Read ronga Mnt 22 Bible Online

Mnt 22 - ronga bible

Mnt 22

¹Vavanuna, vamakweru ni vatatana! Yingelani a kutiyangulela kwanga amahlweni kwenu swoswi.

²Loko vayingela leswaku akhanela hi Xiheberu, vamiyelisisa swinene. Pawulosi aya mahlweni aku:

³Ni mu-Yuda mine, nibelekiwiki a Tarso wa Kilikiya, kambe niwundliwi amutini lowu, niva nidondrisiwa aminengeni ya Gamaliyele a kutivisisa swinene a Nawu wa vatatana veru; afaka nikhinyelela Xikwembu Nkulukumba, kumutirela swanga ha n'wine leswi n'winga swone namuhla.

⁴Navaxaniseli lifu lava valandraka a Ndlela leyi niboha vavanuna ni vavasati, ni vaheketa tindlwini ta bohelo.

⁵Swanga hi leswi na yene muprista lwenkulu angavaka mboni yanga, ni nhlengeletanu ya vakuluku va tiko hinkwayu, lava ningayamukela mapapela ku vone, vamatraleli vamakweru va va-Yuda va-le-Damaseka. Niyi kone akuva niyakhoma lava afaka vali kone nivabuyisa a Yerusalema, akuva vakhatisiwa.

⁶Kahumeleli leswaku loko nahafamba, nitlhasi kusuhi na Damaseka, anhlikanhini lowu wukulu, kutxhuka kuvoneka xikan'we a kuvaninga kukulu, kupfaka hi le tilweni, kunitrhandrela makari.

⁷Kolahu-ke, niwa hansi, kutani ni yingela ritu driku ku mine: Saulo, Saulo, xana unixanisela yini?

⁸Mine nivutisa niku: U mani we Hosi? Aku ku mine: Hi mine Yesu wa le Nazarete lweyi wene umuxanisaka.

⁹Na vone lava afaka vali na mine, vavona kuvaninga, kambe a ritu dra lweyi afaka avulavula na mine, avadriyingelanga.

¹⁰Kolahu mine nivutisa niku: Nitayentxa yini, we Hosi? A Hosi yiku ku mine: Sekeleka unhingena amutini wa Damaseka, hi lomu vatakakubyela hinkwaswu leswi ufanekelaka a kuswiyentxa.

¹¹Hikola ka kuphatima ka kuvaninga loku, afa ningahavoni, kutani nifambisiwa hi lava afaka vali na mine vanikhomi hi voko, niyatlhasa a Damaseka.

¹²Kone afa kuni wanuna lweyi valiki hi Ananiya, mukhongeli nkulu hi kulandra a Nawu; na kone afaka ankhensiwa hi va-Yuda hinkwavu lava afaka vatrhama kone.

¹³Ata ku mine, loko atlhasa aku ku mine: Saulo, makweru, tlhela uvona. Hi nkama wolowo, kupfuleka mahlu nitlhela nivona, nimulangusa.

¹⁴Kolahu yene aku: Xikwembu Nkulukumba wa vatatana veru akuhlawuleli kuva utiva kurandra kwake, uva uvona Mululami wakwe ni kuva uyingela a ritu dra nomo wakwe.

¹⁵Hikusa wene utava mboni yake akuva ubyela hinkwavu, leswi uswivoniki ni leswi uswiyingeliki.

¹⁶Kutani swoswi waharindrela yini? Sekeleka, ubabatisiwa, uhlampswiwa a swidoho swaku na uvitana a vito drakwe.

¹⁷Loko nibuyeli Yerusalema, niti nili kari nikhongota a Tempeleni, niwutleka, nivani xivoniso.

¹⁸Kutani lweyi afaka akhanela aku ku mine: Hangwesa uhuma Yerusalema, hikusa vangatiyamukela a vumboni byaku ha mine.

¹⁹Kolahu niyangula niku: We Hosi na vone vaswitiva leswaku afa niboha, niba lava vapfumelaka ku wene amasinagogeni.

²⁰Ni loko kuhalatiwa a ngati ya Stefano, a mboni yaku, na mine afa nili kone, niswipfumela; mfuri ni bekisi swiyambalu swa lava afaka vamudlaya.

²¹Kambe Yene aku ku mine: Famba, hikusa mine nitakuruma a kule, amakari ka va-Matiko.

²²Vamuyingiseti akondra ahlaya a ritu ledro, kutani vabandlukana vaku: Mususe lweyo amisaveni, hikusa angafanekeli akuva ahanya!

²³Leswi afaka vabandlukana, vahandrula swiyambalu, vatrutruxela ntrhuri henhla,

²⁴kolahu lweyi wa ndruna aleleta vhanu vakwe leswaku vanhingenisa Pawulosi akhokholweni, aleleta akuva vamuba kuko akhanela, akuva ativa mhaka leyi a xitrhungu xibandlukanelisaka xileswi ha yone ha yene.

²⁵Loko vamutrimbile hi mabandi, Pawulosi aku ku lweyi wa ndruna ya dzana, lweyi afaka ayimi kolahu: Xana n'wapfumeleliwa a kuba hi xisephu a mhunu wa mu-Roma na anga yavanyisiwanga, xana?

²⁶Aswiyingeliki lweyi wa ndruna ya dzana, atrhindrekela ku ndruna leyi yikulu ayaku: Xana udjula kuyentxa yini? Hikusa a nuna lweyi i mu-Roma.

²⁷A ndruna yikulu yita ku Pawulosi, yimuvutisa yiku: Nibyele: Xana u mu-Roma, wene? Pawulosi ayangula aku: Im'na, ni yene.

²⁸A ndruna yikulu yiyangula yiku: A kuva mu-Roma, mine niswixavi hi male yinyingi. Pawulosi aku: Kambe mine i kusukela akubelekiweni.

²⁹Kolahu-ke lava afaka vadjula kumuvutisa hi kumuba, vahatla vasuka. A ndruna yone yitala hi kutxhava hi kutiva leswaku i mu-Roma, ni hi leswi afaka yimubohile.

³⁰A siku ledri drintlhantamaka a ndruna leyi yikulu afa yidjula kutivisisa a mhaka leyi Pawulosi arambeliwaka yone hi va-Yuda. Hileswo-ke a ndruna yimutrhunxa, kutani yileleta kuhlengeletiwa vaprista lava vakulu ni. Huvu hinkwayu, ntrhaku yi leleta vabuyisa Pawulosi, yimukombisa ku vone.