Read ronga Mnt 27 Bible Online

Mnt 27 - ronga bible

Mnt 27

¹Loko kutremiwi leswaku hitasuka hiwelela Italiya, vanyiketa Pawulosi ni van'wana va vabohiwa ku mun'we wa ndruna ya dzana, a vito drakwe afaka vaku i Julio, wa butrhu dra hosi leyi yikulu.

²Hinhingena angalaweni ya le Adramita, leyi afaka yidjula kuya amatlhelweni ya le Aziya; kun'we na hine afa kuna Aristarko, mu-Tesalonika wa le Makedoniya.

³Hi siku ledri drilandrelaka, hiyatlhasa a Sidoni, lomu Julio ayentxeliki Pawulosi a vumbilu, amupfumelela kuyavona a vanakulobye ni kukuma kupfuniwa ha vone.

⁴Loko hisuki kone, hiwela, hilulama hi xihlale xa Kipra, hikusa atimheho afa tiyalelana ni ngalawa.

⁵Hitiki hitremakanya likhulu ledri drivundramaniki na Silisiya, na Pamfiliya, hiyatlhasa a Mira wa le Lisiya.

⁶Hi kukuma ngalawa ya le Alexandriya, leyi afaka yikongoma Italiya, a ndruna ya dzana yihinhingenisa ku yone.

⁷Hi masiku ya kuhlawa, hiwela hi kunana, na swihikaratela, hitlhasa amahlweni ka Kinido. Leswi a mheho afaka yingahipfumeleli a kuya mahlweni, hiwela hi le tlhelweni dra xihlale xa Kreta kusuhi na Salmona.

⁸Nambi leswi afaka swihinonon'hwela, hilulami hi xihlale, hikondra hiyatlhasa ku mbangu lowu valiki i Hlaluku-dra-hombe, kusuhi ni muti lowu valiki i Laseya.

⁹Nakone afa kuhundri nkama wa kuleha, mfuri a kuwela afa swini mhangu, ni leswi a Siku dra kutitrona afaka drihundrile, Pawulosi avamamulela,

¹⁰aku: Vavanuna, naswivona leswaku, a kuyendreni loku kutavani khombo ni kulahlekeliwa kukulu, kungaliki ntsena ka mintrhwalu ni ngalawa, kambe mfuri ni ka vutomi byeru.

¹¹Nambi swili tanu, a ndruna ya dzana yiyingela ngopfu a mufambisi wa ngalawa ni n'winyi wa yone, kutlula leswi swihlayiwiki ha Pawulosi.

¹²Hi kuvona leswaku a hlaluku afa dringafanekelanga kutrhama ku drone hi Vuxika, vanyingi vapimisa leswaku i swa hombe vasuka, kone, vadringisa kuyatlhasa Fenise, dringa hlaluku dra Kreta ledri drilavisiki Nyingitimu ni N'walungu, ni Vupeladambu, vatatrhama kone hi Vuxika.

¹³Kutiki kuhunganyana Nyingitimu, vapimisa leswaku vataswikota kuyentxa rengu dravu. Vakokela nsoma,[16] vahangaweta hi kusuhi na Kreta.

¹⁴Ntrhaku ka nkamanyana, a mheho ya xidzedze leyi valiki i Ewuroakilawu,

¹⁵kutani a ngalawa yikokiwa hi xidzedze, swingakoteki kulwa ni mheho, hitriketela yisusumetiwa hi mheho.

¹⁶Hitiki hiwela hi kusuhi ni xihlalenyana lexi valiki i Akuda, hikoti kukokela a boti dra ngalawa na swihikarateli ngopfu.

¹⁷A vaweti vatiki vadritlakuxela henhla, vatrimba ngalawa hi mapindra. Kambe leswi vangatxhava kutxhuka vayakhisa a hlalukweni dra Sirti, vasongi matranga, vatitriketela vakokiwa hi mheho.

¹⁸Hi siku ledri drilandrelaka hikola ka kuhundrisa a kubiwa hi xidzedze, vasusa a mintrhwalu vamitxukumeta.

¹⁹Hi siku dra vuraru, hi mavoko yavu, vutxukumeta na swone a switiro swa ngalawa.

²⁰Leswi a dambu ni tinyeleti afaka swingavonekanga hi masiku ya kuhlawa, na xidzedze xivi xikulu ngopfu, swiyentxi leswaku kuhela ku hine a kudumba hinkwaku ka leswaku hitahuluka.

²¹Nakone afa kuhundra nkama wa kuleha na kungadiwi ntxhumu; kolahu Pawulosi ayima amakari kwavu aku: Vavanuna, afa swidjulekile akuva n'winiyingiseta hingasuki a Kreta, leswaku hingakumiwi hi mhangu leyi, ni kulahlekeliwa loku.

