Read ronga Mnt 18 Bible Online

Mnt 18 - ronga bible

Mnt 18

¹Antrhaku ka swone Pawulosi asuka Atena aya mutini wa Korinto.

²Ayakuma mun'we wa mu-Yuda valiki hi Akila, wa kubelekiwa a Ponto, lweyi afaka ahakutlhasa hi le Italiya kun'we ni nsati wakwe Presila, hi leswi a mufumi-nkulu Klawudiyo afaka aleleti leswaku a va-Yuda hinkwavu avafanekeli kusuka a Roma. Pawulosi ahanga vayendrela,

³leswi afaka ali wa ntiro wa kufana ni wavu, atrhama na vone atira; hikusa a ntiro wavu afa wuli wa kuhamba a matende.

⁴Nakone, asinagogeni, hi masavata hinkwawu, afa akholwisa va-Yuda ni va-Girika.

⁵Kambe loko Silasi na Timotewu vatlhasa vapfa Makedoniya, Pawulosi atinyiketela hi nkama hinkwawu aritwini, na atiyisa ku va-Yuda leswaku Yesu i Kriste.

⁶Kambe vone, vaku vatiyalisa, vasandra, yene aphumuna a minkhantxu yake, aku ku vone: A ngati yenu ayive henhla ka tinhloko tenu! Mine nibasile; kusukela swoswi nitaya ku va-Matiko.

⁷Asuka lano, ayatrhama a kaya ka mun'wana, avito drakwe anga Tisiyu Yustu, a mhunu lweyi afaka atxhava Xikwembu Nkulukumba, a yindlu yake afaka yivundramani ni sinagoga.

⁸Kambe Krispo lweyi wa mufambisi wa sinagoga, apfumela ku Hosi, ni va ndangu wakwe hinkwawu. Kutani va-le-Korinto vayingela ritu ledri afaka dri hlayiwa ha Pawulosi, vapfumela vava vababatisiwa.

⁹Kambe a Hosi yibyela Pawulosi hi xivoniso avusikwini, yiku: Ungatxhavi! Kambe yana mahlweni uvulavula ungamiyeli,

¹⁰hikusa nina wene. Akuna mhunu lweyi atakakota kuyentxa swakubiha ahenhla kwaku, akulamata, hikusa nini vhanu vanyingi amutini lowu.

¹¹Kolahu, Pawulosi ahangatrhama kone lembe drin'we ni ntlhanu wa tihweti na yin'we, na adondrisa Ritu dra Xikwembu Nkulukumba.

¹²Kambe a nkama Galiyo afaka afuma le Akaya, a va-Yuda vapfukela Pawulosi na vayingelanile, vamuyisa ahubyini,

¹³vaku ku hosi: A mhunu lweyi akholwisa vhanu ku leswaku vafanela kugandrela Xikwembu Nkulukumba hi mayentxela lawa mahambanaka ni nawu!

¹⁴Pawulosi aku ahadjula kukhanela, Galiyo aku ku va-Yuda: Loko afa kuni mhaka ya kudoha, kumbe ntiro lowu mfani, n'wine va-Yuda, afa nitan'wipfumelela hi kulandra mfanelo.

¹⁵Kambe leswi kunga kutengisana hi maritu, kumbe ka mavito, kumbe ka nawu wa kwenu, tivonelani swone n'wine ha vuswenu. Mine anirandri kuva mutremi ku mintxhumu leyo.

¹⁶Ahanga vahlongola hubyini.

¹⁷Kolahu vone vakhomi Sositenesi, a mufambisi wa sinagoga, vamuba hinkwavu, nambi kole hubyini. Kambe Galiyo afa angahlayi ntxhumu ha swone.

¹⁸Pawulosi atrhamisi kone masiku manyingi, ntrhaku alelelana ni vamakwavu, awelela Siriya, ateka Presila na Akila; abyevula nhloko a Kenkereya, na angasinawelela; hi kuhetisa xidumbiso lexi afaka axiyentxile.

¹⁹Loko vatlhasi mutini wa Efesa, avasiya kone, kambe yene, ayanhingena asinagogeni, akhanelisana ni va-Yuda.

²⁰Lavo vamutratriya akuva atrhamisa na vone nkamanyana, kambe yene angapfumeli;

²¹avalelela aku: Nitatlhela nin'wiyendrela kola, loko Xikwembu Nkulukumba aswirandra. Asuka Efesa,

²²kutani awelela Khezareya; loko atlhasi lano, atlhantukela na kone a Yerusalema ayalosela a Kereke, kutani aya Antiyokiya.

²³Atrhama kone a nkamanyana, atlhela asuka afamba hi matiko ya Galatiya na Frijiya, atiyisa a vadondrisiwa hinkwavu.

²⁴Ankameni wolowo, kutlhasa a Efesa, mun'we wa mu-Yuda avitaniwaka Apolo, wa kubelekiwa a Alexandriya, nuna wa kuvulavula swixonga, ataliki ntamu hi tlhelo dra Matralwa.

²⁵Lweyo afa adondrisiwi ndlela ya Hosi, afa ali mhunu wa nkhinkhi ni kuhiseka amoyeni, na adondrisa hi vunyaminyami a timhaka ta Yesu, na kasi afa ativa ntsena a babatiso dra Yohana.

²⁶Yene asungula kukhanela hi ntamu asinagogeni. Kambe Akila na Presila vamuyingela, vamutekela a kaya kwavu, vayamutlhamuxela hi kutlhavukanya a ndlela ya Xikwembu Nkulukumba.

²⁷Kolahu loko yene adjula a kuya le Akaya, a vamakwavu vamuseketela, vatralela a vadondrisiwa va kole akuva vamuyamukela ha hombe. Loko atlhasa apfuna ngopfu lava afaka vapfumelile, hi timpswalu ta Xikwembu Nkulukumba,

²⁸hikusa afa akaneta alivaleni a va-Yuda, na hi ntamu wukulu akombisa hi Matralwa leswaku Yesu i Kriste.