Read ronga Mnt 28 Bible Online

Mnt 28 - ronga bible

Mnt 28

¹Loko hi hulukile hinkweru, hahangativa leswaku a xihlale xa kone hi lexi valiki i Malta.

²Kambe a vatrhami va kone, vahiyamukela hi vumbilu byikulu ngopfu, hikusa vatrhiveli ndrilo vahiramba hinkweru hikusa afa kuna mpfula, mfuri akuni xirami.

³Kambe Pawulosi atiki ahlengeleta mahlahlanyana, amabeka andrilweni, kuhumelela a xipswhahla xihuma hi kutwa a kuhisa, xinamarela avokweni drakwe.

⁴A vabarbari, vavona xihari xilenga-lenga avokweni dra Pawulosi, vabyelana van'we ni van'wana vaku: A mhunu lweyi kunene-nene i mudlayi, nambi leswi ahulukiki alikhulwini, kambe avudrihisi bya le tilweni abyipfumeli leswaku ahanya.

⁵Kambe yene ahlakahlela axihari andrilweni, akumeka na angavavisiwanga.

⁶Vone afa valavisela leswaku atahatla apfimba, kumbe leswaku atawa hansi xikan'we a fa. Valavisela ankama wa kuleha, vavona angakumi hi mhangu ni yin'we, vandruluka mavoneleni vaku yene i xikwembu kasi.

⁷Afa kuni tikwana kusuhi ni mbangu lowo ledri afaka drilumba a murangeli wa xihlale, a vito drakwe afaka vaku i Publiyu. Ahiyamukela masiku mararu, ahirurela hi vumbilu byikulu.

⁸Kambe a tatana wa Publiyu afa ayetlelile, axanisiwa hi mavabyi ya kubuyelela ni kuhiseta ka miri. Pawulosi anhingena ku yene, akhongota, amuntlhanteka a mavoko, amuhanyisa.

⁹Hi kuvona leswi swihumeleliki, a van'wana va xihlale lava afaka vani vuvabyi vata, vatatahanyisiwa,

¹⁰vahangahiyentxela swihluwa leswi swikulu, mfuri akufambeni kweru, vahilongelela mintxhumu leyi afaka hitamivilela hi ndlela.

¹¹Antrhaku ka tihweti tiraru, hifamba hi ngalawa ya le Alexandriya, leyi faka yitrhami xihlaleni hi Vuxika, leyi afaka yini mudjeka wa Diyoskurusi.

¹²Hiku hiyatlhasa a Sirakusa, hi trhamisa kone masiku mararu.

¹³Hisuka kone, hiyatlhasa a Rejiyo. Kuku kuhundra a siku drin'we, anyingitimu yihunga, kutani hifamba hi dra vubiri hiyatlhasa Puteyoli,

¹⁴lomu hikumiki van'we vamakweru vahikombela kutrhamisa na vone ntlhanu wa masiku na mabiri, kutani hiyatlhasa a Roma.

¹⁵A vamakweru va mbangu lowuya, vatiki vayingela kuvulavuliwa ha hine, vata vatatahikuma ambangwini lowu wutxhuliwaka Apiyo ni Tiyindlwaneni Tiraru. Pawulosi loko avavona, atlangela Xikwembu Nkulukumba, akuma ni kutiya mbilu.

¹⁶Loko hitlhasi a Roma, Pawulosi apfumeleliwa ku titrhamela vuswake, kun'we ni musotxha lweyi afaka amulavisela.

¹⁷A ntrhaku ka masiku mararu, yene ahlengeleta a vakulu va va-Yuda, vatiki vahlengeletanile, aku ku vone: Vavanuna, vamakweru, mine nambi ningayentxanga ntxhumu lexi xihambanaka ni vhanu, ni swihena swa vatatana veru, nasusiwi Yerusalema, hi va-Yuda na nibohiwile, ninyiketiwa mandleni ya va-Roma;

¹⁸vone, vatiki vanivutisisa, vadjula kunintrhunxa hi kuva kungena nandru ku mine, lowu nifanekelaka kufa ha wone.

¹⁹Kambe leswi va-Yuda afaka vayalisa, nisindriseki kukombela a kuyavanyisiwa ha Khezari, swanga hi loko afa nini ntxhumu lowu ningadjulaka a kurambela a tiko dreru ha wone.

²⁰Hi leyi a mhaka nin'wivitaniki ha yone, akuva nin'wivona, nikhanela na n'wine; hikusa a pindra ledri, nibohiki hinkonta ya kulavisela ka Israyele.

²¹Vone vaku ku yene: Ahi yamukelanga mapapela ya kupfa Yudeya mahlaya ntxhumu ha wene, akutlhasanga mhunu wa vamakweru wa kutata hidrungulela, kumbe kuhlaya ntxhumu wa kubiha ha wene.

²²Kambe haswidjula a kuyingela ha wene leswi uswiyanakanyaka, hikusa haswitiva leswaku a dondro leyi yimpswha, yiyaliwa hinkwaku.

²³Vamubekela a siku. Ntrhaku vayabuya ku yene a ndlwini yake, na vali vanyingi. Yene avatlhavukanyisa hi kuhambela vumboni a Mfumu wa Xikwembu Nkulukumba; adjuletela a kuvakholwisa mayelano na Yesu, na asukela a Nawini wa Moxe ni ku vaprofeta, kusukela amixweni kuyatlhasa amadambyeni.

²⁴Van'we vakholwa leswi swihlayiwiki, van'wana vanga pfumeli,

²⁵valela na vangayingelani, kutani Pawulosi ahlaya a ritu drin'we aku: A Moya wa Kuxwenga wu hlayelamfuri ku vatatana veru ha Ezaya muprofeta,

²⁶loko wuku: Famba uyahlaya leswi ku vhanu lavo: A kuyingela, n'witayingela, kambe n'wingaswiyingelisisi, ni kulangusa, n'witalangusa, kambe n'wingaswivonisise.

²⁷Hikusa a mbilu ya vhanu lava yitinonon'hwisile. Hi tindleve, vayingela na swivakaratela, ni mahlu yavu mapfalekile akuva vangavoni hi mahlu, nambi hi tindleve, a kuyingelisisa, vandrulukela ku mine, akuva mine nivahanyisa.

²⁸Ke, switivani leswaku a ritu ledri dra huluko dra Xikwembu Nkulukumba drirumeliwi ku va-Matiko, kutani vone vatadriyingiseta.

²⁹Loko Pawulosi ahlayi leswo, a va-Yuda vafamba na vakanetana ngopfu.

³⁰Pawulosi atrhamisa malembe mabiri andlwini leyi afaka avolekiwi yone, ayamukela hinkwavu lava afaka vata ku yene,

³¹na ativisa livaleni ta Mfumu wa Xikwembu Nkulukumba, na afa avadondrisa hita Hosi Yesu Kriste, na kungali na mhunu lweyi amusivelaka.