Read ronga Mnt 16 Bible Online

Mnt 16 - ronga bible

Mnt 16

¹Pawulosi ayatlhasa na kone amitini ya Derbe na Listra. Kone afa kuni mupfumeli mun'we, atxhuliwaka Timotewu, n'wana wa mun'we wa wansati wa mu-Yuda wa mupfumeli, kambe a tatana wakwe afa ali mu-Girika.

²Yene afa ankhensiwa hi vamakwavu hinkwavu va-le-Listra ni le Ikoniya.

³Pawulosi afa adjula kumuteka afamba na yene, kutani amusoka hinkonta ya va-Yuda va le tikwaneni ledro, hikusa afa vaswitiva hinkwavu leswaku a tatana wakwe i mu-Girika.

⁴Amitini hinkwayu lomu afaka vahundra ha kone, afa vativisa a vamakwavu leswi switrimbiwiki hi vapostola ni vakulu va-le-Yerusalema, akuva vaswibekisa.

⁵Xiswoswo a makereke afa matiyisiwa kupfumeleni, nakone afa a nhlayu ya wone yiyandra siku ni siku.

⁶Vone vatremakanya matikwana ya Frijiya na Galatiya, leswi vayaleliwiki hi Moya wa Kuxwenga a kudrungula a ritu dra Xikwembu Nkulukumba le Aziya,

⁷vatlhasa tikweni dra le Misiya, vadringisa kuya Bitiniya, kambe a Moya wa Yesu awuvapfumelelanga.

⁸Vahangahundra hi le Misiya vafulamela Trowasi.

⁹Avusikwini, kuvoneka xivoniso ku Pawulosi: Avona wanuna wa le Makedoniya lweyi afaka ayimi amukombela aku: Welela a Makedoniya utatahipfuna!

¹⁰Ntrhaku ka xivoniso, hihatla hitilulamisela akuya kone, na hikholwi leswaku Xikwembu Nkulukumba ahivitani akuva hiyavahaxela a Ivangeli.

¹¹Hi sukiki Trowasi hi ngalawa, hikongoma a Samotrake, kutani hiyakhisa a Neyapolisi hi siku ledri ntlhantamaka.

¹²Loko hi suki kone hiyi a Filipiya, muti wa kusungula wa xifundra xa Makedoniya ni ku mimbangu mivundramaniki, na mifumiwa hi va-Roma. Hi trhami kone hi masikunyana.

¹³Hi siku dra Savata hihumi handle ka muti hiya nambyeni, lomu afaka hipimisa leswaku kuni mbangu wa swikhongoto; hitrhamisa kone, hi khanela ku vavasati lava afaka vahlengeletani kone.

¹⁴Mun'we wansati atxhuliwaka Lidiya, muxavisi wa swivunguvungu, wa muti wa Tiyatira, afaka atxhava Xikwembu Nkulukumba, afa ahiyingela swinene, kutani a Hosi yimupfula mbilu akuva atikaratela leswi afaka swihlayiwa ha Pawulosi.

¹⁵Loko ababatisiwile, yene ni va yindlu yake, ahikhongota aku: Loko n'wiyanakanya leswaku nadumbeka a Hosini, nhingenani andlwini yanga, n'witrhamisa kone. Ahisindrisela swone.

¹⁶Siku drimbeni loko hiya xikhongotweni, kati mun'we wanhwanyana, lweyi afaka ani moya wa kupfhumba, afaka akumela vinyi vakwe mali yinyingi hi kupfhumba kwake.

¹⁷Yelweyo wanhwanyana alandra Pawulosi na hine, na abandlukana aku: A vavanuna lava i malandra ya Xikwembu Nkulukumba lweyi anga henhla-henhla, vateli kutatan'wikombisa a ndlela ya kuhuluka.

¹⁸Ayentxa swoswo hi masiku manyingi. Kolahu, Pawulosi loko swimukaratile, andruluka aku ku moya wolowo: Nakuleleta hi vito dra Yesu Kriste, leswaku uhuma ku yene! Amoya wahanga huma hi wolowo nkama.

