Read ronga Mnt 17 Bible Online

Mnt 17 - ronga bible

Mnt 17

¹Loko vahundri hi le mitini ya le Amfipolisi na Apoloniya vatlhasi Tesalonika, lomu afaka kuni sinagoga dra va-Yuda.

²Pawulosi hi matolovelela yake aya asinagogeni, akhanelisana navu ha masavata mararu hi tlhelo dra Matralwa ya kuxwenga.

³Avatlhamuxela ni kuvapfuletela leswaku Kriste afa swifaneli kuva afa ava apfuka kufeni; hi Yesu Kriste lweyi nin'witivisaka Yene.

⁴Van'we amakari kwavu vakholwa, vatitlhanganisa na Pawulosi na Silasi. Na swone kupfumela vhanu vanyingi va va-Girika lava vatxhavaka Xikwembu Nkulukumba, ni vavasati vanyingi va kutxhaviseka.

⁵Kambe a va-Yuda, vataliki hi matrhoho, vahlengeleta vavanuna vakukari lava vamfani, va kutrhamisa antrendreleni, vahlengeleta xitrungu, vahamba mpfilu-mpfilu amutini. Vatrandrela yindlu ya Yasoni, vadjula vapostola akuva vavayisa amahlweni ka xitrhungu.

⁶Vatiki vangavakumi, vakokela Yasoni ni van'wana vamakwavu ku tindruna ta muti, na vabandlukana vaku: A vhanu lava hi lava vapfilunganyisiki misava hinkwayu, kutani vatlhasi ni kola mutini wa kweru,

⁷kutani Yasoni avayamukelile a kaya kwake. Kasi hinkwavu lava vayentxaka leswi swiyalanaka ni milawu ya Khezari, vali kuni hosi yi n'wana, anga Yesu.

⁸Loko a xitrhungu xiyingeli leswi ni tindruna, vangaruli

⁹kutani vatrika Yasoni ni van'wana, ntrhaku ka kuva vavasindrisa leswaku vahakela nandru wa kukari.

¹⁰Loko dripelile, a vamakwavu vakahlula vafambisa Pawulosi na Silasi a Bereya. Loko vatlhasi kone, vanhingena asinagogeni dra va-Yuda.

¹¹A va-Yuda lava afa vatxhaviseka kutlula a va-le-Tesalonika, hikusa vayamukeli ritu hi mbilu leyi yivilelaka ngopfu, na vakambisisa a Matralwa hinkwawu masiku, akuva vavona leswaku a timhaka leti Pawulosi atihlayaka ha kunene ti tanu.

¹²Hi ndlela leyi, kahangakupfumela lavanyingi ku vone, vavasati va va-Girika va kutlakuka atikweni, ni vavanuna va kuhlawa.

¹³Kambe loko a va-Yuda va-le-Tesalonika vativi leswaku na kone a Bereya a Ritu dra Xikwembu Nkulukumba drativisiwa ha Pawulosi, vata kone vatatapfuxa ni kupfilunganyisa a switrhungu.

¹⁴Kolahu a vamakwavu vakahlula vafambisa Pawulosi akuva aya likhulwini, kambe Silasi na Timotewu vasala kone.

¹⁵Lava afaka vaheketa Pawulosi, vamuyisa le Atena. Ntrhaku vatlhela, na vayamukeli a leleto ku Silasi na Timotewu leswaku vahatla vaya ku yene.

¹⁶Pawulosi na ahavalavisela a Atena, a moya wakwe wuhlundruka andreni kwake, loko avona a muti na wutali hi swifaniso leswi swigandreliwaka.

¹⁷Hileswo-ke asinagogeni afa akhanelisana ni va-Yuda ni van'wana vatxhavaka Xikwembu Nkulukumba. Ni le hubyini, siku drin'wana ni drin'wana, afa akhanela ni lava afaka vahumelela kone.

