Read ronga Mnt 3 Bible Online

Mnt 3 - ronga bible

Mnt 3

¹Siku drin'wana, Petrosi na Yohana afa vatlhantukela aTempeleni hi nkama wa xikhongoto, wunga wa ntlhanu na mune[2].

²Ke afa kuni mun'we wanuna, wa kukhuta kusukela akubelekiweni kwake, afaka vamutlakula siku drin'wana ni drin'wana vayamubeka anyangweni ya Tempele, leyi yihlayiwaka Yakuxonga, akuva akombela xa ntxhumu ku lava vanhingenaka.

³Loko avona Petrosi na Yohana vakongoma kunhingena a Tempeleni, akombela leswaku vamunyika xa ntxhumu.

⁴Kutani Petrosi afa ali kun'we na Yohana akongomisa ku yene a mahlu, aku: Hi lavise!

⁵Yene avalavisa, na ayanakanya leswaku atayamukela xa ntxhumu.

⁶Kambe Petrosi aku: Anina silivhela nambi gole, kambe nitakunyika leswi ningana swone: hi vito dra Yesu Kriste, wa le Nazarete, sekeleka ufamba!

⁷Loko ahlayi leswo, Petrosi amukhoma hi voko dra xinene, amusekelekisa. Hi nomu-lo a minkondro ni mahlakala yake switiyisiwa,

⁸yene atlula ayima, asungula kufamba. Anhingena navu a Tempeleni, na atifambela, atlulatlula, atlangela Xikwembu Nkulukumba.

⁹Hinkwavu vhanu vamuvona loko atifambela na ankhensi Xikwembu Nkulukumba.

¹⁰Vamutiva leswaku hi yelweyi afaka atrhamela kuhananiwa anyangweni ya kuxonga ya Tempele, kutani vatxhuka ni kuhlolelwa hi leswi swimuhumeleliki.

¹¹A wanuna lweyi afaka ahanyisiwile afa alandrelela Petrosi na Yohana. Kutani a vhanu hinkwavu, afa vatali hi kuhlamala, vatrutrumela lomu afaka vali kone atlhelweni dra Tempele lomu kuhlayiwaka a ligumbeni ledri valiki i dra Salomoni.

¹²Petrosi loko aswivona ayangula xitrhungu aku: Vavanuna va Israyele, ha yini n'wihihlamalisa xileswi? N'wihilavisisela yini, swanga hi loko hiyentxi leswaku yelweyi afamba hi ntamu kumbe hi vukhongoti byeru?

¹³Xikwembu Nkulukumba wa Abrahamu, ni wa Yisaki, ni wa Yakobe; Xikwembu Nkulukumba wa vatatana veru adrumisi nandra wakwe Yesu, lweyi n'wine n'wingamunyiketa Pilatu ni kumulandrula amahlweni kwake. Kasi Pilatu afa amuyavanyiseli kutrhunxiwa.

¹⁴N'wiyali lweyi wa kuxwenga ni wa kululama, n'wavi n'wikombela kuva kuntrhunxiwa wanuna wa mudlayi.

¹⁵Hi ndlela leyo, n'widlayi Hosi ya vutomi, leyi Xikwembu Nkulukumba ayipfuxiki kufeni, kutani hine hi timboni ta swone.

¹⁶Hi kupfumela ku vito dra Yesu, a vito drakwe dritiyisi a mhunu yelweyo n'wimuvonaka, n'wimutivaka; ke a kupfumela ku Yesu kunyiki vutomi kulweyi n'wimuvonaka lana hinkwenu.

¹⁷Swoswi-ke vamakweru, naswitiva leswaku n'wiyentxi leswi hi kukohleka, na tone tihosana tenu, swive tano.

¹⁸Kambe Xikwembu Nkulukumba ahetisisi xiswoswo leswi angaranga aswitivisa hi nomu wa vaprofeta; a kuxaniseka ka Kriste wakwe.

¹⁹Hileswo-ke, tisolani n'windruluka, akuva swidoho swenu switimiwa,

²⁰akuva akuvoneka ka minkama leyi mipfaka ku Hosi kun'witisela kuwisa, ni leswaku yin'wirumela Kriste, lweyi angabekeliwa n'wine khale, anga Yesu,

²¹lweyi swifanekeliki a tilo drimuyamukela kukondra kutlhasa minkama ya kupfuxetiwa ka hinkwaswu, leyi Xikwembu Nkulukumba angakhanela ha yone khale, hi nomu wa vaprofeta va kuxwenga vakwe.

²²Hi xihlayelamfuri Moxe ati: Hosi Xikwembu Nkulukumba wenu atan'wihumexela muprofeta amakari ka va-le-kwenu, lweyi wanga ha mine; n'witamuyingela ku hinkwaswu leswi atakan'wibyela swone.

²³Kambe lweyo ni lweyo angatikiyingela muprofeta yelweyo, atasuvisiwa atikweni amakari ka xitrhungu.

²⁴Na vone vaprofeta hinkwavu, lava vangadondrisa kusukela ku Samuwele ni lava vamuntlhantamiki, vativisile leswi switakahumelela ku masiku lawa.

²⁵ N'wine n'wi vana va vaprofeta ni vana va xipfumelelanu lexi Xikwembu Nkulukumba angaxihamba ni vatatana venu, loko aku ku Abrahamu: avatukulwini vaku, a matiko hinkwawu matakatekisiwa.

²⁶Loko Xikwembu Nkulukumba apfuxi kufeni a Nandra wakwe, amurumeli hi kuranga, ku n'wine akuva an'wikatekisa, akuva mun'wana-ni-mun'wana atrika vusomboloki byake.