Read ronga Mnt 15 Bible Online

Mnt 15 - ronga bible

Mnt 15

¹Van'we vakukari vapfiki Yudeya afa vadondrisa vamakwavu vaku: Loko n'wingasokiwanga swanga hi kuleleta ka Moxe an'wina kuswikota kuhuluka.

²Kahangahumelela kukhanela ni kukanetana kukulu ka Pawulosi na Barnabasi kun'we na vone. Kutani vatiyisa leswaku, Pawulosi na Barnabasi, ni van'wana va-kwavu, vaya Yerusalema ku vapostola ni vakulu va Kereke dra muti lowuya hinkonta ya kukhanela loku.

³Kutani vone, na varumiwi hi Kereke, vatremakanya hi matikwana ya Fenikiya na Samariya, vatlhavukanyisa a kundruluka ka va-Matiko, vatrhavisa ngopfu a vamakwavu hinkwavu.

⁴Loko vatlhasi Yerusalema, vayamukeliwi hi Kereke ni vapostola ni vakuluku va Kereke, kolahu vavadrungulela hinkwaswu leswi Xikwembu Nkulukumba aswiyentxiki ha vone.

⁵Kambe kusekeleka van'we va ntlawa wa vafarisi lava vandrulukiki vapfumeli, vaku: Swifanekeli kuvasokiwa a vapfumeli ni kubekisa a nawu wa Moxe.

⁶Kolahu a vapostola ni vakulu vahangahlengeletana kutata vona mhaka leyo.

⁷Ntrhaku ka kukanetana kukulu, Petrosi asekeleka aku ku vone: Vamakweru, n'waswitiva swinene n'wine leswaku, kusukela khale, Xikwembu Nkulukumba anihlawulile amakari kwenu, akuva niyativisa Ivangeli ku va-Matiko akuva vayamukela vapfumeli.

⁸Na swone, Xikwembu Nkulukumba lweyi ativaka timbilu ta hinkwavu akombisi vumbilu ku vone hi kuvanyika Moya wa Kuxwenga swanga hi leswi angahinyika na hine.

⁹Mfuri angahambanisanga ntxhumu ni mun'we amakari kweru na vone, hikusa avadrivaleli swidoho na vone, hi kupfumela.

¹⁰Loko swili xileswi, xana n'wilwela yini ni Xikwembu Nkulukumba, hi kusindrisa vapfumeli lava kuyentxa ntxhumu lowu nambi vatatana veru, nambi hine, ahawukotanga ku wurwala?

¹¹Kasi hine hipfumela leswaku hihanyisiwi hi timpswalu ta Hosi Yesu, swanga ha vone.

¹²Hinkwavu vamiyela na xileswi vayingela loko Pawulosi na Barnabasi loko vadrungula hita mahlolana ni swikombisu leswi Xikwembu Nkulukumba aswitiriki ha vone amakari ka va-Matiko.

¹³Loko vaheti kukhanela, Yakobe avayangula aku: Vamakweru, niyingelani:

¹⁴Simoni Petrosi aheti kuhidrungulela hi laha Xikwembu Nkulukumba kusukela kusunguleni akombisi kutivonela kwake kuhlawula amakari ka matiko, a tiko drakwe!

¹⁵Leswi swiyingelana ni leswi switraliwiki hi vaprofeta. A Matralwa ya kuxwenga maliki:

¹⁶Antrhaku ka swone nitabuya, akutatapfuxa na kone a yindlu ya Davida leyi yiwiki; nitayaka marumbi ya yone, kutani nitlhela niyiyimisa.

¹⁷Akuva matiko man'wana matadjula Hosi, swanga hi matiko hinkwawu, lawa nimavitaniki akuva mava yanga. Kuhlaya Hosi,

¹⁸leyi yinyikiki kutibyiwa mintxhumu leyi kusukela minkama ya khale.

¹⁹Hileswo-ke a mavonela yanga hileswaku akuna mfanelo ya kuva kukaratiwa lava, amakari ka va-Matiko, vandrulukelaka ku Xikwembu Nkulukumba,

²⁰kambe vatraleliwa leswaku akuva vadrela a swinyamiso swa swikwembu, ni vumbuye, ni ngati ya swihari leswi swifiki hi xihluku.

