Read ronga Mnt 11 Bible Online

Mnt 11 - ronga bible

Mnt 11

¹A vapostola ni vamakwavu lava afaka vali Yudeya, vayingeli leswaku na vone va-Matiko vayamukelile ritu dra Xikwembu Nkulukumba.

²Kutani loko Petrosi atlhantukela a Yerusalema, lava vanga va kusoka vakhanelisana na yene,

³vaku: Unhingeni andlwini ya vavanuna lava va kuka vangasokanga, uva uda navu!

⁴Petrosi ahangasungula ku vatlhavukanyisa timhaka hi kulandrelelana ka tone, aku:

⁵Mine, afa nili mutini wa Yopa, na nikhongota; akuwutlekeni nivoni xivoniso, wunga ntxhumu lowu afaka wuxika, wufana ni kapulana drikulu, ledri dritrimbiwiki hi mune wa tiponta, drixikaka hi le tilweni, dritatlhasa ku mine.

⁶Niku na nidrilavisisa, nilangusa kone, nivona swa mune wa minenge swa misava, ni swihari swa nhova, ni swikokovi, ni tinyanyana ta tilo.

⁷Kutani niyingela ritu ledri afaka drinibyela driku: Pfuka, Petrosi! Tlhava uda!

⁸Kambe niku: Im'hi, we Hosi! Hikuva ntxhumu wa kuyila, nambi wa kuka wungabasanga, awunginhingena anon'wini wanga.

⁹Kambe a ritu dritlhela driyangula ka vubiri hi le Tilweni driku: Leswi Xikwembu Nkulukumba angaswibasisa, wene ungahlayi leswaku swayila.

¹⁰Swihumelela kuraru, kutani hinkwaswu switlheliseliwa tilweni.

¹¹Kasi-ke hi nkama lowo, a vavanuna vararu vatlhasa nyangweni ya yindlu leyi afaka hitrhama ku yone, varumiwi ku mine, vapfa Khezareya.

¹²A Moya wunibyela kufamba na vone, ningaganaganeki. Na vone vamakweru volava va ntlhanu na mun'we vata ku mine, hiyanhingena andlwni ya lweyi wanuna.

¹³Yene ahitivisa leswi avonisiki xi swone a ntrumi yiyima andlwini yake, yimubyela: Ruma vhanu a Yopa kuyavitana Simoni lweyi atxhuliwaka Petrosi.

¹⁴Yene atakubyela leswi utaka hulukisa xiswone, wene ni ndangu waku hinkwawu.

¹⁵Loko nisungula kukhanela, a Moya wa Kuxwenga wuxika henhla kwavu, swanga hi leswi wungaxikisa xiswone henhla kweru akusunguleni.

¹⁶Kolahu-ke nidrimuka a ritu dra Hosi loko yiti: Yohana yene ababatisi hi mati, kambe n'wine n'witababatisiwa hi Moya wa kuxwenga.

¹⁷Loko-ke Xikwembu Nkulukumba avanyiki nyiko leyi yinga yin'we ni yeru hi kupfumela ku Hosi Yesu Kriste, xana mine afa nili mani, akuva nikota kuphikisa Xikwembu Nkulukumba, xana?

¹⁸Vone kambe, loko vayingeli timhaka leto, vahangarula, vadrumisa Xikwembu Nkulukumba, vaku: Kasi, Xikwembu Nkulukumba anyiki na vone va-Matiko akuva vandruluka vakuma vutomi!

¹⁹Loko vali lava vahangalasiwiki hi kuxaniseka loku kuhumeleliki akudlaweni ka Stefano, vahundrela mahlweni vayatlhasa a Fenikiya, ni le Kipra, ni le Antiyokiya, vangabyeli mhunu a Ritu loko kungali ku va-Yuda ntsena.

²⁰Kambe afa kuni vavanuna van'wana amakari kwavu, va-Kipra, ni va-Kirene; volavo, loko vatlhasi Antiyokiya, vadondrisa ni va-Girika, vavativisa Ivangeli ya Hosi Yesu.

²¹A voko dra Hosi afa drili na vone; kutani a vhanu vanyingi vapfumela, vandrulukela ku Hosi.

²²A va Kereke dra le Yerusalema, loko vativi mhaka leyi vahangaruma Barnabasi le Antiyokiya.

²³Yelweyi-ke, loko atlhasa, avona timpswalu ta Xikwembu Nkulukumba, atrhava ngopfu; na swone akhongotela hinkwavu leswaku vanamarela ku Hosi hi kutiya mbilu;

²⁴hikusa Barnabasi afa ali mhunu wa hombe, lweyi ataliki hi Moya wa Kuxwenga ni hi kupfumela. Kutani a vhanu vanyingi vatinyiketa ku Hosi.

²⁵Kutani Barnabasi asuka aya Tarso, ayadjula Saulo;

²⁶loko amukumile amuyisa a Antiyokiya. Kutani vavi kone a lembe hinkwadru ni Kereke, vadondrisa vhanu vanyingi; na swone, hi le Antiyokiya lomu a vadondrisiwa vasunguliki kutxhuliwa vakriste.

²⁷Amasikwini lawo, van'we vaprofeta vasuka Yerusalema vafulamela Antiyokiya,

²⁸mun'we ku vone, a vito drakwe afaka vaku hi Agabu, apfhumba hi Moya leswaku a ndlala yikulu yitawa amisaveni hinkwayu; hi yone leyi yihumeleliki ankameni wa Klaudiyu.

²⁹Kolahu-ke a vadondrisiwa vatrimba mhaka ya leswaku, vatarumela vamakwavu lava vanga Yudeya a swakuvapfuna, swanga hi leswi mun'wana-ni-mun'wana atakaswikuma

³⁰Vaswiyentxa kunene, vaswirumela lava vakulu hi mavoko ya Barnabasi na Saulo.