Read ronga Yhn 7 Bible Online

Yhn 7 - ronga bible

Yhn 7

¹Antrhaku ka swone afa Yesu afamba-famba Galileya; angadjulanga kuya famba-famba Yudeya hikusa va-Yuda afa vadjula kumudlaya.

²A nkhuvu wa va-Yuda lowu valiki i wa mintronga[33] afa wu kusuhi.

³Kutani a vamakwavu vaku ku yene: Suka halenu, uya Yudeya, akuva vadondrisiwa vaku na vone vatahlalela mintiro leyi umiyentxaka.

⁴Hikusa akuna mhunu lweyi atirelaka axihundleni, loko adjula kutibyiwa; loko uyentxa leswo, tivonekise ku misava.

⁵A xihlayelamfuri hileswaku, nambi vamakwavu afa vangapfumeli ku yene.

⁶ Kutani Yesu aku ku vone: A nkama wanga awusanganatlhasa; kambe ku n'wine, masiku hinkwawu ankama wululamile.

⁷A misava mingaka mingan'wivengi, kambe mine manivenga, hikusa nitiyisa vumboni bya leswaku mintiro ya yone mibihile.

⁸N'wine, ntlhantukelani nkhubyini, kambe mine aniyi[34] nkhubyini wolowo, hikusa a nkama wanga awusanganatlhasa swinene.

⁹Loko ahlayi leswo, atisalela Galileya.

¹⁰Kambe kuti loko vamakwavu vantlhantukeli nkhubyini, na yene antlhantukela kone, kunge livaleni, kambe axihundleni.

¹¹A va-Yuda afa vamudjula nkhubyini, vaku: Akwini mhunu yelweyo?

¹²Afa kuni kun'unun'uta kunyingi axitrhungwini hi mhaka yake. A van'wana afa vaku: I mhunu munene! A van'wana vaku: Im'hi, akanganyisa xitrhungu.

¹³[35] Nambi swili tanu akuvangana mhunu lweyi angakhanela ha yene alivaleni, hikola ka kutxhava kuxanisiwa hi tindruna ta va-Yuda.

¹⁴Loko nkhuvu wuli makari, hilaha Yesu angantlhantukela Tempeleni asungula kudondrisa.

¹⁵ Kutani va-Yuda vahlamala, vaku: Xana mhunu lweyi abyikuma kwini vutivi, kasi anga dondranga?

¹⁶Yesu avayangula, aku: A dondro leyi niyidondrisaka, ahi yanga, kambe i ya lweyi anirumiki.

¹⁷Loko mhunu anavela kuyentxa kurandra ka Xikwembu Nkulukumba, atativa dondro leyi leswaku yihuma ku Xikwembu Nkulukumba, kumbe nivulavula leswi swinga swanga ntsena.

¹⁸Lweyi ativulavulelaka a swake ntsena, atidjulela kutwalisiwa, kasi lweyi adjulaka kutwalisa lweyi amurumiki, yelweyi adumbekile, akuna kusomboloka ku yene.

¹⁹Xana Moxe angan'winyikanga Nawu xana? Kambe nambi swili tanu angakone ni mun'we wenu lweyi abekisaka Nawu. Hikola ka yini n'widjula kunidlaya xana?

²⁰A xitrhungu xiyangula, xiku: Uni dimona[36] wene; hi mani adjulaka kukudlaya xana?

²¹Yesu avayangula aku: Nihanyisi mbabyi hi savata, kutani hinkwenu mahlamala.

²²Minyikiwi hi Moxe xitoloveto xa kusoka ahi leswaku afa xihuma ku Moxe, afa xihuma ku vatatana venu lava va kusungula.

²³ Leswi n'wisokisaka mhunu hi siku dra Savata, n'wiyentxela kubekisa Nawu wa Moxe, xana n'winihludrukela hi mhaka ya leswi mine ningahanyisa mhunu amirini yake hinkwayu hi siku dra Savata xana?

²⁴ N'wingayi hi liso loko n'wiyavanyisa, kambe yavanyisani hi kululama.

²⁵A vayaki van'wana va Yerusalema vaku: Xana lweyi ahi yene lweyi vamudjulaka leswaku vatamudlaya xana?

²⁶Lavisani! Avulavula alivaleni, kutani avamukhomi. Xana vafumi vangava vaswikumile ha kunene leswaku lweyi hi yene Kriste xana?

²⁷Lweyi hamutiva leswaku apfa kwini, kasi Kriste, a siku atakata, akuna mhunu ni mun'we lweyi atakativa lomu apfaka kone.

