Read ronga Yhn 4 Bible Online

Yhn 4 - ronga bible

Yhn 4

¹Kati loko Yesu ativi leswaku a vafarisi afa vayingeli leswaku yene afa akuma vadondrisiwa ni kubabatisa kutlula Yohana,

²(hambi swi tanu, afa ange yene Yesu lweyi afaka ababatisa, kambe afa ali vadondrisiwa vakwe),

³asuka Yudeya atlhelela Galileya.

⁴Afa afaneli kutremakanya hi ku tiko dra Samariya.

⁵Kutani aya tlhasa mutini lowu afaka vaku hi Sikari, kole Samariya, kusuhi ni nsimu leyi Yakobe afaka anyiki Yosefa, n'wanakwe.

⁶Kolahu afa kuni nhlovo ya Yakobe. Hileswo-ke Yesu atrhamisa nhlobyeni, hikusa afa akaralile hi kufamba. Afa wudjula kuva nkama wa nhlikanhi.

⁷Kutani kutatatlhasa lweyi wansati wa mu-Samariya ataka kuta ka mati. Yesu aku ku yene: Nihanani mati ninwa.

⁸A vadondrisiwa vakwe vone, afa vayi mutini akuya xava swakuda.

⁹ Lweyi wansati wa mu-Samariya aku ku yene: Leswi wene unga mu-Yuda, ukombelela yini mati ku mine ninga wansati wa mu-Samariya xana? A mhaka ya kone hileswaku a va-Yuda ni va-Samariya afa vangatolovelani.

¹⁰Yesu amuyangula aku: Loko afa utivi nyiko ya Xikwembu Nkulukumba ni leswaku i mani lweyi aliki nihanani ninwa, ana wene ukombeli ku yene, kutani yene afa atakunyika mati lawa mahanyaka[19]

¹¹A wansati aku ku yene: Hosi, awuna xikelelo, ni nhlovo yiyetile! Kutani a mati lawa mahanyaka, ungamakuma kwini xana?

¹²Xana ungava nkulu ku Yakobe tatana weru, lweyi ahinyikiki nhlovo leyi, mfuri na yene anganwa ku yone, yene ni vana vakwe ni swifuyu swake xana?

¹³Yesu amuyangula, aku: Mun'wana-ni-mun'wana lweyi anwaka mati lawa atatlhela atwa tora.

¹⁴Kambe mun'wana-ni-mun'wana lweyi anwaka mati lawa nitakamunyika wone, angaka angahatlheli atwa tora ni siku ni drin'we; kambe a mati lawa nitakamunyika wone, matava ku yene nhlovo ya mati lawa mapfelelaka, manyika vutomi lebyi byingahelikiki.

¹⁵Lweyi wansati aku ku yene: Hosi, nihanani mati wolawo, nitaka ningahatwi tora, ni kuva ningahatita la nitaka mati.

¹⁶Yesu aku ku yene: Famba, uya vitana nuna waku, n'wita halenu.

¹⁷A wansati amuyangula, aku: Anina nuna. Yesu aku ku yene: Uhlayelamfuri loko uku, anina nuna,

¹⁸hikusa uvini ntlhanu wa vavanuna, kutani ni lweyi ungana yene swoswi, ahi nuna waku; kolahu uhlaya swone.

¹⁹A wansati aku ku yene: Hosi, naswivona leswaku u muprofeta.

²⁰A vatatana veru vagandreli nhaveni leyi. Kasi n'wine n'wili: A mbangu lowu vhanu vafanelaka kugandrela ku wone hi le Yerusalema[20]

²¹Yesu aku ku yene: Pfumela ku leswi niswihlayaka wansati: A nkama wata, lowu n'wingatikigandrela Tatana na n'wili nhaveni leyi, nambi kuli Yerusalema.

²² N'wine n'wigandrela leswi n'wingaswitivikiki; hine higandrela leswi hiswitivaka; hikusa kuhuluxiwa kuhuma ku va-Yuda.

²³Kambe nkama wutlhasile, lowu vagandreli lava anga vone vatakagandrela Tatana hi Moya ni xihlayelamfuri; hikusa Tatana adjula vagandreli lava va kunhatu.

²⁴Xikwembu Nkulukumba i Moya kutani swifaneli lava vamugandrelaka, vamugandrela hi Moya ni xihlayelamfuri.

²⁵A wansati aku ku yene: Naswitiva leswaku, Mesiya, lweyi ahlayiwaka Kriste, awata; a siku atakata, atahitivisa hinkwaswu.

²⁶Yesu aku ku yene: Hi mine yelweyi, nikhanelaka na wene.

²⁷Hi nkama wolowo a vadondrisiwa va Yesu vatlhasa, vahlamala hi leswi akhanelaka ni wansati. Nambi swili tanu, akuvanga ni mun'we lweyi angaku: Udjula yini? Kumbe: Ukhanelela yini na yene xana?