²¹Hikusa kusukela minkameni ya khale, amutini mun'wana-ni-mun'wana, a nawu wa Moxe wuni lava vawuhaxaka amasinagogeni, lomu wuhlayiwaka Savata drin'wana ni drin'wana.

²²Kolahu a vapostola ni vakulu va Kereke kun'we ni Kereke hinkwadru vavona leswaku kuhlawuliwa a vavanuna amakari kwavu, vavaruma kun'we na Pawulosi na Barnabasi a Antiyokia. Kuhlawuliwi Yuda lweyi atxhuliwiki Barsabasi na Silasi, vavanuna lava vakhensiwaka amakari ka vamakwavu.

²³Vahangatrala papela ha vone, vaku: Hine vamakwenu, vapostola ni vakulu, ku n'wine vamakweru amakari ka va-Matiko le Antiyokiya, ni le tikweni dra Siriya, na Kilikiya, xawani!

²⁴Leswi hitiviki leswaku van'we va-kweru vatitan'wiganaganekisa hi maritu, van'wiyentxela ni mpfilu-mpfilu amimoyeni, na hine hingavapfumelelanga;

²⁵hivoni na swili swin'we, ku hine, hitlhangani hiva hiyingelana, hihlawula a vavanuna hi varumelela kun'we ni varandriwa veru Pawulosi na Barnabasi,

²⁶vanga vavanuna lava vanyiketiki vutomi byavu hinkonta ya Hosi Yesu Kriste.

²⁷Hileswo-ke hin'wirumeli Yuda na Silasi, vone vatakan'witlhamuxela hinkwaswu leswi.

²⁸Hikusa swi voneki swili swinene ku Moya wa Kuxwenga ni le ku hine leswaku, n'wingayengeseliwi kubindra loku kutlulisaka, handle ka leswi fanekeliki, swinga leswaku:

²⁹N'widrela a mintxhumu leyi mihahleliwiki swikwembu, ngati ya swihari swakufa hi xihluku, ni kuyentxa vumbuye. Loko n'witivonela ku mintxhumu leyo, n'witava n'wiyentxa swone. Hambanini!

³⁰Kolahu-ke, loko vone valelelile, vafulamela a Antiyokiya; Kutani loko vahlengeleti kone a xitrhungu, vanyikela a papela.

³¹Ntrhaku kakuva vadrihlayile, vatrhavi ngopfu hi kutxhaveleliwa loko vakuyamukeliki.

³²Yuda na Silasi, leswi na vone afaka vali vaprofeta, vatxhaveleli ni kutiyisa a vamakwavu hi maritu manyingi.

³³Ntrhaku kakuva vatrhami na vone ankamanyana, vahangalelelana hi kurula ni vamakwavu, kutani vatlhelela ku lava vavarumiki. [

³⁴Kambe Silasi avona swili swa hombe akuva ahasalanyana.]

³⁵Pawulosi na Barnabasi, vone vatrhami a Antiyokiya hi nkama wa kuleha, vadondrisa ni kurera a ritu dra Hosi, kun'we ni van'wana vanyingi.

³⁶Ntrhaku ka masikunyana, Pawulosi aku ku Barnabasi: Ahitlheli hiyendrela a vamakweru, a mitini hinkwayu leyi ku yone hihaxiki a ritu dra Hosi, akuva hiyavona leswaku voyini.

³⁷Barnabasi afa arandra kuteka na Yohana lweyi atxhuliwaka Marka kufamba navu.

³⁸Kambe Pawulosi apimisa leswaku aswifaneli leswaku atekiwa, lweyi angatravukana navu Pamfiliya, matrhan'wini ya kuya mahlweni kutlhasa vugan'wini bya liyendro.

³⁹Kavini kukanetana loku kukulu, lakakuva vakota vatravukana mun'wana-ni-mun'wana atlhelweni drakwe. Barnabasi ateka Yohana Marka kutani awelela Kipra.

⁴⁰Pawulosi hi tlhelo drakwe atihlawulela Silasi, asuka, na anaveleliwi kuxireleliwa hi Hosi hi vamakwavu.

⁴¹Ahangatremakanya Siriya na Kilikiya, atiyisa makereke a kupfumeleni.