Read ronga Mnt 1 Bible Online

Mnt 1 - ronga bible

Mnt 1

¹ We Teofilo, nitralile a buku dra kuranga, na nitrhandra hinkwaswu leswi Yesu asunguliki kuswiyentxa ni kuswidondrisa,

²kukondra kuyatlhasa a siku ledri angatekeliwa a henhla-henhla, loko aleletile hi Moya wa Kuxwenga a vapostola lava afaka avalangile;

³vanga lava, a ntrhaku ka kuxaniseka kwake, angatikombekisa ku vone na ahanya, avanyika ni swikholwiso swinyingi hi kutivonekisa ku vone, hi masiku ya mune wa makume (40) na avabyela swa Mfumu wa Xikwembu Nkulukumba.

⁴Na ada na vone, avaleleti leswaku vangasuki Yerusalema, kambe varindrela kone a xidumbiso xa Tatana, lexi angaku: N'wiswiyingeli ha Mine.

⁵ Hikusa Yohana ababatisi hi mati, kambe andreni ka masikunyana n'wine n'witababatisiwa hi Moya wa Kuxwenga.

⁶Kolahu-ke, lava afaka vahlengeletanile, vamuvutisi vaku: Hosi, xana utapfuxela Israyele a mfumu hi nkama wolowo xana?

⁷Kutani Yene avayangula aku: Ahi swenu akutiva minkama ni tinguva leti Tatana atibekeliki tone hintamu wa vukulu lowu anganawu yene ntsena;

⁸ Ke, n'witanyikiwa ntamu loko a Moya wa Kuxwenga wutava wuxikeli ku n'wine, kutani n'witava timboni tanga la Yerusalema, ni le tikweni hinkwadru dra Yudeya, ni le Samariya, ni kuyatlhasa avugan'wini bya misava.

⁹Ntrhaku ka loko ahlayi leswo, antlhantukisiwa, na vamulavisile, kutani a tlavi drimufihla amahlweni yavu.

¹⁰Vaku na vaharonyelela tilweni, loko Yene afamba, kolaho kuhumelela a vavanuna vabiri na vayambali swiyambalo swa ntlhohe;

¹¹volavo vaku ku vone: Vavanuna va Galileya! Xana n'wiyimeli yini kolahu na n'wilavisa Tilweni? Yesu yelweyi asukiki ku n'wine aya Tilweni, atatlhela abuya hi ndlela yoleyi n'wimuvoniki antlhantuka ha yone.

¹²A vapostola vatlhelela Yerusalema, vasuka nhaveni ya Minhlwari, leyi yinga kusuhi na Yerusalema hi mpfhuka wa kilometro drin'we.

¹³Loko vanhingeni kone, vantlhantukela andlwini ya le henhla, lomu afaka vatrhamisa kone. Anga va Petrosi na Yohana, Yakobe na Andreyasi, Filipi na Tomasi, Bartolomewu na Yakobe (n'wana Alifewu), Simoni (Muhiseki), Yudasi (n'wana Yakobe).

¹⁴Hinkwavu afa vatiyisela hi mbilu yin'we akukhongoteni, kun'we ni vavasati, na Maria mamana wa Yesu, ni vamakwavu vakwe.

¹⁵Amasikwini wolawo, Petrosi ayima amakari ka vamakwavu (ke, vahlengeletani kone, a vhanu lava afaka vadjula kuva dzana na makume mabiri (120),) aku:

¹⁶Vamakweru, swifaneli leswaku kuhetiseka a Tralwa ledri a Moya wa Kuxwenga wungapfhumba ku drone hi nomu wa Davida, yinga mhaka ya Yudasi, lweyi angatiyentxa mukombi wa ndlela wa lava vakhomiki Yesu.

¹⁷Hikusa Yudasi afa ahlayiwa amakari kweru, na swone afa anyikiwi yavelo dra ntiro lowu.

¹⁸Yene-ke atixaveli nsimu hi muholo wa vubihi byake; kutani ayi ayawa hi nhloko, ahandruka hi le makari, a marumbu yake mava mahuma hinkwawu.

¹⁹A mhaka leyo yitiviwi hi vayaki hinkwavu va Yerusalema, la ka kuva a nsimu leyo yiva yitxhuliwa Hakeldama, hi lidrimi dra kwavu, hileswaku: Nsimu ya ngati.

²⁰ Hikusa kutraliwi abukwini dra Mapsalma: Avutrhamu byake abyindruluke rumbi, kungavi na muyaki ku byone. Nakone drili: Mun'wana ateke vulaviseli byake.

²¹Hileswo-ke, amakari ka vavanuna lava vaviki na hine, a nkama hinkwawu lowu Hosi Yesu angasungula akondra a heta na hine,

²²kusukela loko ababatisiwi ha Yohana kuyatlhasa loko asusiwi amakari kweru, atlhantukisiwa henhla-henhla, swifaneli kuva mun'we ku vone ava mboni kun'we na hine ya kupfuka kwake.

²³Kolahu-ke, kukombisiwa vabiri: Yosefa lweyi atxhuliwaka Barsabasi ava atxhuliwa kambe Yustu na Matiyasi.

²⁴Kutani vakhongota vaku: Hosi, wene utivaka a mbilu ya mun'wana-ni-mun'wana, hikombe ku lava vabiri, lweyi umuhlawuliki,

²⁵akuva ateka vutrhamu bya vutireli lebyi ni vupostola lebyi Yudasi abyitrikiki, atifambela ambangwini wakwe.

²⁶Ntrhaku vahlahluva hi mpswhampswha yi ba Matiyasi. Ahanga kontiwa kun'we ni vapostola va khume na mun'we.