¹⁹A vinyi va nhwanyana vatiki va swivona leswaku a kudumba kwavu ka kukuma mali kuhelile, vakhoma Pawulosi na Silasi vavakokela hubyini, ku vafumi.

²⁰Vavayisa tindruneni, vaku: A vhanu lava, leswi vanga va-Yuda, vakarata muti wa kweru,

²¹hi kudondrisa swihila leswi hinga pfumeleliwiki ku swiyamukela ni ku swiyentxa, hine va-Roma.

²²Kolahu-ke axitrhungu xahangavapfukela, a tindruna tileleta leswaku vasusiwa swiyambalu swavu, ni leswaku vakhatisiwa.

²³Kuti loko vavabi ngopfu, vavanhingenisa bohelweni, valeleta muyimeli wa kone kuva avalavisisa swinene.

²⁴A muyimeli loko aleletiwi leswo, avanhingenisa abohelweni dra le mpfungwe akatrinyeta minenge yavu hi switri.

²⁵A vusikwini, Pawulosi na Silasi afa vayimbelela Xikwembu Nkulukumba hi kukhongota, na vabohiwa van'wana vavayingela.

²⁶Hi nomu-lo kuvani ximbeta xikulu kukota kutrekatrekisiwa ni masungulu ya yindlo ya bohelo. Atinyangwa hinkwatu tipfuleka, ni mapindra ya hinkwavu mantrhunxeka.

²⁷Loko lweyi wa muyimeli wa kone asisimuka, avona tinyangwa ta bohelo tipfulekile, ahlomula lipanga, adjula kutisunga, hi kuyanakanya leswaku a vabohiwa vetrutruma.

²⁸Kambe Pawulosi abandlukana hi ritu dra kutlakuka aku: Ungayentxi leswo! Hikusa hinkweru hikola!

²⁹Kolahu-ke a mulaviseli akombela mimotre, akahlula ayanhingena, asungula kururumela, akarama minengeni ya Pawulosi na Silasi.

³⁰Kutani avahumexa handle aku: Tihosi, xana nifanekela kuyentxa yini akuva nihuluka?

³¹Vone vamuyangula vaku: Pfumela ku Hosi Yesu Kriste, utahuluka, wene ni va ndangu waku.

³²Kolahu vamutivisa a ritu dra Hosi, kun'we ni hinkwavu lava afaka vali va yindlu yake.

³³Kutani yene avateka hi nkama wolowo wa vusiku, avahlampswa swilondra, ava ababatisiwa xikan'we ni va ndangu wakwe hinkwavu.

³⁴Loko avatekeli kaya kwake, avabekela a tafula; atrhava ngopfu, yene ni va ndangu wakwe hinkwawu, hi leswi vapfumeliki ku Xikwembu Nkulukumba.

³⁵Loko byixile, a tindruna tiruma valaviseli ku muyimeli wa bohelo vayaku: Ntrhunxa a vavanuna lavo.

³⁶A muyimeli wa bohelo, abyela Pawulosi maritu lawa: A tindruna tirumi vhanu akuva n'wintrhunxiwa. Hikolahu-ke humani swoswi, n'witifambela hi kurula.

³⁷Kambe Pawulosi aku ku valaviseli: Vahibi livaleni na vanga hiyavanyisanga, hine hinga va-Roma! Hiva hinhingenisiwa abohelweni, kutani swosi vahihumexa xihundleni? Ahi swone! Avati vone, hi ntshima, vatatahihumexa!

³⁸A valaviseli vayahlaya maritu lawu ku tindruna. Tone-ke titxhuka hi kuyingela leswaku vone i va-Roma.

³⁹A tindruna, titatakombela lidrivalelo, tivantrhunxa, tivatratriya kuva vahuma mutini.

⁴⁰Vone-ke vatiki vahuma bohelweni, vaya a kaya ka Lidiya. Ntrhaku ka kuva vavonani ni vamakwavu, vavatxhavelela, kutani vahangasuka vafamba.