yesu aku ku yene: Byisa swihambana swanga.

¹⁶Atlhela aku ku yene dra vubiri: Simoni, n'wana Yohana, xana wanirandra xana? Aku ku yene: Kunene Hosi! Waswitiva leswaku na kurandra. Yesu aku ku yene: Byisa tihamba tanga.

¹⁷ Atlhela aku ku yene dra vuraru: Simoni, n'wana Yohana, xana wanirandra xana? Petrosi avaviseka hi mhaka ya leswi amuvutisiki dra vuraru aku: Xana wanirandra xana? Kutani aku ku yene: Hosi, utiva hinkwaswu, waswitiva leswaku nakurandra. Yesu aku ku yene: Byisa tihamba tanga.

¹⁸Nihlayelamfuri nili ku wene: Loko wehe mumpswha, afa utitrimba bandi ha swaku, utifambela lomu ukurandraka. Kambe loko utava uduhwalile, utanalavuta mavoko yaku, kutani mun'wana atakutrimba akufambisa lomu ungakurandrikiki.

¹⁹Ahlaya leswo ku Petrosi akukombisa mafela lawa atakatwalisa Xikwembu Nkulukumba ha wone. Loko Yesu ahlayi leswo, aku ku yene: Nilandre!

²⁰ Petrosi kambe andruluka, kutani avona mudondrisiwa lweyi afaka arandriwa hi Yesu na ali kari avalandra. Hi lweyi afaka atiseketeli axifuveni xa Yesu, loko vali xilalelweni, lweyi angaku: Hosi, hi mani lweyi akuwongaka?

²¹Loko Petrosi a muvonile, aku ku Yesu: Hosi, kutavana yini ku lweyi xana?

²²Yesu aku ku yene: Loko nirandra leswaku atrhama niko nibuya, swingava yini ku wene xana? Wene nilandre!

²³A ritu drahangahuma a makari ka vamakwavu leswaku a mudondrisiwa lweyo angatifa. Kasi Yesu afa angamubyelanga leswaku angatifa; kambe afa ati: Loko nirandra leswaku atrhama niko nibuya, swingava yini ku wene xana?

²⁴Hi yene mudondrisiwa lweyo, lweyi ahambaka vumboni bya leswi aswitraliki; kutani haswitiva leswaku a vumboni byake byitiyile.

²⁵ Kambe swikone swin'vana, swakutala, leswi Yesu angaswitira, ni loko afa switraliwa ha xin'we-xin'we, anidumbi leswaku a misava mingaheta mabuku lawa mangatraliwaka.