¹⁸Kutani van'we va tintlhari, vatxhuliwaka va-Epikuri ni va-Stoyiki vakhanelisana na yene, na van'we vaku: Xana a mukhaneli lweyi adjula kuhlaya yini? Van'we afa vaku: Ingi i muhlayi wa swikwembu swimbeni. Afa vahlaya leswi hikusa Pawulosi afa avativisa a ta Yesu ni ta kupfuxiwa ka vafi.

¹⁹Kolahu vamuteka, vamuyisa ku mbangu lowu valiki i Areopago[14] vaku: Xana hingaswikota a kutiva leswaku i dondro muni leyi uyihlayaka, xana?

²⁰Leswi utisiki atindleveni teru a mintxhumu ya kuhlamalisa, kutani hirandra a kutiva leswaku impswini swoleswo!

²¹Hikusa a va-le-Atena hinkwavu ni valuveli lava afaka vatrhama kone, afa vangahayentxi swimbeni loko kunge kuyingela ni kudrungula mintxhumu mimpswha ya vugamu.

²²Kolahu-ke Pawulosi ayima amakari ka Areopago aku: Vavanuna va Atena, nivona leswaku n'wine, mintxhumu hinkwayu n'wi vakhongoti ngopfu.

²³Hikusa loko nifambafamba, nilavisa leswi n'wiswigandrelaka, nikumi a xiluvelo kutraliwiki ku xone leswaku: Ku Xikwembu Nkulukumba lweyi wa kuka angatibyiwi. Lweyi n'wimugandrelaka na n'wingamutivi, hi Yene lweyi nin'widrungulelaka Yene.

²⁴Xikwembu Nkulukumba lweyi angahamba misava ni hinkwaswu leswi swinga ku yone, anga Hosi ya tilo ni misava, angatrhamisi matempeleni ya kuhambiwa hi mavoko ya vhanu,

²⁵na swone angatireliwi hi mavoko ya vhanu, swanga hi loko opfumala ntxhumu, kasi hi Yene anyikaka hinkwavu a vutomi, ni kuhefemula, ni hinkwaswu;

²⁶mfuri ha mun'we ntsena ayentxi a tinxaka hinkwatu ta vhanu, akuva vahanya amisaveni hinkwayu; ayimisi minkama ni mimbangu leyi matiko mafanelaka kutrhama ku yone.

²⁷Ayentxi leswo akuva vaswikota kudjula Xikwembu Nkulukumba, kumbe xana loko vamuhulumetela akuva vatakota a kumukuma, nambi leswi Yene angaliki kule na hine.

²⁸Hikusa hi le ku Yene hihanyaka, hifamba-fambaka, hinga kone, swanga hi leswi van'we ku vatrali venu na vone valiki: Mfuri hi va lixaka drakwe.

²⁹Swanga leswi hinga va lixaka dra Xikwembu Nkulukumba, ahifaneli kupimisa leswaku Xikwembu Nkulukumba afana ni gole, kumbe ni silivela, kumbe ribye, swiyentxiwiki hi vuvatli ni vutlhari bya mhunu;

³⁰Ke a minkama ya kukohleka loku, Xikwembu Nkulukumba amitrikile mikhaluta. Kambe swoswi, aleleta a vhanu hinkwavu amimbangwini hinkwayu leswaku vatlhelela ku Yene;

³¹hikusa Xikwembu Nkulukumba abeki siku ledri atakayavanyisa misava hi kululama, hi wanuna lweyi angamubekela swone, ava amuhambela vumboni amahlweni ka hinkwavu hi kumupfuxa kufeni.

³²Loko vayingeli Pawulosi ahlaya swakupfuxiwa ka vafi, van'we vahleka, van'wana vaku: Hahatatlhela hikuyingela hi nkama wumbeni amhakeni leyi.

³³Kolahu Pawulosi atifambela.

³⁴Kambe avan'we ku vone vanamarela ku yene, vandruluka vapfumeli. Amakari kwavu kavi na Diyonisiyo wa mu-Areopago, ni wansati, lweyi atxhuliwaka Damarisi, ni van'wana vavu.