²⁸Kolahu lweyi wansati asiya hotro yake, aya mutini ayabyela vhanu, aku:

²⁹Tanani, n'wivona mhunu lweyi anibyeliki hinkwaswu leswi ningaswiyentxa. Xana angava yene Kriste xana?

³⁰Vahangahuma mutini vaya ku Yesu.

³¹A nkameni wolowo a vadondrisiwa vakwe vamukhongota, vaku: Mudondrisi, dana!

³²Yesu aku ku vone: Nini swakuda, leswi n'wine n'wingaswitivikiki.

³³A vadondrisiwa vavutisana vaku: Xana kungavana mun'wana mhunu lweyi amubuyiseliki swakuda xana?

³⁴Yesu aku ku vone: A swakuda swanga hi kuyentxa kurandra ka lweyi anirumiki, ni kuhetisa ntiro lowu anirumiki kuwuyentxa.

³⁵Xana an'witoloveli kuhlaya leswaku: Kahasali mune wa tihweti, kutani kutata ntrhovelo, xana? Vonani, mine nili: Tlakuxani mahlu n'wilavisa masimu mawupfile akuva matrhoveliwa.

³⁶A mutrhoveli ayamukela hakelo drakwe, ahlengeleta mavele avutomini lebyi byingahelikiki. Angava lweyi abyalaka ni lweyi atrhovelaka vakota kutrhava kun'we.

³⁷Hikolahu axihlaya-hlaya lexi xiliki: A mun'wana awabyala, a mun'wana awatrhovela.

³⁸Na mine nin'wirumi kutrhovela lomu n'wingatirangakiki kone. Van'wana vatirele, n'wine n'wekuta hi kutrhovela swa nyuku wavu.

³⁹A va-Samariya lava vakutala vamuti wolowo vapfumela ku Yesu hikola ka leswi swihlayiwiki hi wansati, loko ati: Anibyeli hinkwaswu leswi ningaswiyentxa.

⁴⁰Kolahu, loko va-Samariya vatlhasi ku Yesu, vamuramba akuva atrhama na vone; ahangayatrhama kone masiku mabiri.

⁴¹Kutani kahangayengeteleka vunyingi bya lava vapfumeliki aritwini drakwe.

⁴²Vahangaku ku wansati: Ahahapfumeli hinkonta ya ritu draku; hikusa na hine himuyingeli ha sweru, kutani haswitiva leswaku lweyi kunene i Muhuluxi wa misava.[21]

⁴³Antrhaku ka masiku lawo mabiri, Yesu asuka kolahu, aya Galileya,

⁴⁴ hikusa yene ha vuswake afa ahlayelimfuri loko ati: A muprofeta anganikiwi xitxhavu atikweni drale kwavu.

⁴⁵Hileswo-ke, kutiki loko atlhasi Galileya, a va-Galileya vamuyamukela, hi leswi afaka vavoni hinkwaswu leswi aswiyentxiki a Yerusalema, ankhubyini, hikusa na vone afa vave kone.

⁴⁶Kutani Yesu nangweso atlhelela Kana wa Galileya, lomu afaka andruluti mati mayentxa vhinyo kone. Kolahu afa kuni ndruna[22], leyi afaka yivabyeliwa hi n'wana wa djaha a Kapernawume.

⁴⁷Loko ndruna leyo yiyingeli leswaku Yesu asukile Yudeya ata Galileya, yita ku yene, yitatamukombela leswaku afulamela aya hanyisa n'wana wa yone, lweyi afaka ali kusuhi ni kufa.

⁴⁸Yesu aku ku yene: Loko n'wingavoni mahlolana ni swihlamaliso, an'wipfumeli.

⁴⁹A ndruna yiku ku yene: Hosi, hingafulamela, na ndrisanyana wanga angasanganafa!

⁵⁰Yesu aku ku yene: Famba, a n'wanaku awahanya. A mhunu lweyi akholwa ku ritu ledri Yesu amubyeliki drone, kutani afamba.

⁵¹Kutiki loko ahafulamela akuya kaya, a malandra yake mamutlhangaveta, ma mutivisa, maku: A n'wana ahanyile.

⁵²Avavutisa nkama lowu n'wana a angasungula kuyapswa ha wone. Vaku ku yene: Avi tolo, hi nkama wa ntlhanu na mibiri wa lihungu, a kuhisa ka miri kumutrikiki.

⁵³A tatana wakwe adrimuka leswaku hi wo nkama lowu Yesu angaku ku yene: A n'wanaku awahanya. Kutani yene ni vandangu wakwe hinkwavu, vapfumela.

⁵⁴Ledri i hlolana dra vubiri ledri Yesu adriyentxiki loko asuki Yudeya ata Galileya.