²²Kambe swoswi nan'wikhongotela leswaku n'witiya timbilu, hikusa kungalahlekeliwi mhunu a vutomi amakari kwenu, kambe yone a ngalawa ntsena.

²³Hikusa a ntrumi ya Xikwembu Nkulukumba, lweyi ninga wakwe mine, mfuri nimutirelaka, yitivonekisi ku mine a vusikwini byolebyi,

²⁴yiku ku mine: Ungatxhavi, Pawulosi, hikusa swifanekeli uyisiwa amahlweni ka Khezari. Lavisa-ke, Xikwembu Nkulukumba akunyiki hinkwavu lava vanga ngalaweni kun'we na wene.

²⁵Hileswo-ke, tiyani timbilu, vavanuna, hikusa nini kudumba ku Xikwembu Nkulukumba leswaku atayentxa hi laha nibyeliwiki ha kone.

²⁶Kambe swifanekeli hiyakhisa ku xin'we xihlale.

²⁷Loko kutlhasi a vusiku bya vukhume na mune, na hahayisiwa hala ni hala alikhulwini dra Adriatiko, amakari ka vusiku a vaweti vayanakanya leswaku kumbe vatrhindrekeli kusuhi ni sava.

²⁸Vatiki vakamba, vakuma kuyeti ha makume mabiri ya minkono. Vaku vatlhasa mahlweni, vatlhela vakamba, vakuma khume dra minkono ni ntlhanu.

²⁹Kutani, hi kutxhava leswaku vawela mintrundrulwini ya maribye, vatriketa mune wa tinsoma anyalwini, na vakhongota leswaku byixa.

³⁰Kambe a vaweti afa vadjula kutimela vasuka ngalaweni, vaxikisela a boti dra ngalawa alikhulwini, swanga vadjula kuyaxikisela tinsoma ta le nhlokweni,

³¹kambe Pawulosi aku ku ndruna ya dzana ni ku masotxha: Loko lava vangatrhami angalaweni n'wingatiswikota a kuhuluka.

³²Kolahu a masotxha matrema a mapindra ya boti, madritrika driwela amatini dritrhindreka kule.

³³Byiku byaxa, Pawulosi avatratriya hinkwavu akuva vada swakuda, aku: Namuhla i siku dra vukhume na mune na n'wili kulaviseleni, n'wingadi ntxhumu.

³⁴Hileswo-ke nan'witratriya akuva n'wida, hikusa hi leswi switakan'wihuluxa. Hikusa kungalahleki nsisi wenu ni mun'we hinkwenu a nhlokweni.

³⁵Loko ahlayi leswo, ateka kati, atlangela Xikwembu Nkulukumba amahlweni ka hinkwavu, akhemelela, asungula kuda.

³⁶Vahangakuma kutiya ka mbilu hinkwavu, vada swakuda na vone.

³⁷Hinkweru afaka hili ngalaweni, afa hili madzana mabiri na ntlhanu na mabiri wa makume na ntlhanu na mun'we (276).

³⁸Loko vadi vaxura, vavevukisa a ngalawa hi kutxukumeta tirigo alikhulwini.

³⁹Byiku byaxa, a vaweti vangavoni tiko, kambe vavona mun'we ntrunga lomu afaka kuni sava, vahangavutisana kumbe aswingayapswi a kususumetela ngalawa kone.

⁴⁰Vatlakula a tinsoma, vatitriketela likhulwini, vantlhantlha mapindra ya xihindrulu, vanalavuta a tranga ledritrongo drale mahlweni, dritala hi moya, vakongoma saveni.

⁴¹Kambe vati vayatlhasa mbangwini wa vutlhanganu bya mati, vakhisisa kone a ngalawa; a nhloko ya yone yingahatrekatreki, kasi a nyalu afa yitrhoviwa hi ntamu wa mavimbi.

⁴²A masotxha afa mayanakanya a kudlaya vabohiwa akuva kungatrutrumi ni mun'we hi kuhlambeta.

⁴³Kambe lweyi wa ndruna ya dzana afaka adjula kuhuluxa Pawulosi, avatsimba arengwini dravu, aleleta leswaku lava vakotaka kuhlambeta varanga vatitxukumetela likhulwini, vayahuma saveni.

⁴⁴Ni leswaku lava vasaliki vahuma hi mapulangu, van'we hi ntxhumu vawukumaka wa ngalawa. Swoleswo hinkwavu vahuluka, vayatlhasa asaveni.