²⁸Loko Yesu ali kari adondrisa Tempeleni, atlakuxa ritu, aku: N'wanitiva, n'witiva ni lomu nihumaka kone! Anitanga ha swanga, kambe lweyi anirumiki hi yene swinene lweyi n'wine n'wingamutivikiki.

²⁹Mine namutiva, hikusa nihuma ku yene, na kone hi yene anirumiki.

³⁰ Kutani vadringisa kumukhoma, kambe akuvangana mhunu lweyi angayisa voko ku yene, hikusa a nkama wakwe afa wungasanganatlhasa.

³¹Lava vavanyingi amakari ka xitrhungu vapfumela ku yene, vaku: Xana loko Kriste atata, atayentxa mahlolana lawa matlulaka lawa mayentxiwaka hi mhunu lweyi xana?

³²A vafarisi vayingela leswi xitrhungu xi n'unun'utaka swone ha Yesu, kutani vaprista lava vakulu ni vafarisi varuma malandra kuya mukhoma.

³³Kolahu Yesu aku ku vone: Nahatava na n'wine nkamanyana, kutani antrhaku ka swone nitamuka ku lweyi anirumiki.

³⁴Hi nkama lowo, n'wine n'witanidjula kambe n'wingaka n'winganikumi, hikusa an'wina kuya lomu niyaka kone.

³⁵Kutani va-Yuda vavutisana, vaku: Xana adjula kuya kwini laha hitakahluleka kumukuma kone? Xana adjula kuya ku va-Yuda lava vahangalakiki amakari ka matiko, ni kudondrisa va-Matiko xana?

³⁶Xana ahlaya yini, loko aku: N'witanidjula, kambe n'wingatinikuma, ni loko aku: Laha nitakaya kone, n'wingaka n'wingati?

³⁷ Hi siku dra vugamu, dra nkhuvu, dringa ledri drikulu, Yesu asekeleka ayima, kutani atlakuxa ritu, aku: Loko mhunu ani tora, ate ku mine, atatanwa.

³⁸ Ambilwini ya lweyi apfumelaka ku mine kutahuma milambu ya mati lawa mahanyaka swanga hi laha Tralwa draKuhlawuleka drihlayaka ha kone.

³⁹Hikuhlaya swoleswo, Yesu afa adjula kuhlaya leswaku hinkwavu lava vapfumeleka ku yene afa vatayamukela a Moya wa Kuxwenga; hikusa kutlhasa nkameni wolowo afa Moya wungasiva kone, hikusa Yesu afa angasinatlakuxiwa.

⁴⁰Kuti loko van'wana amakari ka xitrhungu vayingeli maritu lawa, vaku: Ha kunene, lweyi hi yene muprofeta.

⁴¹ Van'wana vaku: Lweyi, akuva yene Kriste. Kambe van'wana vaku: Xana Kriste angahuma Galileya xana?

⁴² A Tralwa adrihlayanga leswaku Kriste atahuma lixakeni dra Davida, apswaliwa Betlehema, ku muti lowu Davida afaka atrhama ku wone xana?

⁴³A kuhambana kahangahumelela amakari ka xitrhungu hikola ka Yesu.

⁴⁴A van'wana ku vone afa varandra kumukhoma, kambe akavanga na mun'we angayisa voko ku yene.

⁴⁵Kuva loko malandra matlhelela ku varangeli va vaprista ni ku vafarisi; vone vavavutisa, vaku: Hikola kayini n'wingabuyanga na yene na n'wimubohile xana?

⁴⁶A malandra mayangula, maku: Akungiva na mhunu ni siku ni drin'we lweyi asamaka avulavula kufana ni mhunu lweyi.

⁴⁷A vafarisi vavayangula, vaku: Xana na n'wine n'wikanganyisiwile xana?

⁴⁸Hi mani ku vakulu va tiko ni ku vafarisi lweyi asamaka apfumela ku yene xana?

⁴⁹Kambe loko vali vhanu volavo, vangativiki Nawu wa Moxe varukiwile.

⁵⁰ A mun'wana wavu, Nikodema, lweyi angaya ku Yesu, ni vusiku, aku ku vone:

⁵¹ Xana a Nawu weru wuyavanyisa mhunu, na vangaranganga vamuyingela, ni kutiva leswi aswiyentxiki?

⁵² Vayangula, vaku ku yene: Xana na wene upfa Galileya ke? Lavisisa swinene utavona leswaku akuna muprofeta lweyi ahumaka Galileya.

⁵³Kutani vahangalaka, mun'wana-ni-mun'wana atimukela kaya kwake [37]